.jpg)
កងកម្លាំងបានជម្លៀសពលរដ្ឋទៅកាន់ទីទួលសុវត្ថភាព ពីការរងគ្រោះដោយទឹកជំនន់នៅខណ្ឌដង្កោ កាលពីថ្ងៃទី ១៧ តុលា។ ហុង មិនា
ភ្នំពេញ៖ ខណៈជំនន់ទឹកភ្លៀងបង្កឱ្យមនុស្សយ៉ាងតិច ២៤ នាក់ស្លាប់ និងជាង ២៧ ម៉ឺននាក់ទៀតកំពុងរស់នៅទាំងលំបាកក្នុងផ្ទះដែលជន់លិច និងហ៊ុមព័ទ្ធដោយជំនន់ទឹកភ្លៀង និងនៅក្រោមតង់កៅស៊ូនៃតំបន់ទីទួលសុវត្ថិភាព ដែលគាំពារដោយអាជ្ញាធរមូលដ្ឋានជាបណ្ដោះអាសន្ន លោកនាយករដ្ឋមន្ត្រី ហ៊ុន សែន ជំរុញឱ្យមានការប្រុងប្រយ័ត្នខ្ពស់ និងពង្រឹង ការអនុវត្តវិធានការអនាម័យស្អាត។
យោងតាមទិន្នន័យដែលទទួលបានពីគណៈកម្មាធិការជាតិគ្រប់គ្រងគ្រោះមហន្តរាយដែល ភ្នំពេញ ប៉ុស្តិ៍ ទទួលបានកាលពីថ្ងៃអាទិត្យ បង្ហាញថា ជំនន់ទឹកភ្លៀងគិតត្រឹមព្រឹកថ្ងៃទី ១៧ ខែតុលា បានបង្កឱ្យមនុស្ស ២៤ នាក់ស្លាប់ដោយលង់ទឹក និងប៉ះពាល់ពលរដ្ឋដែលរស់នៅក្នុង ១៩ រាជធានី-ខេត្ត ជាង ២៧ ម៉ឺននាក់។
ក្នុងនោះ មនុស្សជាង ២៦ ៦០៨ នាក់ត្រូវបានជម្លៀសចេញទៅកាន់ទីទួលសុវត្ថិភាព។ បង្កការប៉ះពាល់ដំណាំស្រូវ សរុបជិត ១៧ ម៉ឺនហិកតា ក្នុងនោះខូចខាតទាំងស្រុង ៣២ ៣៨២ ហិកតា ប៉ះពាល់ដំណាំរួមផ្សំសរុបជាង ៧៣ ពាន់ហិកតា ក្នុងនោះខូចខាតទាំងស្រុងជាង ៣៨ ពាន់ហិកតា ព្រមទាំងប៉ះពាល់ផ្លូវជាតិ និងផ្លូវខេត្តសរុបជាង ៣៤៤ គ.ម និងផ្លូវលំជនបទជិត ១ ៥០០ គ.ម។
ក្នុងឱកាសចុះពិនិត្យសួរសុខទុក្ខ ពលរដ្ឋរងគ្រោះដោយជំនន់ទឹកភ្លៀងក្នុងខណ្ឌដង្កោ រាជធានីភ្នំពេញ នាយប់ថ្ងៃទី ១៥ ខែតុលា លោកនាយករដ្ឋមន្ត្រីថ្លែងថា ថ្វីបើពេលនេះស្ថានភាពជំនន់ទឹកភ្លៀងនៅខេត្តកំពង់ស្ពឺមានការថយចុះបន្តិច និងកំពុងវិលទៅរកស្ថានភាពដូចធម្មតាវិញ ដោយសារភ្លៀងធ្លាក់ក្នុងកម្រិតខ្សោយក្តី ប៉ុន្តែផ្នែកខ្លះនៃខណ្ឌដង្កោរាជធានីភ្នំពេញ និងស្រុកកណ្ដាលស្ទឹង នៃខេត្តកណ្ដាល ដែលជាតំបន់ទំនាបសណ្ដរបស់ខេត្តកំពង់ស្ពឺ ទឹកនៅមិនទាន់ថមថយនៅឡើយទេ ដែលទាមទារឱ្យមានការប្រុងប្រយ័ត្នបន្ថែមទៀត។
លោក ហ៊ុន សែន ថា៖ «ក្នុងរយៈពេលប៉ុន្មានថ្ងៃកន្លងមកនេះ ប្រជាពលរដ្ឋដែលរស់នៅតាមបណ្ដារាជធានី-ខេត្តមួយចំនួនកំពុងរស់នៅទាំងលំបាក ដោយសារជំនន់ទឹកភ្លៀង ជន់លិចផ្ទះសំបែង។ តែទោះជាយ៉ាងណាក៏ដោយ នៅក្នុងកាលៈទេសៈនេះ ការពង្រឹងវិធានការអនាម័យស្អាត និងការជួយគ្នាក្នុងគ្រាមានអាសន្ន គឺជារឿងសំខាន់បំផុត»។
លោកនាយករដ្ឋមន្ត្រីក៏បានអំពាវនាវដល់អាជ្ញាធរពាក់ព័ន្ធត្រូវបង្កើនការយកចិត្តទុកដាក់ ផ្ដល់ជំនួយសង្គ្រោះបឋមដល់ពលរដ្ឋរងគ្រោះដោយទឹកជំនន់ និងត្រូវពិនិត្យតាមដានពីសុខភាពនៃការរស់នៅរបស់ពលរដ្ឋ ដោយផ្ដល់ថ្នាំសង្កូវ និងព្យាបាលឱ្យបានទាន់ពេលវេលា ធ្វើយ៉ាងណាកាត់បន្ថយនូវហានិភ័យនានា ឱ្យបានច្រើនបំផុត។
លោកថ្លែងថា៖ «បើទោះជាយើងមកដល់ទីទួលសុវត្ថិភាពហើយក្ដី តែយើងត្រូវតែប្រុងប្រយ័ត្នថែមទៀត ពិសេសកុមារកុំឱ្យចុះលេងទឹក និងត្រូវចេះថែទាំអនាម័យសុខភាពផ្ទាល់ខ្លួនឱ្យបានល្អ។ កុំទទួលទានទឹកមិនស្អាត ដែលនាំទៅដល់ជំងឺរាករូសក្អួតនាំមកនូវការលំបាកបន្ថែមទៀត»។
លោកបន្តថា៖ «ជំងឺកូវីដ ១៩ និងគ្រោះជំនន់ទឹកភ្លៀងបានបំផ្លាញយើង ប៉ុន្តែមិនអាចសម្លាប់យើងបានទេ នៅពេលដែលយើងគ្រប់គ្នាមានការប្រុងប្រយ័ត្ន និងអនុវត្តឱ្យបានខ្ជាប់ខ្ជួននូវវិធាននៃការរស់នៅស្អាត»។
បើតាមលោកនាយករដ្ឋមន្ត្រី នៅពេលនេះ រាជធានី-ខេត្តចំនួន ៣ ប៉ុណ្ណោះ ដែលកំពុងបន្តប្រឈមនឹងគ្រោះទឹកជំនន់ធ្ងន់ធ្ងរនៅឡើយ ក្នុងនោះមានរាជធានីភ្នំពេញ ខេត្តកណ្ដាល និងខេត្តបន្ទាយមានជ័យ ក្រៅពីនេះស្ថានភាពទឹកជំនន់បានចាប់ផ្ដើមស្រកជាបណ្ដើរៗហើយ។
ជុំវិញករណីនេះលោក លី សារី អ្នកនាំពាក្យរដ្ឋបាលខេត្តបន្ទាយមានជ័យប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា ដោយសារភ្លៀងនៅតែបន្តធ្លាក់ក្នុងកម្រិតមធ្យម និងទឹកហូរធ្លាក់តាមដងអូរពីស្រុកបវេលខេត្តបាត់ដំបង និងពីព្រំដែនថៃបានបង្កឱ្យមនុស្ស ១៣ នាក់ស្លាប់ និងប៉ះពាល់ផ្ទះពលរដ្ឋសរុប ១៥ ១១១ ខ្នង។ គិតចំនួនមនុស្ស ស្មើនឹង ១៧៣ ៩២៦ នាក់ ក្នុងនោះមនុស្ស ១១ ១៧២ នាក់ ត្រូវបានជម្លៀសទៅទីទួលសុវត្ថិភាព។
លោកថ្លែងថា ក្រៅពីនេះគ្រោះទឹកជំនន់ក៏បានជន់លិចដំណាំស្រូវ ចំនួន ៤១ ៤៨៤ ហ.ត ដំឡូងមី និងដំណាំរួមផ្សំជាង ២ ៨០០ ហ.ត។ សាលារៀន ៨៤ កន្លែង ត្រូវផ្អាកបណ្ដោះអាសន្នមណ្ឌលសុខភាព ៩ កន្លែង...និងប៉ះពាល់កំណាត់ផ្លូវចំនួន ៤៨៩ កន្លែង មានប្រវែងសរុបជាង ២៩៥ គ.ម។
លោកថ្លែងថា៖ «នៅពេលនេះ យើងកំពុងបន្តចុះពិនិត្យស្ថានភាព និងជម្លៀសពលរដ្ឋចេញពីតំបន់ដែលរងការជន់លិចធ្ងន់ធ្ងរមកកាន់ទីទួលសុវត្ថិភាព និងផ្ដល់ជំនួយសង្គ្រោះបឋមដល់ជនរងគ្រោះផងដែរ»។
លោក ញ៉ែម ភារម្យ ប្រធានមន្ទីរពេទ្យបង្អែកថ្មពួកប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា ទឹកជំនន់ដែលហូរចាក់តាមអូរព្រំដែនថៃ បានជន់លិចមន្ទីរពេទ្យបង្អែកស្រុកថ្មពួក។ អ្នកជំងឺ ២៤ នាក់ និងគ្រូពេទ្យ រួមទាំងបុគ្គលិកសុខាភិបាលនៃមន្ទីរពេទ្យនេះ សរុប ៦៩ នាក់ ត្រូវបានជម្លៀសចេញទៅមន្ទីរពេទ្យស្រុកស្វាយចេក និងមន្ទីរពេទ្យខេត្តក្នុងស្រុកមង្គលបុរី។
លោកថា៖ «ទឹកបានជន់លិចដល់រនាបគ្រែអ្នកជំងឺទៅហើយ ដូច្នេះយើងមិនអាចបន្តការព្យាបាលពួកគាត់ក្នុងស្ថានភាពបែបនេះ ដោយប្រថុយប្រថានបានទេ។ យើងចាំបាច់ត្រូវជម្លៀសពួកគាត់ទៅមន្ទីរពេទ្យបង្អែកស្រុកស្វាយចេក និងមន្ទីរពេទ្យខេត្តបន្ទាយមានជ័យដែលមានសុវត្ថិភាព ដើម្បីធានាដល់ការព្យាបាលពួកគាត់បន្តរហូតដល់ជាសះស្បើយ»។
សប្បុរសជន ១៣៥ នាក់ ចូលរួមឧបត្ថម្ភសាច់ប្រាក់សរុបជាង ៦,៨ លានដុល្លារ និងជាង ៤៣៤ លានរៀល និង ៥ ០០០ អឺរ៉ូ ដល់ប្រមុខរដ្ឋាភិបាល ដើម្បីឆ្លើយតបចំពោះដំណោះស្រាយជាបន្ទាន់ដល់ជនរងគ្រោះដោយទឹកជំនន់។ នេះបើតាម Facebook របស់លោក ហ៊ុន សែន បានចុះផ្សាយកាលពីយប់ថ្ងៃទី ១៧ ខែតុលា។
រដ្ឋាភិបាលក៏បានឧបត្ថម្ភជាសាច់ប្រាក់ ២០០ លានរៀល ដល់ជនរងគ្រោះ ២០ គ្រួសារ ដែលមានសមាជិកស្លាប់ដោយលង់ទឹក ក្នុងនោះ ១ គ្រួសារទទួលបានសាច់ប្រាក់ ១០ លានរៀល។ នេះបើតាមលោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយពីម្សិលមិញ៕
វីដេអូ៖
