.jpg)
រថយន្តបើកបុកគ្នានៅលើដងផ្លូវលើស្ពានព្រែកព្នៅកាលពីខែមុន ហុង មិនា
ភ្នំពេញៈ មនុស្ស ២៦ នាក់ស្លាប់ និង ៨០ នាក់របួសធ្ងន់ និងស្រាលនៅលើដងផ្លូវក្នុងរយៈពេល ៣ ថ្ងៃ ដោយហេតុធ្វើដំណើរទៅចូលរួមពិធីភ្ជុំបិណ្ឌដែលចាប់ផ្ដើមកាលពីថ្ងៃទី ២៦-២៨ ខែកញ្ញាកន្លងមកបើប្រៀបធៀបរយៈពេលដូចគ្នាក្នុងឆ្នាំ ២០១៨ ចំនួនអ្នកស្លាប់ថយចុះ ២ នាក់។ យោងតាមរបាយការណ៍គ្រោះថ្នាក់ចរាចរណ៍ផ្លូវគោកទូទាំងប្រទេសនៃអគ្គស្នងការដ្ឋាននគរបាលជាតិ។
លោក ហ៊ឹម យ៉ាន អគ្គស្នងការរងនគរបាលជាតិ និងជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងប្រាប់ភ្នំពេញប៉ុស្ដិ៍កាលពីថ្ងៃចន្ទម្សិលមិញថា ករណីគ្រោះថ្នាក់ចរាចរណ៍ឆ្នាំនេះ បើប្រៀបធៀបនឹងភ្ជុំបិណ្ឌ ឆ្នាំ ២០១៨ កន្លងទៅករណីគ្រោះថ្នាក់ចរាចរណ៍កើតឡើងមានការថយចុះ ១ លើកចំនួនអ្នកស្លាប់ថយចុះ ២ នាក់ និងអ្នករងរបួសថយចុះចំនួន ៥ នាក់។
លោក យ៉ាន បានថ្លែងថា ខេត្តដែលមានគ្រោះថ្នាក់កើតឡើងច្រើនជាងគេ មានខេត្ដកណ្ដាល កំពង់ចាម កំពត និងតាកែវ។ កាលពីឆ្នាំមុនគ្រោះថ្នាក់រយៈពេល ៣ ថ្ងៃដូចគ្នាមានចំនួនស្លាប់រហូតដល់ ២៨ នាក់។ ប៉ុន្ដែបញ្ហាបណ្ដាលឲ្យមានគ្រោះថ្នាក់នេះនៅតែបន្ដកើតឡើងដោយសារតែអ្នកបើកបរ បើកលើសល្បឿនកំណត់ដដែល។
តាមរបាយការណ៍នគរបាលដដែលនេះបានឲ្យដឹងថា ហេតុការណ៍គ្រោះថ្នាក់ចរាចរណ៍ចំនួន ៥២ លើកនេះបណ្ដាលឲ្យខូចខាតម៉ូតូចំនួន ៦៦ គ្រឿង, រថយន្តតូច ២៤ គ្រឿង, រថយន្ដធំ ៣ គ្រឿង ខណៈមូលហេតុដែលបណ្ដាលឲ្យកើតមានគ្រោះថ្នាក់ចរាចរណ៍ខ្លាំងជាងគេបណ្ដាលមកពីអ្នកបើកបរលើសល្បឿនកំណត់ និងមិនគោរពសិទ្ធិមិនប្រកាន់ស្ដាំ ប្រជែង បត់ក្នុងស្ថានភាពគ្រោះថ្នាក់ និងបើកបរទាំងមានផ្ទុកសារធាតុស្រវឹងជាដើម។
ដោយឡែកនៅក្នុងខេត្តព្រះសីហនុលោក អ៊ី សុខា ស្នងការរងនគរបាលខេត្តព្រះសីហនុទទួលបន្ទុកចរាចរណ៍ឲ្យដឹងកាលពីថ្ងៃចន្ទម្សិលមិញថា នៅថ្ងៃចន្ទម្សិលមិញនេះមានករណីគ្រោះថ្នាក់ចរាចរណ៍មួយបានកើតឡើងរវាងរថយន្ត ៣ គ្រឿងគឺរថយន្តដឹកថ្ម រថយន្តដឹកខ្សាច់ និងរថយន្ត STAREX ដឹកភ្ញៀវ បុកប៉ះគ្នានៅចំណុចចំណោតអូរត្រាវ ស្រុកព្រៃនប់ ខេត្ដព្រះសីហនុ បណ្តាលឲ្យមនុស្សចំនួន ៣ នាក់ស្លាប់នៅនឹងកន្លែងកើតហេតុ។
លោកថ្លែងថា គ្រោះថ្នាក់នេះសមត្ថកិច្ចមិនទាន់ស្គាល់អត្តសញ្ញាណជនរងគ្រោះនៅឡើយ និងកំពុងស្វែងរកសាច់ញាតិយកសពទៅធ្វើបុណ្យតាមប្រពៃណីក្នុងចំណោមអ្នកស្លាប់ទាំង ៣ ក្នុងនោះមាន ២ នាក់ជាអ្នកជិះក្នុងរថយន្ត STAREX ។
របាយការណ៍របស់សមត្ថកិច្ចបញ្ជាក់ថា គ្រោះថ្នាក់ចរាចរណ៍នេះបង្កឡើងដោយរថយន្ត ១ គ្រឿងម៉ាក STAREX ពណ៌ សមានអ្នកបើកបរ ឈ្មោះ សេង ភារៈ ភេទប្រុស អាយុ ២៦ ឆ្នាំមុខរបររត់តាក់ស៊ីរស់នៅភូមិល្បើក ស្រុកឈូក ខេត្តកំពតរួមនឹងអ្នកដំណើរមនុស្ស ៧ នាក់ (ស្រី ២ នាក់) មានទិសដៅពីខេត្តកំពតឆ្ពោះមកខេត្តព្រះសីហនុលុះមកដល់ចំណុចខាងលើក្នុងស្ថានភាពផ្លូវឡើងចំណោត អ្នកបើកបររថយន្ត STAREX បានវ៉ាជែងរថយន្តធុនធំ ១ គ្រឿងម៉ាក HYUNDAI ពណ៌ស អ្នកបើកបរមិនស្គាល់អត្តសញ្ញាណមិនផុតក៏បានកៀរ ហើយជ្រុលទៅបុករថយន្តធុនធំ ១ គ្រឿងទៀត ម៉ាក HYUNDAI ពណ៌ ស ដែលមានទិសដៅផ្ទុយអ្នកបើកបរមិនស្គាល់អត្តសញ្ញាណ។
លោក គឹម បញ្ញា នាយកអង្គការមូលនិធិបង្ការរបួស អាស៊ី (AIP Foundation) បានឲ្យដឹងថា ចំនួនករណីគ្រោះថ្នាក់ចរាចរណ៍ និងចំនួនអ្នកស្លាប់ក្នុងករណីគ្រោះថ្នាក់ចរាចរណ៍ទូទាំងប្រទេសដែលបានធ្វើដំណើរទៅតាមបណ្ដាខេត្ដក្នុងពិធីបុណ្យភ្ជុំបិណ្ឌមានការថយចុះបើធៀបនឹងឆ្នាំ ២០១៨។ ទោះបីមានសញ្ញាណនៃការថយចុះ ប៉ុន្ដែចំនួនអ្នកស្លាប់នៅតែមានចំនួនច្រើននៅឡើយ។
លោក បញ្ញា ថ្លែងថា៖ «យើងនៅតែមានការព្រួយបារម្ភទោះបីសញ្ញាណនៃអ្នកស្លាប់មានការថយចុះ។ បើយើងមើលលើចំនួនអ្នកស្លាប់ចំនួន ២៦ នាក់ក្នុងរយៈពេល ៣ ថ្ងៃ ដូច្នេះក្នុង ១ ថ្ងៃមានអ្នកស្លាប់ចូលដល់ ៩ នាក់ និងមានអ្នករងរបួសជាច្រើនអ្នកផ្សេងទៀត»។
លោក បញ្ញា បានឲ្យដឹងទៀតថាស្ថាប័នរាជរដ្ឋាភិបាល ភាគីពាក់ព័ន្ធមានសង្គមស៊ីវិល វិស័យឯកជន និងអ្នកសារព័ត៌មាន បានខិតខំប្រឹងប្រែងក្នុងការឆ្លើយតបចំពោះបញ្ហាគ្រោះថ្នាក់ចរាចរណ៍។ ប៉ុន្ដែការខិតខំនេះនៅប្រើប្រាស់វិធានការទន់ភ្លន់ដោយយកការអប់រំ ការផ្សព្វផ្សាយជាអាទិភាព ហើយបើសិននៅតែបន្តយកវិធីសាស្ដ្រដដែល ដើម្បីដោះស្រាយបញ្ហាគ្រោះថ្នាក់ចរាចរណ៍នោះនឹងមិនមានការកាត់បន្ថយគ្រោះថ្នាក់បានច្រើនឡើយ។
លោកថ្លែងថា៖ «ស្របពេលរាជរដ្ឋាភិបាលប្រើប្រាស់វិធីសាស្ដ្រអប់រំផ្សព្វផ្សាយ រដ្ឋាភិបាលគួរប្រើប្រាស់យន្តការលើការរឹតបន្តឹងការអនុវត្ដច្បាប់ឲ្យបានជាប់លាប់ និងបានទៀងទាត់ដោយស្មើភាព និងតម្លាភាពជាអាទិភាពវិញទើបអាចជំរុញការកាត់បន្ថយចំនួនអ្នកស្លាប់ ដោយគ្រោះថ្នាក់ចរាចរណ៍បានច្រើន ដោយការផ្លាស់ប្ដូរឥរិយាបថរបស់ពលរដ្ឋ»។
លោក បញ្ញា បានបញ្ជាក់ថាក្រៅពីការរឹតបន្ដឹងវិធានការនៃការអនុវត្ដច្បាប់របស់សមត្ថកិច្ចក្នុងការកាត់បន្ថយគ្រោះថ្នាក់ចរាចរណ៍ រាជរដ្ឋាភិបាលអាចដាក់ចេញនូវវិធានការផ្សេងៗជាច្រើនទៀត ដូចជា កត្ដាយានយន្ត ការកែលម្អហេដ្ឋារចនាសម្ព័ន្ធផ្លូវថ្នល់ បំពាក់ស្លាកសញ្ញាចរាចរណ៍ជាដើម។ ប៉ុន្ដែចំណុចដែលសង្គមស៊ីវិលទទូចសំណូមពរបន្ថែមនោះគឺការបញ្ឈប់ការផ្សព្វផ្សាយពាណិជ្ជកម្មគ្រឿងស្រវឹង។ បើមិនបានបញ្ឈប់ជាទូទៅ ក៏គួរតែបញ្ឈប់នៅថ្ងៃឈប់សម្រាកបុណ្យជាតិធំៗគឺមិនត្រូវឲ្យមានការផ្សព្វផ្សាយនោះទេ៕
