កំពង់ធំ៖ បុរស ២ នាក់ ត្រូវបានរន្ទះបាញ់ស្លាប់នៅមុនក្រោយគ្នាក្នុងរយៈពេលប្រមាណតែជាង ២ ម៉ោងប៉ុណ្ណោះ ដែលហេតុការណ៍នេះបានកើតឡើង កាលពីថ្ងៃទី ២៦ ខែ ឧសភា ឆ្នាំ ២០២០ ស្ថិតនៅក្នុងភូមិ-ឃុំចំនួន ២ ផ្សេងគ្នា ប៉ុន្តែក្នុងស្រុកកំពង់ស្វាយ ខេត្តកំពង់ធំតែមួយ។ នេះបើតាមការប្រាប់ឲ្យដឹងពីមន្ត្រីនគរបាលមូលដ្ឋាននៅថ្ងៃទី ២៧ ខែឧសភា។
លោក ខេន ឈុនគ័រ អធិការស្រុកកំពង់ស្វាយ បានប្រាប់ភ្នំពេញប៉ុស្តិ៍ថា លោក សេង វ៉ាត អាយុ ៦៤ ឆ្នាំ មានទីលំនៅភូមិមហរ៍ ឃុំជ័យ ស្រុកកំពង់ស្វាយ ខេត្តកំពង់ធំ ត្រូវបានរន្ទះបាញ់ស្លាប់ នៅកណ្ដាលវាលស្រែ ខណៈគាត់កំពុងព្យាយាមដឹកគោត្រឡប់ពីស្រែទៅផ្ទះរបស់គាត់ ពេលមេឃកំពុងភ្លៀង លាយឡំជាមួយផ្គររន្ទះ។
លោក ឈុនគ័រ បានបន្តថា ក្នុងរយៈពេលជាង ២ ម៉ោងក្រោយមក ក៏មានករណីរន្ទះបាញ់ស្លាប់បុរសម្នាក់ទៀត ឈ្មោះ បៀន ហ៊ីម អាយុ ៣៣ ឆ្នាំ មានទីលំនៅភូមិត្រាច ឃុំត្បែង ស្រុកកំពុងស្វាយ ខណៈគាត់កំពុងកៀងហ្វូងគោ
របស់គាត់បញ្ចូលក្រោល ដែលស្ថិតនៅប្រមាណជាង ២០ ម៉ែត្រពីក្រោយផ្ទះរបស់គាត់ក្នុងពេលមេឃកំពុងភ្លៀង។
លោក ឈុនគ័រ បានបញ្ជាក់ថា៖ «ចំពោះករណីរន្ទះបាញ់នេះ គឺយើងមិនអាចបន្ទោសទៅលើពលរដ្ឋថាមិនអើពើយកចិត្តទុកដាក់ស្ដាប់និងអនុវត្តន៍តាមការណែនាំរបស់មន្ត្រីជំនាញបាននោះទេ ព្រោះពួកគាត់ជាកសិករ ដែលជីវភាពរស់នៅប្រចាំថ្ងៃរបស់ពួកគាត់ពឹងផ្អែកលើការងារដាំដុះនិងចិញ្ចឹមសត្វ»។
លោកបានបន្ថែមថា៖ «ការណែនាំមិនឲ្យពួកគាត់បំពេញការងារស្រែចំការ ឬមើលថែទាំសត្វក្នុងពេលមេឃកំពុងភ្លៀងនោះ គឺពួកគាត់ពិបាកនឹងទទួលយកខ្លាំងណាស់ បើទោះជាមានករណីស្លាប់ដោយរន្ទះបាញ់នេះ កើតឡើងជាញឹកញាប់ក្ដី»។
ការស្លាប់របស់បុរសទាំង ២ ខាងលើនេះ បានធ្វើឲ្យចំនួនអ្នកស្លាប់ដោយករណីរន្ទះបាញ់ក្នុងរយៈពេល ៥ ខែ ដើមឆ្នាំ ២០២០ កើនឡើង ១៤ នាក់។ នេះយោងតាមប្រសាសន៍របស់លោក កែវ វី ទីប្រឹក្សាជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងនៅថ្ងៃទី ២៧ ខែឧសភា។
លោក វី បានប្រាប់ភ្នំពេញប៉ុស្តិ៍ថា ក្នុងរយៈពេល ៥ ខែ ដើមឆ្នាំ ២០២០ នេះ បាតុភូតរន្ទះបាញ់ បានបណ្ដាលឲ្យមនុស្ស ១៤ នាក់ និងបានបង្ករបួសមនុស្ស ៩ នាក់។ ស្លាប់សត្វគោក្របី សរុប ២០ ក្បាល និងខូចខាតផ្ទះ៨ខ្នង។ ប៉ុន្តែចំនួននេះ មានការថយចុះគួរឲ្យកត់សម្គាល់ បើធៀបទៅនឹងឆ្នាំមុនក្នុងរយៈពេលដូចគ្នានេះ ដែលមានមនុស្សស្លាប់រហូតដល់ ៤៦ នាក់ និងរបួស ៤៤ នាក់ ព្រមទាំងងាប់គោក្របីអស់ ៦៣ ក្បាល។
លោក វី បានអំពាវនាវដល់ពលរដ្ឋបង្កើនការប្រុងប្រយ័ត្នចំពោះបាតុភូតរន្ទះបាញ់នេះបន្ថែមទៀត ខណៈក្រសួងធនធានទឹក និងឧតុនិយម បានព្យាករណ៍ថា បាតុភូតនេះរួមទាំងបាតុភូតខ្យល់កន្ត្រាក់ នឹងបន្តកើតមានកាន់តែច្រើនឡើង ក្នុងអំឡុងពេលមានភ្លៀងធ្លាក់។
ក្រសួងធនធានទឹកនិងឧតុនិយម កាលពីថ្ងៃទី ២៥ ខែ ឧសភា ឆ្នាំ ២០២០ បានព្យាករណ៍ថា ចាប់ពីពាក់កណ្ដាលនៃសប្ដាហ៍នេះ រហូតដល់ដើមខែមិថុនាខាងមុខ នឹងមានភ្លៀងធ្លាក់រាយប៉ាយនៅទូទាំងប្រទេស ក្នុងកម្រិតពីខ្សោយទៅខ្លាំង ហើយក្នុងអំឡុងពេលមានភ្លៀងធ្លាក់នឹងមានបាតុភូតខ្យល់កន្ត្រាក់ និងផ្គររន្ទះមកជាមួយគ្នាផង ដែលគប្បីត្រូវបង្កើនការប្រុងប្រយ័ត្ន ដើម្បីបង្ការគ្រោះថ្នាក់កើតឡើងជាយថាហេតុ៕