.jpg)
អ្នកជួយសង្គ្រោះសែងជនរងគ្រោះពីការបាក់រលំអគារកម្ពស់ ៦ ជាន់នៅខេត្តកែបកាលពីថ្ងៃម្សិលមិញ។ ហេង ជីវ័ន
កែបៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងបញ្ជាក់កាលពីម្សិលមិញក្រោយបិទបញ្ចប់ជាស្ថាពរនូវប្រតិបត្តិការរុករកជនរងគ្រោះនៅក្រោមគំនរបាក់បែកនៃអគាររលំជិត ២ ថ្ងៃបានឲ្យដឹងថា មានមនុស្សស្លាប់ចំនួន ៣៦ នាក់ និងរបួស ២៣ នាក់។
លោកនាយករដ្ឋមន្ត្រីក៏បានអះអាងផងដែរថា នឹងមិនមានមន្ត្រីណាម្នាក់ត្រូវបានដកពីតំណែងពាក់ព័ន្ធនឹងហេតុការណ៍នោះទេ។
បេសកកម្មជួយសង្គ្រោះជនរងគ្រោះពីការបាក់អគារ ៦ ជាន់នៅខេត្តកែប បានបញ្ចប់កាលពីវេលាថ្ងៃត្រង់នៅថ្ងៃអាទិត្យម្សិលមិញដោយប្រើពេល ៤៣ ម៉ោង និង ២០ នាទី។ តួលេខចុងក្រោយបញ្ជាក់ថា អ្នករស់រានមានជីវិតមានចំនួនសរុប ២៣ នាក់ក្នុងនោះស្ត្រីចំនួន ៨ នាក់។ ចំណែកជនរងគ្រោះស្លាប់មានចំនួន ៣៦ នាក់ក្នុងនោះមានស្ត្រី ១៤ នាក់។ សរុបទាំងស្លាប់ទាំងរបួសមានចំនួន ៥៩ នាក់ក្នុងនោះមានស្ត្រី ២២ នាក់ហើយក្នុងចំនួននេះក៏មានក្មេងៗផងដែរ។ នេះបើតាមការបញ្ជាក់របស់លោក ហ៊ុន សែន ក្នុងសន្និសីទសារព័ត៌មានកាលពីម្សិលមិញ។
លោក ហ៊ុន សែន បានថ្លែងថាក្នុងប្រតិបត្តិការជាអាទិភាពទី ១ គឺទៅលើការសង្គ្រោះជីវិតមនុស្សដែលត្រូវធ្វើការសង្គ្រោះដោយការប្រុងប្រយ័ត្ន ព្រោះបើមិនដូច្នោះទេអាចធ្វើឲ្យជនរងគ្រោះស្លាប់ និងអាទិភាពទី ២ គឺការប្រយ័ត្នមិនឲ្យមានការពុះច្រៀកដោយគ្រឿងចក្រលើជនរងគ្រោះដែលបានស្លាប់ក្នុងគំនរអគារ ដោយចំណុចទាំង ២ នេះហើយ ដែលធ្វើឲ្យប្រតិបត្តិការហាក់ដូចជា យឺតបន្តិច។
ស្ត្រីជនរងគ្រោះម្នាក់ឈ្មោះ ឆន ផល្លី មកពីខេត្តបន្ទាយមានជ័យគឺជាអ្នកដែលត្រូវបានជួយសង្គ្រោះក្រោយគេចេញពីជាន់ក្រោមបំផុតនៃអគារបាក់រលំ។
អ្នកស្រីបានឲ្យដឹងថា អ្នកស្រីគឺជាកម្មករលាយស៊ីម៉ងត៍នៅអគារនេះហើយបានជាប់នៅក្រោមផ្ទាំងថ្ម ប៉ុន្តែអាចវារមករកកន្លែងស្រឡះបាន នៅពេលដែលគ្រឿងចក្រកាយជិតដល់ហើយបានយកជើងធាក់ឲ្យដីហុយឡើងលើដើម្បីឲ្យគេដឹង ហើយបន្ទាប់មកអ្នកស្រីត្រូវបានជួយសង្គ្រោះ។
អ្នកស្រី ផល្លី បានថ្លែងឲ្យដឹងថា៖ «ថ្ងៃនោះ (៣ មករា) ខ្ញុំកំពុងអង្គុយលេងជាមួយប្អូន ៣ នាក់ ជិតគ្នា។ ពេលនោះម៉ោង ៤ និង ២១ នាទីខ្ញុំថាដល់ម៉ោងដាំបាយហើយ ខ្ញុំទៅដាំបាយហើយមិនទាន់បានក្រោកផងគ្រឹបផ្កាប់មុខគ្រហីត។ បន្ទាប់មកងងឹតសូន្យឈឹង ខ្ញុំថា ខ្ញុំខ្វាក់ភ្នែកហើយ ព្រោះដីខ្ទាតចូល។ ខ្ញុំបានកូនមួយ តែស្លាប់ហើយអាយុ ១៨ ឆ្នាំវាកំពុងអង្គុយលេងហ្គេមលើម៉ូតូ នៅខាង។ វាគេរកឃើញក្រោយគេ»។
អ្នកស្រីរៀបរាប់បន្តថា៖ «ខ្ញុំដឹងថា ខ្ញុំមិនរួចខ្លួនទេព្រោះវាមាំហើយច្រើនជាន់ ហើយខ្ញុំនៅជាន់ក្រោម។ ខ្ញុំគិតថា ខ្ញុំមិនសង្ឃឹមទេ ខ្ញុំលាម៉ែ លាឪតាំងពីដួលគ្រឹបភ្លាម។ ប្ដីខ្ញុំនៅជាន់ទី ៤។ តាមខ្ញុំដឹងអគារនេះគេធ្វើសម្រាប់ជួល»។
លោក ហ៊ុន សែន បានបញ្ជាក់ថា មូលហេតុនៃការបាក់រលំអគារអាចមាន ២ គឺទី ១ មេការសាងសង់មិនធ្វើតាមការគូសប្លង់ដោយដាក់ទំហំដែកតូចជាងកម្រិតដែកដែលបានកំណត់នៅក្នុងប្លង់។ ចំណែកកំហុសទី ២ គឺទាក់ទិននឹងការដកក្ដារពុម្ពប្លង់សេលឿនពេក ព្រោះជាធម្មតាត្រូវទុកពេលប្រមាណ ២០ ថ្ងៃ ប៉ុន្តែតាមព័ត៌មានដែលទទួលបានក្ដារពុម្ពប្លង់សេនៅអគារនោះត្រូវបានដកមិនដល់ ១០ ថ្ងៃ។
លោក ហ៊ុន សែន អះអាងថា៖ «មេការសំណង់នេះ និងកូនៗរបស់គាត់ក៏បានទទួលមរណភាពក្នុងហេតុការណ៍នេះដែរ»។
ទោះបីយ៉ាងណាក៏ដោយលោកនាយករដ្ឋមន្ត្រីបានកោតសរសើរដល់ក្រុមការងារជួយសង្គ្រោះដែលមកពីស្ថាប័នផ្សេងៗ រួមទាំងក្រុមគ្រូពេទ្យផងដែលបានចូលរួមក្នុងប្រតិបត្តិការនេះ ប៉ុន្តែកម្លាំងទាំងនោះត្រូវបន្ថែមការហ្វឹកហាត់បន្តទៀត។ ទន្ទឹមគ្នានេះដែរលោកក៏បានថ្លែងអំណរគុណដល់ក្រុមហ៊ុនឯកជន និងអ្នកជំនាញចិននៅខេត្តព្រះសីហនុដែលបានចូលរួមក្នុងការជួយសង្គ្រោះនោះ ហើយក៏បានស្នើសុំឲ្យអ្នកជំនាញចិនជួយផ្ដល់ការហ្វឹកហាត់ដល់កម្ពុជាបន្ថែមទៀតផងដែរ។
លោក ហ៊ុន សែន ក៏បានអះអាងផងដែរថានៅពេលមានឧប្បត្តិហេតុភ្លាមមានអ្នកសរសេរសារទៅលោកតាមរយៈ តេឡេក្រាម ឬតាមវ៉ាត់ស្អាប់ដោយធ្វើការស្ដីបន្ទោស និងស្នើឲ្យដកអ្នកនេះ ឬអ្នកនោះ ប៉ុន្តែក្នុងពេលប្រតិបត្តិការនោះមិនមែនជាពេលដែលត្រូវរកអ្នកណាខុសអ្នកណាត្រូវទេ ហើយអភិបាលខេត្តកែបនឹងមិនត្រូវបានដកពីតំណែងទេ។
លោក ហ៊ុន សែន ថ្លែងថា៖ «ខ្ញុំអាចបញ្ជាក់ដើម្បីចៀសវាងពីការសង្ស័យណាមួយ។ អភិបាលខេត្តកែប និងមន្ត្រីក្នុងរដ្ឋបាលរបស់ខេត្តមិនត្រូវបានដកចេញពីតំណែងទេ។ ខ្ញុំសុំបញ្ជាក់។ នៅមានប្រធានគណបក្សនយោបាយមួយបង្ហោះសារចេញភ្លាមលើកដំបូង បង្ហោះថាខេត្តព្រះសីហនុ អភិបាលខេត្តលាលែង តើខេត្តកែបទៅជាអ្វី។ បន្ទាប់ទៅចេញសារមួយបន្ថែមទៀតរហូតដល់ខ្ញុំចូលទៅ comment (បញ្ចេញមតិ) នៅក្នុងហ្វេសប៊ុកនោះថា សុំឯកឧត្តមកុំប្រើពេលវេលានេះរុញឲ្យខ្លោចរោចឲ្យឆៅ»។
លោកបានបន្តថា៖ «ខ្ញុំចង់បញ្ជាក់ថា រឿងរ៉ាវទាក់ទងនឹងរលំបាក់អគារនេះ វាមិនមែនកើតមានតែនៅក្នុងប្រទេសកម្ពុជាទេ សុំអស់លោកមើលការផ្សាយនានាដែលខ្ញុំផ្សាយឡើងវិញពីម្សិល តើមានព្រឹត្តិការណ៍ប៉ុន្មាននៅលើពិភពលោកនេះដែលបានបាក់អគារនៅក្នុងឆ្នាំ ២០១៩ រាប់ទាំងសហរដ្ឋអាមេរិក។ បើសិនជារឿងទាំងនេះទាមទារឲ្យដកមន្ត្រីនេះរហូតដល់ខ្ញុំអាចនឹងពិនិត្យទៅលើមន្ត្រីរបស់ខ្ញុំមួយចំនួនដែលកំពុងស្ថិតនៅក្នុងជួររដ្ឋាភិបាលដែលបង្ហោះហ្វេសប៊ុកចេញ ព្រោះតាំងពីរឿងនេសាទ រឿងស្អីប្រមូលផ្ដុំមកលើអគារសំដៅរុញច្រានឲ្យខ្ញុំដកតំណែងអភិបាលខេត្តកែបតែម្ដង»។
លោកនាយករដ្ឋមន្ត្រីបញ្ជាក់ថា បើទោះបីជាហេតុការណ៍នេះកើតនៅលើដែនដីរបស់ខេត្តកែបក៏ដោយ ក៏អភិបាល និងមន្ត្រីខេត្តមិនជាប់ពាក់ព័ន្ធទេ បើប្រៀបធៀបទៅនឹងព្រឹត្តិការណ៍ដួលរលំសណ្ឋាគារនៅសហរដ្ឋអាមេរិក, ការឆេះសារមន្ទីរនៅទីក្រុងប៉ារីសប្រទេសបារាំង និងភ្លើងឆេះព្រៃនៅប្រទេសអូស្ត្រាលីដោយក្នុងព្រឹត្តិការណ៍ទាំងនោះ មិនមានការបង្ខំឲ្យមានការចុះចេញពីតំណែងទេ។
លោក ហ៊ុន សែន ថ្លែងថា៖ «ប៉ុន្តែខ្ញុំសុំសួរ គ្រាន់តែនាយករដ្ឋមន្ត្រី អូស្ត្រាលី កំពុងតែភ្លើងឆេះព្រៃជូនកូនទៅលេងនៅអាមេរិក គេជេរពេញប្រទេស តើនាយករដ្ឋមន្ត្រីលាលែងពីតំណែងទេ?»។
កាលពីថ្ងៃសៅរ៍ គេហទំព័រអគ្គស្នងការនគរបាលជាតិបានសរសេរថា ម្ចាស់សំណង់ឈ្មោះ ឯក សារុន និងប្រពន្ធឈ្មោះ ឈីវ សុធី កំពុងត្រូវបានស្នងការសាកសួរ។
ខណៈនៅរសៀលម្សិលមិញដែរលោក ហ៊ុន សែន ក៏បានបញ្ជាក់ថាម្ចាស់សំណង់នឹងត្រូវបញ្ជូនទៅតុលាការ ហើយសំណងរដ្ឋប្បវេណីនឹងត្រូវធ្វើឡើងស្របទៅតាមច្បាប់ ហើយក៏បានបង្ហាញក្ដីសង្ឃឹមថា ឧប្បត្តិហេតុបែបនេះនឹងត្រូវបានកាត់បន្ថយបន្ទាប់ពីច្បាប់ស្ដីពីសំណង់បានចូលជាធរមានកាលពីប្រមាណ ២ ខែមុន ហើយឧប្បតិ្តហេតុបែបនេះអាចនឹងត្រូវលុបបំបាត់ទាំងស្រុងតែម្ដង។ ភ្លាមៗបន្ទាប់ពីព្រឹត្តិការណ៍បាក់រលំអគារនេះក្រសួងរៀបចំដែនដី នគរូបនីយកម្ម និងសំណង់បានបង្កើតគណៈកម្មការដើម្បីធ្វើកោសល្យវិច័យលើអគារនេះ។ ប៉ុន្តែភ្នំពេញប៉ុស្តិ៍មិនអាចសុំការបញ្ជាក់ពីលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានទេអំពីដំណើរការធ្វើកោសល្យវិច័យនេះ។
លោកនាយករដ្ឋមន្ត្រីក៏បានអរព្រះគុណដល់ព្រះមហាក្សត្រក៏ដូចជាសម្តេចព្រះមហាក្សត្រី នរោត្តម មុនិនាថ សីហនុ និងសប្បុរសជននានាដែលបានចូលរួមចំណែកឧបត្ថម្ភដល់ជនរងគ្រោះដែលមានថវិកាសរុបជាង ១,៧ លានដុល្លារ។ ប៉ុន្តែអ្នកដែលលោកត្រូវតែអរគុណខ្លាំងជាងគេគឺកម្លាំងប្រតិបត្តិការនៅកន្លែងកើតហេតុ។
លោកក៏បានបញ្ជាក់សាជាថ្មីថា អ្នករងរបួសនឹងទទួលបានថវិកាឧបត្ថម្ភម្នាក់ៗ ១ ម៉ឺនដុល្លារ ប៉ុន្តែមានចំនួន ៧ នាក់នឹងត្រូវទទួលបាន ២ ម៉ឺនដុល្លារ។ សម្រាប់សាកសពម្នាក់ៗទទួលបាន ៥ ម៉ឺន និងសម្រាប់ធ្វើបុណ្យ ១០ លានរៀលបន្ថែម។ លោកថាលោកនឹងពិនិត្យមើលដល់ក្រុមគ្រួសារដែលបាត់បង់បង្គោលគ្រួសារដោយពួកគេអាចនឹងទទួលបានការឧបត្ថម្ភបន្ថែម៕
វីដេអូ៖
