ភ្នំពេញៈ មនុស្ស ៣ នាក់ត្រូវបានចាប់ខ្លួនកាលពីវេលាពេលព្រឹកថ្ងៃទី ២២ ខែកុម្ភៈ ក្រោយពីបង្កហិង្សាដោយប្រើដាវ និងកាំបិតកាប់ទៅលើភាគីម្ខាងដែលកំពុងជួបជុំញាតិមិត្តផឹកស៊ីនៅក្នុងផ្ទះ បណ្ដាលឱ្យមនុស្សម្នាក់ស្លាប់ និង ២ នាក់របួសធ្ងន់ និងស្រាលកាលពីយប់ថ្ងៃអាទិត្យ ទី ២១ ខែកុម្ភៈ ស្ថិតនៅភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
លោក ហង្ស ណារិទ្ធ មេបញ្ជាការស្ដីទី កងរាជអាវុធហត្ថមូលដ្ឋានខណ្ឌជ្រោយចង្វាបានប្រាប់ភ្នំពេញប៉ុស្តិ៍ថា ជនសង្ស័យ ៣ នាក់ ក្នុងចំណោមបក្ខពួក ៦ នាក់ ដែលបានបង្កអំពើហិង្សាកាប់ប្រហារទៅលើក្រុមជនរងគ្រោះមួយក្រុមនោះត្រូវបានចាប់ខ្លួននៅវេលាម៉ោង ២:៤៥ នាទីឈានចូលថ្ងៃទី ២២ ខែ កុម្ភៈឆ្នាំ ២០២១។
លោកថ្លែងថា៖ «ពួកគេត្រូវបានចាប់ខ្លួននៅក្នុងបរិវេណនៃការដ្ឋានសាងសង់អគារបុរីភ្នំពេញផាក ដែលមានទីតាំងមិនឆ្ងាយប៉ុន្មានពីទីតាំងកើតហេតុនោះទេ។ នៅពេលនេះ កម្លាំងសមត្ថកិច្ចកំពុងបន្តស្រាវជ្រាវស្វែងរកចាប់ខ្លួនបក្ខពួកក្រុមជនបង្ក ៣ នាក់ទៀត»។
ទោះយ៉ាងណាលោក ណារិទ្ធ មិនបានបញ្ជាក់អំពីអត្តសញ្ញាណរបស់ជនសង្ស័យទាំងនោះទេប៉ុន្តែពួកគេត្រូវបានបញ្ជូនទៅកាន់បញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចំណាត់ការបន្តតាមនីតិវិធីច្បាប់។
លោក លឹម ច័ន្ទរតនា នាយរងប៉ុស្តិ៍រដ្ឋបាលព្រែកលៀបទទួលបន្ទុកផ្នែកព្រហ្មទណ្ឌបានប្រាប់ ភ្នំពេញ ប៉ុស្តិ៍ថា ជនរងគ្រោះឈ្មោះ ខែម តុលា អាយុ ២០ ឆ្នាំ ជាកម្មករសំណង់ មកពីខេត្តព្រៃវែងបានស្លាប់ ក្រោយពីជនមិនស្គាល់អត្តសញ្ញាណ ១ ក្រុម មានគ្នា ៦ នាក់ប្រដាប់ដោយដាវ និងកាំបិត សម្រុកចូលកាប់ប្រហារក្នុងគ្រាដែលជនរងគ្រោះកំពុងជួបជុំផឹកស៊ី ជាមួយសាច់ញាតិ នៅក្នុងទីធ្លាមុខផ្ទះស្ថិតក្នុងភូមិកើតហេតុ។
ចំណែកសាច់ញាតិរបស់គាត់ ២ នាក់ទៀតរួមមានឈ្មោះ សែម ហេង អាយុ ២៣ ឆ្នាំ និង ឈ្មោះ ចិត្រ ចាន់ឌីន អាយុ ២៥ ឆ្នាំ ដែលអ្នកទាំង ២ មានលំនៅក្នុងភូមិកើតហេតុបានរងរបួសធ្ងន់ និងស្រាលត្រូវបានបញ្ជូនទៅព្យាបាលនៅមន្ទីរពេទ្យកាល់ម៉ែត។
លោក ច័ន្ទរតនា បានថ្លែងដោយយោងលទ្ធផលពិនិត្យកោសល្យវិច័យឱ្យដឹងថា សពជនរងគ្រោះឈ្មោះ ខែម តុលា មានស្នាមមុតធ្លុះ និងដាច់រយះដោយត្រូវនឹងផ្លែដាវ ចំទ្រូង និង ភ្លៅខាងស្ដាំ។ ចំណែកនៅលើខ្លួនជនរងគ្រោះឈ្មោះ សែម ហេង មានស្នាមមុតដាច់ឆ្អឹងជំនីរ និងដៃខាងឆ្វេង ដែលបច្ចុប្បន្ន កំពុងស្ថិតនៅក្នុងបន្ទប់សង្គ្រោះបន្ទាន់នៃមន្ទីរពេទ្យកាល់ម៉ែត។ រីឯជនរងគ្រោះ ឈ្មោះ ចិត្រ ចាន់ឌីន រងរបួសស្រាលដោយដាច់ម្រាមដៃខាងឆ្វេងចំនួន ៣ ប៉ុណ្ណោះ។
លោក ច័ន្ទរតនា ថ្លែងថា សមត្ថកិច្ចនៅមិនទាន់បានដឹងអំពីមូលហេតុ ដែលនាំឱ្យកើតមានអំពើហិង្សា កាប់ប្រហារដ៏ឃោរឃៅនេះនៅឡើយទេ។ ប៉ុន្តែប្រភពពីប្រជាពលរដ្ឋដែលរស់នៅក្បែរកន្លែងកើតហេតុបានអះអាងថា មុនពេលកើតមានអំពើកាប់ប្រហារនេះ គេឃើញភាគីក្រុមជនរងគ្រោះ អង្គុយផឹកស៊ីជួបជុំបងប្អូន និងសាច់ញាតិ ដោយមានការច្រៀងកម្សាន្តលេងនៅក្នុងទីធ្លាមុខផ្ទះរបស់ស្ត្រីឈ្មោះ ធូ ដែលជាបងថ្លៃរបស់ជនរងគ្រោះឈ្មោះ ខែម តុលា។
លុះដល់វេលាម៉ោងជាង ១០ យប់គេក៏ឃើញក្រុមជនបង្កដែលមានគ្នា ៦ នាក់បានជិះម៉ូតូ ២ គ្រឿង ធ្វើដំណើរពីជើងទៅត្បូង ហើយបានឈប់នៅមុខផ្ទះរបស់ក្រុមជនរងគ្រោះ និង បានរោទ៍សំឡេងម៉ូតូខ្លាំងៗធ្វើឱ្យក្រុមជនរងគ្រោះទ្រាំពុំបានក៏ស្រែកគំហកជេរខ្លាំងៗទៅកាន់ក្រុមជនបង្កថា «នែ៎ ពួកអាងាប់! បើពួកឯងចង់រោទ៍ម៉ាស៊ីនម៉ូតូខ្លាំងៗ កុំមករោទ៍នៅទីនេះ!» ក្រោយឮក្រុមជនរងគ្រោះបោះពាក្យសម្ដីបែបនោះ ក្រុមជនបង្កបានបើកម៉ូតូចេញទៅយ៉ាងលឿន ប៉ុន្តែមិនបាន ១០ នាទីផង ស្រាប់តែក្រុមជនបង្កបានបើកម៉ូតូត្រឡប់មកវិញ ដោយមានដាវ និងកាំបិត ហើយនាំគ្នាសម្រុកចូលកាប់ក្រុមជនរងគ្រោះដល់ក្នុងផ្ទះ បណ្ដាលឱ្យស្លាប់ម្នាក់ និងរបួស ២ នាក់តែម្ដង។
បន្ទាប់មកក្រុមជនបង្កបាននាំគ្នាបើកម៉ូតូឌុបគ្នាគេចចេញបាត់ទៅ។ ទោះជាបែបណាក៏ដោយ ក្នុងរយៈពេលប្រមាណ ៤ ម៉ោងក្រោយកើតហេតុ ក្រុមកម្លាំងកងរាជអាវុធហត្ថខណ្ឌជ្រោយចង្វារសហការជាមួយកម្លាំងកងរាជអាវុធហត្ថរាជធានីភ្នំពេញបានធ្វើការស្រាវជ្រាវ និងព័ទ្ធចាប់ក្រុមជនបង្កបាន ៣ នាក់ ដោយរឹបអូសវត្ថុតាងម៉ូតូ ២ គ្រឿង ដាវ ២ ដើម និង កាំបិតប៉័ងតោចំនួន ២ ដែលជាមធ្យោបាយនៃបទល្មើស៕