The Phnom Penh Post Search

Search form




Logo of Phnom Penh Post newspaper Phnom Penh Post - មនុស្ស​ ៣ ​នាក់​ត្រូវបាន​ចាប់ខ្លួន និង​បញ្ជូនទៅ​តុលាការ​ពាក់ព័ន្ធ​ការដឹកជញ្ជូន​គ្រឿងញៀន​ ៥ ​គីឡូក្រាម




មនុស្ស​ ៣ ​នាក់​ត្រូវបាន​ចាប់ខ្លួន និង​បញ្ជូនទៅ​តុលាការ​ពាក់ព័ន្ធ​ការដឹកជញ្ជូន​គ្រឿងញៀន​ ៥ ​គីឡូក្រាម

មនុស្ស​ ៣ ​នាក់​ត្រូវបាន​ចាប់ខ្លួន និង​បញ្ជូនទៅ​តុលាការ​ពាក់ព័ន្ធ​ការដឹកជញ្ជូន​គ្រឿងញៀន​ ៥ ​គីឡូក្រាម

បាត់ដំបងៈ ជនសង្ស័យ​ចំនួន​ ៣ ​នាក់​ក្នុង​ចំណោម​ ៤ ​នាក់​ត្រូវ​បាន​នគរបាល​ខេត្តបាត់ដំបង​បញ្ជូនទៅ​សាលាដំបូង​ខេត្ត​ពី​ម្សិលមិញ ពាក់ព័ន្ធ​ការដឹកជញ្ជូន​គ្រឿងញៀន​ប្រភេទ​ ICE (​ម៉ា​ទឹកកក​) ​ចំនួន​ ៥ ​គីឡូក្រាម បន្ទាប់ពី​ឃាត់ខ្លួន​កាលពី​ថ្ងៃទី​ ២៨ ខែធ្នូ ខណៈ​ពួកគេ​កំពុង​ដឹកជញ្ជូន​គ្រឿងញៀន​នៅ​ភូមិ​ព្រែកមហាទេព សង្កាត់​ស្វាយប៉ោ ក្រុង​/​ខេត្តបាត់ដំបង​។

លោក​ កុយ ហៀង ស្នងការរង​នគរបាល​ខេត្តបាត់ដំបង​ទទួល​ផែន​គ្រឿងញៀន​ថ្លែង​ពី​ម្សិលមិញ​ថា​ជនសង្ស័យ​ទាំង​ ៣ ​នាក់​ត្រូវ​បាន​នគរបាល​ខេត្ត​បាត់ដំបង បញ្ជូន​ទៅ​សាលាដំបូង​ខេត្ត​នៅ​ថ្ងៃទី​ ២៩ ធ្នូ បន្ទាប់ពី​បញ្ចប់​ការសាកសួរ​តាម​នីតិវិធី​ច្បាប់​ពាក់ព័ន្ធ​នឹង​គ្រឿងញៀន​ចំនួន​ ៥ ​គីឡូក្រាម​នោះ​។

លោក​ថា​៖ «​ប៉ុន្ដែ​ខ្ញុំ​មិនទាន់​ដឹងថា​តុលាការ​បាន​សម្រេច​ឃុំខ្លួន​ហើយ ឬ​នៅទេ​។ យើង​នៅ​បន្ត​ស្រាវជ្រាវ​រក​អ្នកពាក់ព័ន្ធ​ផ្សេងៗ​ទៀត ដើម្បី​យកមក​ផ្ដន្ទាទោស​តាមច្បាប់​»​។

លោក​បន្ថែមថា ជនសង្ស័យ​ទាំង​ ៣ ​នាក់​ក្នុងចំណោម​បក្ខពួក​ ៤ ​នាក់​ បាន​ដឹកជញ្ជូន​គ្រឿងញៀន​ឆ្លងដែន​ពី​ប្រទេស​ថៃ​ចូលមក​កម្ពុជា​តាម​ច្រកទ្វារ​អន្តរជាតិ​ប៉ោយប៉ែត ហើយ​បន្ត​មក​ខេត្ត​បាត់ដំបង ប៉ុន្ដែ​ត្រូវ​បាន​សមត្ថកិច្ច​ខេត្តបាត់ដំបង​ចាប់ខ្លួន និង​រឹបអូស​បាន​គ្រឿងញៀន​ប្រភេទ​ ICE (​ម៉ា​ទឹកកក​) ​ចំនួន​ ៥ ​គីឡូក្រាម ខណៈ​ពួកគេ​កំពុង​ជិះ​ម៉ូតូ​ដឹក​ដាក់​ក្នុង​ការុង​ធ្វើដំណើរ​តាម​ផ្លូវ​លេខ​ ១ មក​ដល់​ភូមិ​ព្រែក​មហាទេព​។

លោក​ ផាន់ រតនា អ្នកនាំពាក្យ​សាលា​ដំបូង​ខេត្តបាត់ដំបង​ពី​ម្សិលមិញ មិនអាច​ទាក់ទង​សុំ​ការបញ្ជាក់​ជុំវិញ​ករណី​នេះ​បានទេ ដោយ​ទូរស័ព្ទ​លោក​គ្មាន​អ្នកទទួល​។

តាម​របាយការណ៍​របស់​អគ្គស្នងការដ្ឋាន​នគរបាលជាតិ​ពី​ម្សិលមិញ គឺ​ក្រុម​ឈ្មួញ​គ្រឿងញៀន​ដែល​ត្រូវបាន​ឃាត់ខ្លួន​រួមមាន ឈ្មោះ​ ទូច សារុំ អាយុ​ ៥៩ ​ឆ្នាំ រស់នៅ​ភូមិ​ដើមជ្រៃ សង្កាត់​អូរស្មាច់ ក្រុង​សំរោង ខេត្ត​ឧត្តរមានជ័យ សន សារ៉ាត ហៅ​ ហើម អាយុ​ ៣៥ ​ឆ្នាំ​រស់នៅ​ភូមិ​កូវ ឃុំ​ក្រែក ស្រុក​ពញាក្រែក ខេត្ត​ត្បូងឃ្មុំ និង​ ហ៊ាង ហួយ អាយុ​ ៤៧ ​ឆ្នាំ​រស់នៅ​ភូមិ​អូរស្មាច់ សង្កាត់​អូរស្មាច់ ក្រុង​សំរោង ខេត្ត​ឧត្តរមានជ័យ​។ រីឯ​បក្ខពួក​ម្នាក់ទៀត​ជា​ស្ត្រី​ដែល​ធ្វើដំណើរ​ផ្សេងគ្នា​បានគេច​ខ្លួន​។

របាយការណ៍​បន្តថា ជនសង្ស័យ​បាន​សារភាព​ថា ពួកគេ​យក​ខេត្ត​បាត់ដំបង​ជា​គោលដៅ​ជួញដូរ​គ្រឿងញៀន​។ ប៉ុន្ដែ​ពេល​ចូលដល់​ក្រុង​បាត់ដំបង​ក៏ត្រូវ​បាន​សមត្ថកិច្ច​ស្ទាក់ចាប់​រួមទាំង​វត្ថុតាង​ទាំងអស់​។

បើតាម​សារព័ត៌មាន​ក្នុងស្រុក​មួយ​បាន​ដកស្រង់​សម្ដី​លោក​ សុខ និមល ប្រធានការិយាល័យ​ប្រឆាំង​បទល្មើស​គ្រឿងញៀន​នៃ​ស្នងការដ្ឋាន​នគរបាល​ខេត្តបាត់ដំបង​ពី​ម្សិលមិញ​ថា​គ្រឿងញៀន​ទាំងនេះ​មាន​ប្រភព​ដំបូង​នាំ​ចេញពី​ប្រទេស​ឡាវ​រួច​នាំ​ចូលទៅ​ប្រទេស​ថៃ និង​បាន​ចូល​បន្ត​មក​ប្រទេស​កម្ពុជា​។ បន្ទាប់ពី​ទទួល​បាន​របាយការណ៍​សម្ងាត់​កម្លាំង​ជំនាញ​កម្ពុជា​កំណត់​បាន​មុខសញ្ញា​ក្រុម​ឈ្មួញ​គ្រឿងញៀន​នេះ​ដែល​បាន​ដឹកជញ្ជូន​សំដៅ​មក​ខេត្ត​បាត់ដំបង​៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។