កណ្តាលៈ យ៉ាងហោចណាស់មានកម្មករ ២ នាក់ និងអ្នកបើកបររថយន្តដឹកដីម្នាក់បានស្លាប់ និងកម្មករចំនួន ៥០ នាក់ផ្សេងទៀតបានរងរបួសធ្ងន់ស្រាល ដោយសារគ្រោះថ្នាក់ចរាចរណ៍ដែលបង្កឡើងដោយរថយន្តដឹកដីបើកបុករថយន្តដឹកកម្មករនៅលើកំណាត់ផ្លូវជាតិលេខ ១ ក្នុងភូមិសាស្ត្រ ឃុំគគីរធំ ស្រុកកៀនស្វាយខេត្តកណ្តាលកាលពីល្ងាចថ្ងៃពុធ។
លោក សួន សម្បត្តិ នាយនគរបាលប៉ុស្តិ៍ឃុំគគីរធំបានប្រាប់ភ្នំពេញប៉ុស្តិ៍នៅព្រឹកថ្ងៃព្រហស្បតិ៍ថា ករណីគ្រោះថ្នាក់ចរាចរណ៍នេះបានបណ្ដាលឲ្យមនុស្សយ៉ាងតិច ៣ នាក់ស្លាប់នៅនឹងកន្លែង និង ៥០ នាក់ទៀត រងរបួសធ្ងន់ និងស្រាល។ អ្នករងរបួសត្រូវបានបញ្ជូនទៅកាន់មន្ទីរពេទ្យក្នុងរាជធានី-ភ្នំពេញ ដើម្បីពិនិត្យព្យាបាល។
បើតាមលោក សម្បត្តិ ជនរងគ្រោះដែលបានស្លាប់នៅក្នុងគ្រោះថ្នាក់ចរាចរណ៍នេះមានម្នាក់ជាអ្នកបើកបររថយន្តដឹកដី ឈ្មោះ ម៉ម ពេជ្រសារ៉ាត់ អាយុ ៣៨ ឆ្នាំមានលំនៅភូមិសំរោងក្អែរ ឃុំជ័យកំពក ស្រុកកៀនស្វាយ ខេត្តកណ្ដាល និង ២ នាក់ទៀតជាកម្មការិនីរោងចក្រកាត់ដេរក្នុងតំបន់សួនឧស្សាហកម្មឃុំសំរោងធំ ក្នុងស្រុកកៀនស្វាយ ខេត្តកណ្ដាលរួមមានឈ្មោះ លន់ចាន់ថា អាយុ ៣៤ ឆ្នាំជាកម្មការិនីនៅរោងចក្រ SKYLINE APPAREL CO., LTD និងម្នាក់ទៀតឈ្មោះ យ៉ែម វណ្ណា អាយុ ៣០ ឆ្នាំជាកម្មការិនីរោងចក្រកាត់ដេរសម្លៀកបំពាក់ Hong Xing។
លោក សម្បត្តិ បញ្ជាក់ថា៖ «យោងតាមលទ្ធផលនៃការចុះពិនិត្យ និងវាស់វែងភាពជាក់ស្ដែងនៅលើទីតាំងកើតហេតុរបស់មន្ត្រីនគរបាលជំនាញគ្រោះថ្នាក់ចរាចរណ៍ដ៏រន្ធត់នេះបង្កឡើងដោយអ្នកបើកបររថយន្តដឹកដីខ្វះការប្រុងប្រយ័ត្ន បើកបំពានចូលក្នុងគន្លងផ្លូវរបស់រថយន្តដឹកកម្មករ»។
លោកបន្តថា ក្រោយកើតហេតុនគរបាលជំនាញបានស្ទូចអូសយករថយន្តបង្ក (រថយន្តដឹកដី) និងរថយន្តដឹកកម្មករទៅរក្សាទុកជាបណ្ដោះអាសន្ននៅអធិការដ្ឋាននគរបាលស្រុកកៀនស្វាយ ដើម្បីរង់ចាំតំណាងភាគីទាំងសងខាងចូលដោះស្រាយទៅតាមនីតិវិធីច្បាប់ ខណៈសពជនរងគ្រោះត្រូវបានប្រគល់ជូនក្រុមគ្រួសារ និងសាច់ញាតិនាំយកទៅធ្វើបុណ្យតាមប្រពៃណី។
ជុំវិញករណីនេះ បុគ្គលិករដ្ឋបាលរោងចក្រកាត់ដេរសម្លៀកបំពាក់ SKYLINE APPAREL CO., LTD ម្នាក់ប្រាប់ភ្នំពេញ-ប៉ុស្តិ៍ក្នុងលក្ខខណ្ឌមិនបញ្ចេញឈ្មោះថា ក្នុងករណីគ្រោះថ្នាក់ចរាចរណ៍ខាងលើនេះ «បានបណ្ដាលឲ្យបាត់បង់ជីវិតកម្មការិនីដ៏ឆ្លាតវៃ និងសកម្មម្នាក់របស់រោងចក្រ និង ២៦ នាក់ផ្សេងទៀតរងរបួសប៉ះពាល់ដល់ខ្សែចង្វាក់ផលិតកម្មរបស់រោងចក្រ»។ បុគ្គលិករូបនោះ ក៏បានអំពាវនាវដល់អាជ្ញាធរពាក់ព័ន្ធជួយផ្ដល់យុត្តិធម៌ សម្រាប់កម្មករកម្មការិនីរងគ្រោះ ដោយធ្វើការស្រាវជ្រាវ និងស្វែងរកតំណាងភាគីក្រុមហ៊ុនឡានដឹកដី ដែលបង្កគ្រោះថ្នាក់ចរាចរណ៍នោះមកទទួលខុសត្រូវលើករណីនេះ។
លោក ស៊ុំ សោភ័ណ នាយករងបេឡាជាតិរបបសន្តិសុខសង្គម (ប.ស.ស) ប្រាប់ភ្នំពេញ ប៉ុស្តិ៍ថា នៅពេលនេះក្រុមការងាររបស់ ប.ស.ស កំពុងចុះសម្របសម្រួល អន្តរាគមន៍ចេញថ្លៃពិនិត្យព្យាបាលដល់កម្មករដែលរងរបួស និងចុះជួបសួរសុខទុក្ខ និងផ្ដល់ថវិកាមួយចំនួនដល់ក្រុមគ្រួសារកម្មការិនី ដែលស្លាប់ដោយគ្រោះថ្នាក់ចរាចរណ៍នេះ ដើម្បីរៀបចំពិធីបុណ្យសព៕