.jpg)
ឡានពេទ្យដឹកសាកសពចេញពីអគារខុនដូដែលបាក់រន្ទាស្លាប់កម្មករ ៣ នាក់។ រូបថត ហ៊ាន រង្សី
ភ្នំពេញៈ បុរស ៣ នាក់ បានស្លាប់កប់ក្នុងការដ្ឋានខុនដូកំពុងសាងសង់មួយកន្លែង បន្ទាប់ពីមានហេតុការណ៍បាក់រន្ទាកម្ពស់ ១៦ ជាន់ ធ្លាក់សង្កត់ជនរងគ្រោះទាំង ៣ នាក់ ដែលកំពុងធ្វើការថែមម៉ោងនៅក្នុងការដ្ឋាននេះកាលពីថ្ងៃសៅរ៍សប្តាហ៍មុន ប៉ុន្តែសាកសពជនរងគ្រោះទើបតែត្រូវបានប្រទះឃើញកាលពីយប់ថ្ងៃអាទិត្យ។
ជនរងគ្រោះទាំង ៣ នាក់ ត្រូវបានគេអះអាងថា ទី១ មានឈ្មោះ សុខ សម្បត្តិ អាយុ ២១ ឆ្នាំ ទី២ ឈ្មោះ យ៉ែម ទីន អាយុ ៣៥ ឆ្នាំ និងទី៣ ឈ្មោះ ធីម ធីរ៉ង អាយុ ៣១ ឆ្នាំ ពួកគេមានមុខរបរជាជាងជណ្ដើរយន្ត។
អ្នកស្រី ញឺ តាំងសួន ដែលត្រូវជាសាច់ញាតិជនរងគ្រោះឈ្មោះ សុខ សម្បត្តិ បានប្រាប់ភ្នំពេញប៉ុស្តិ៍ពីម្សិលមិញថា ក្រុមគ្រួសារបានឆោឡោរកជនរងគ្រោះ ដែលបានបាត់ខ្លួនតាំងពីម៉ោង ៨ កន្លះយប់ថ្ងៃសៅរ៍ បន្ទាប់ពីទូរស័ព្ទប្រាប់ភរិយាខ្លួនថា ធ្វើការថែមម៉ោងនៅការដ្ឋាន។ អ្នកស្រីបន្តថា ក្រោយមកជនរងគ្រោះក៏បានបាត់ដំណឹងរហូតទទួលបានព័ត៌មានថា ប្អូនរបស់អ្នកស្រីស្លាប់ និងរកសាកសពឃើញនៅយប់ថ្ងៃអាទិត្យនៅពេលមានកម្មករចូលធ្វើការវិញ។
អ្នកស្រីបន្ថែមថា ក្រោយរកឃើញក៏បានរាយការណ៍ទៅប៉ូលិស ប៉ុន្តែក្រោយពីពិនិត្យ និងសាកសួររួច ទើបយកសាកសពចេញពីឃ្លុបជណ្តើរយន្តនៅម៉ោងប្រមាណ ១០ ព្រឹកថ្ងៃចន្ទម្សិលមិញ។
អ្នកស្រីបញ្ជាក់ថា៖ «ពេលទៅមើលកន្លែងកើតហេតុបានឃើញ អ្នកខ្លះឃើញជើង អ្នកខ្លះឃើញដៃ ហើយប្អូនខ្ញុំដែលនៅកំពង់ធំហ្នឹងគឺឃើញក្បាលជង្គង់ ស្លៀកខោខៅប៊យ ហើយសង្ស័យ ព្រោះគេចំណាំបាន។ យើងមិនដឹងថាធ្លាក់យ៉ាងម៉េច ហើយមូលហេតុអ្វី ប៉ុន្តែគ្រាន់តែពេលហ្នឹងមានឃើញដែករន្ទា និងកម្ទេចកម្ទីក្ដារ សំណង់គ្រប់ប្រភេទគ្របពីលើ»។
អ្នកស្រីបន្តថា នៅពេលឃើញបែបនេះក៏បានរាយការណ៍ទៅអាជ្ញាធរ ហើយប៉ូលិសបានចុះមកកត់កំណត់ហេតុទាំងយប់ ប៉ុន្តែដោយសារតែសាច់ញាតិ និងការចរចាសំណងមិនត្រូវរ៉ូវគ្នា ទើបឈានដល់ព្រឹកថ្ងៃចន្ទ ទើបបានកាយយកសាកសពជនរងគ្រោះចេញ។
ចំណែកលោកស្រី យ៉ែម យ៉ន ដែលត្រូវជាបងស្រីបង្កើតជនរងគ្រោះឈ្មោះ យ៉ែម ទីន បានអះអាងដែរថា ក្រោយជួបហេតុការណ៍នេះក្រុមគ្រួសារនៃជនរងគ្រោះនីមួយៗទទួលបានប្រាក់សំណងចំនួន ៣ ពាន់ដុល្លារ ដែលសំណងជាទឹកប្រាក់នេះ អ្នកស្រីក៏មិនដឹងថាទទួលបានពីក្រុមហ៊ុនម៉ៅការសំណង់ ឬពីក្រុមហ៊ុនខុនដូនោះទេ។ អ្នកស្រីអះអាងថា ទឹកប្រាក់ទាំងនេះមិនអាចទ្រទ្រង់គ្រួសារប្អូនរបស់ខ្លួនឲ្យល្អប្រសើរទេ ព្រោះរូបគេមានកូននៅក្នុងបន្ទុកដល់ទៅ ២ នាក់។
អ្នកស្រីបញ្ជាក់ថា៖ «មេគេមិនដឹងខាងណាទេ គេផ្តល់ឲ្យប្រហែលជា ៣ ពាន់ដុល្លារ។ ចំពោះខ្ញុំ ខ្ញុំមិនគិតថា ច្រើនទេ គឺតិចណាស់ ប៉ុន្តែមនុស្សយើងដល់ថ្នាក់ស្លាប់ដល់ទៅ ៣ ថ្ងៃហើយ យើងទុកអត់បាន យើងទុកតទៅទៀតគឺអត់កើត។ ប្អូនខ្ញុំមានកូនដល់ទៅ ២ ហើយកូនក្រោយទើបតែមានអាយុបាន ១ ខួប ដែលចង់បានសំណងបន្ថែមទៀត ដើម្បីជួយកូនៗគ្នា»។
បើតាមការអះអាងរបស់ក្រុមគ្រួសារនៃជនរងគ្រោះបានឱ្យដឹងថា ការដ្ឋានខុនដូកំពុងសាងសង់នេះមានម្ចាស់ជាជនជាតិខ្មែរ ប៉ុន្តែមិនដឹងមានឈ្មោះអ្វី ឬជារបស់អ្នកណានោះទេ គឺស្ថិតតាមបណ្ដោយផ្លូវ ៦៥ ត្រង់ចំណុចខាងកើតសណ្ឋាគារហូលីដេក្នុងសង្កាត់ស្រះចក ខណ្ឌដូនពេញ និងមានកម្ពស់ ១៦ ជាន់។
លោក សុខ ពេញវុធ អភិបាលខណ្ឌដូនពេញលោក ឆាយ ធិរិទ្ធ ចៅសង្កាត់រងទី ២ សង្កាត់ស្រះចក លោក ហួត ចាន់យ៉ារ៉ាន់ អធិការនគរបាលខណ្ឌដូនពេញ និងលោក កាន់ វណ្ណៈ នាយប៉ុស្តិ៍នគរបាលសង្កាត់ស្រះចកមិនអាចសុំការបញ្ជាក់អំពីឧបទ្ទវហេតុនេះបានទេកាលពីម្សិលមិញ។ អ្នកខ្លះអះអាងថាចុះខេត្ត ចំណែកអ្នកខ្លះឆ្លើយថាមិនដឹង និងអ្នកខ្លះទៀតអះអាងថាមិនបានចុះទៅកន្លែងកើតហេតុមិនអាចនិយាយបាន។
លោក ស ម៉ូរ៉ា ប្រធានសហជីពចំណីអាហារ និងសេវាកម្មកម្ពុជាថ្លែងថា ជនរងគ្រោះគួរតែទទួលបានសំណងស្របទៅតាមច្បាប់កំណត់ ហើយក្នុងករណីដែលរកឃើញថា ឧបទ្ទវហេតុបង្កឡើងដោយសារការធ្វេសប្រហែស ឬរកឃើញថាការដ្ឋានសាងសង់នេះមិនបានគោរពតាមច្បាប់ ឬតាមស្តង់ដាសុវត្ថិភាព និងបច្ចេកទេសនោះទេ ក្រុមហ៊ុនត្រូវតែទទួលខុសត្រូវចំពោះមុខច្បាប់ព្រហ្មទណ្ឌ។
លោក ម៉ូរ៉ា បានបញ្ជាក់ថា៖ «ក្នុងច្បាប់របស់យើង បើនិយាយពីច្បាប់ការងារមិនបង្ហាញពាក់ព័ន្ធនឹងករណីទោសព្រហ្មទណ្ឌទេ ប៉ុន្តែបើច្បាប់ក្នុងក្រមព្រហ្មទណ្ឌអាចចង្អុលបង្ហាញពាក់ព័ន្ធនឹងការធ្វេសប្រហែស និងពាក់ព័ន្ធអ្វីផ្សេងៗរបស់អ្នកគ្រប់គ្រង ដោយចាត់ទុកថាអំពើមនុស្សឃាតដោយអចេតនាអីហ្នឹង ក៏នាំឲ្យមានទោសដែរ»។
ទោះយ៉ាងណាលោក ស ម៉ូរ៉ា មិនអាចសន្និដ្ឋានបានទេ ថាតើអ្នកគ្រប់គ្រងការដ្ឋានសាងសង់នេះអាចជាប់ចោទពីបទល្មើសព្រហ្មទណ្ឌដែរឬអត់នោះទេ ព្រោះវាអាស្រ័យទៅលើការស៊ើបអង្កេតរបស់អាជ្ញាធរមានសមត្ថកិច្ច។ លោកអះអាងថា បើសមត្ថកិច្ចរកមិនឃើញកំហុស ហើយនេះជាឧបទ្ទវហេតុដោយចៃដន្យ អ្នកគ្រប់គ្រងការដ្ឋាននេះនឹងមិនទទួលខុសត្រូវព្រហ្មទណ្ឌឡើយ៕
