.jpg)
ជនសង្ស័យនាំមនុស្សឆ្លងដែនទៅថៃខុសច្បាប់។ រូបថត FN
បន្ទាយមានជ័យៈ សមត្ថកិច្ចខេត្តបន្ទាយមានជ័យបានឃាត់ខ្លួនជនសង្ស័យចំនួន ៣ នាក់ បញ្ជូនទៅតុលាការ បន្ទាប់ពីពួកគេបាននាំពលករចំនួន ១៤ នាក់ ឆ្លងដែនទៅប្រទេសថៃដោយខុសច្បាប់នៅក្នុងភូមិសាស្ត្រស្រុកម៉ាឡៃកាលពីយប់ថ្ងៃទី ១៥ មីនា ២០២១ ខណៈស្នងការនគរបាលខេត្ត ព្រមានចាត់វិធានការលើករណីនាំមនុស្សឆ្លងដែនយ៉ាងម៉ឺងម៉ាត់។
លោក សិទ្ធ ឡោះ ស្នងការនគរបាលខេត្តបន្ទាយមានជ័យបានប្រាប់ភ្នំពេញប៉ុស្តិ៍កាលពីម្សិលមិញថា ប្រតិបត្តិការនេះបានធ្វើឡើងរួមគ្នាដោយកម្លាំងនគរបាលវរសេនាតូចការពារព្រំដែនគោកលេខ ៨១៥ សហការជាមួយមន្ត្រីជំនាញនាយកដ្ឋានសន្តិសុខផ្ទៃក្នុងកម្លាំងអធិការដ្ឋាននគរបាលស្រុកម៉ាឡៃ និងកងរាជអាវុធហត្ថស្រុកម៉ាឡៃ។
លោកបញ្ជាក់ថា ក្រោយការចាប់ខ្លួន ជនសង្ស័យទាំង ៣ នាក់សមត្ថកិច្ចបានកសាងសំណុំរឿងដោយចោទប្រកាន់ពីបទជួញដូរមនុស្សខុសច្បាប់ ហើយបញ្ជូនទៅតុលាការ ដើម្បីមាននីតិវិធីតាមផ្លូវច្បាប់បន្ត ខណៈមន្ត្រីជំនាញបានស្រាវជ្រាវនៃអំពើជួញដូរមនុស្សឆ្លងដែននេះជាយូរមកហើយក្នុងអំឡុងពេលកម្ពុជាកំពុងមានការរីករាលដាលនៃជំងឺកូវីដ ១៩។
លោកបន្ថែមថា៖ «មុននឹងយើងចាប់គាត់ ដោយសារតែគាត់ប្រព្រឹត្តនូវអំពើជួញដូរមនុស្ស ដោយនាំមនុស្សឆ្លងដែនខុសច្បាប់នៅតាមច្រករបៀង ដែលជាកន្លែងដែលយើងបានឃាត់ខ្លួនគាត់។ គាត់ចេះតែបំពានការហាមឃាត់នេះយើងត្រូវតែអនុវត្តច្បាប់»។
លោក សិទ្ធ ឡោះ បានអះអាងថា សមត្ថកិច្ចនៅតែបន្តរឹតបន្តឹងលើកិច្ចការងារ ការពារ និងបង្ក្រាបមេខ្លោងជួញដូរមនុស្សឆ្លងដែនខុសច្បាប់បន្តទៀត ដោយការដាក់ពង្រាយកម្លាំងឈរជើងនៅតាមបណ្តាច្រកព្រំដែន ដើម្បីទប់ស្កាត់ការឆ្លងដែនខុសច្បាប់នេះ។
ជនសង្ស័យទាំង ៣ នាក់ដែលត្រូវបានសមត្ថកិច្ចឃាត់ខ្លួនមានឈ្មោះ ចក់ វី ហៅ ០៩ ភេទប្រុស អាយុ ៤១ ឆ្នាំ រស់នៅ ភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ ជាមេខ្លោង ឈ្មោះ យ៉ាត ប៊ុននី ភេទប្រុស អាយុ ៣៨ ឆ្នាំ រស់នៅភូមិត្រពាំងជរ ឃុំចំណារលើ ស្រុកស្ទោង ខេត្តកំពង់ធំ និងឈ្មោះ អោម ចាន់រ៉ា អាយុ ៦៣ ឆ្នាំ ដែលត្រូវជាម្ចាស់ផ្ទះសំណាក់ ម៉ី ម៉ី។
លោក បេន សំអាត អធិការនគរបាលស្រុកម៉ាឡៃបានប្រាប់កាសែតក្នុងស្រុកថា មេខ្យល់ទាំង ២ នាក់ បាននាំពលករប្រុស-ស្រីចំនួន ១៤ នាក់ យកមកលាក់ខ្លួននៅក្នុងផ្ទះសំណាក់ ម៉ី ម៉ី ស្ថិតនៅភូមិដូង ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ដើម្បីត្រៀមលួចឆ្លងដែនខុសច្បាប់ទៅប្រទេសថៃនៅយប់ថ្ងៃទី ១៥ ខែ មីនា ឆ្នាំ ២០២១។ ចំពោះឈ្មោះ អោម ចាន់រ៉ា ភេទប្រុស អាយុ ៦៣ ឆ្នាំ ជាម្ចាស់ផ្ទះសំណាក់ ម៉ី ម៉ី មិនសហការជាមួយសមត្ថកិច្ចដែលបានផ្តល់ទីតាំងឱ្យមេខ្យល់លាក់ពលករ។
លោក ស៊ុំ ចាន់គា អ្នកសម្របសម្រួលសមាគមអាដហុកប្រចាំខេត្តបន្ទាយមានជ័យ និយាយថា ការដែលសមត្ថកិច្ចចាប់ផ្តើមមានចំណាត់ការលើក្រុមជនមេខ្យល់នាំពលករឆ្លងដែនខុសច្បាប់នេះ ក៏ព្រោះពួកគេមានការភ័យពីការអស់តំណែងបន្ទាប់ពីមានបទបញ្ជាពីលោកនាយករដ្ឋមន្ត្រី ខណៈមន្ត្រីព្រំដែនចំនួន ២ រូប ក៏ត្រូវបានអស់តំណែងរួចមកហើយ។
លោកយល់ថា បើសមត្ថកិច្ចពិតជាបង្ក្រាបក្រុមជនមេខ្យល់ ពិតប្រាកដមែន នោះពួកគេនឹងអាចធ្វើបាន ព្រោះក្រុមទាំងអស់នេះអាចនាំមនុស្សឆ្លងដែនខុសច្បាប់ ក៏ព្រោះតែមានការបើកដៃពីមន្ត្រីខិលខូចនៅតាមព្រំដែនផងដែរ។
លោកបញ្ជាក់ថា៖ «ទាក់ទងនឹងស្ថានភាពនៃការនាំមនុស្សឆ្លងដែននេះ គឺមានការថយចុះ ប៉ុន្តែមិនមែនបណ្តាលមកពីកត្តាដែលសមត្ថកិច្ចមានវិធានការចាប់ក្រុមមេខ្យល់នោះទេ ព្រោះចាប់ ១ ដោះលែង ១ ០០០ ទៅវិញ។ វាថយចុះ នៅតាមព្រំដែននៅក្នុងសម័យកូវីដ១៩នេះ ដែលមានការបិទច្រកព្រំដែន ហើយថៃមានការរឹតបន្តឹងការចូលក្នុងប្រទេសរបស់គេ»។
គិតចាប់ពីថ្ងៃទី ១៣ ខែកុម្ភៈ មកដល់ថ្ងៃទី ២៣ ខែ កុម្ភៈ ឆ្នាំ ២០២១ អាជ្ញាធរតាមព្រំដែនបានចាប់ខ្លួនមេខ្យល់នាំពលករឆ្លងដែនខុសច្បាប់ បានចំនួន ៨៥ នាក់ ក្នុងនោះពីវៀតណាមមានជាង ១០ នាក់។ នេះបើតាមតួលេខពីអគ្គស្នងការដ្ឋាននគរបាលជាតិ៕
