ព្រៃវែងៈ លោក យី ធឿន នាយនគរបាលប៉ុស្តិ៍ឃុំបឹងព្រះប្រាប់ភ្នំពេញប៉ុស្តិ៍កាលពីម្សិលមិញថា នគរបាលបានចាប់ខ្លួនមនុស្ស ៣ នាក់ ក្នុងថ្ងៃបន្តបន្ទាប់គ្នាពាក់ព័ន្ធជាមួយនឹងការសង្ស័យក្នុងការស្លាប់នារីម្នាក់ក្នុងទឹកប្រឡាយ កាលពីថ្ងៃទី ១៩ សីហា នៅភូមិ ស្វាយតានី ឃុំ បឹងព្រះ ស្រុកបាភ្នំ ខេត្តព្រៃវែង។
លោក ធឿន ថ្លែងថា៖ «តាមខ្ញុំសាកសួរជនដៃដល់ថា រូបគេមិនបានចាប់នារីរងគ្រោះរំលោភទេតែនាងលង់ទឹកស្លាប់ខ្លួនឯង។ ប៉ុន្តែខ្ញុំថា នារីរងគ្រោះមិនអាចលង់ទឹកស្លាប់ដោយគ្មានមូលហេតុទេ ថ្វីដ្បិតតែជនដៃដល់មិនព្រមឆ្លើយសារភាពយ៉ាងណាក៏ដោយ ក៏តាមរយៈការស្លាប់របស់ជនរងគ្រោះបង្ហាញថា អាចជាករណីឃាតកម្មយ៉ាងពិតប្រាកដហើយក៏បានសរសេរក្នុងកំណត់ហេតុពាក់ព័ន្ធនឹងអំពើឃាតកម្មដែរ»។
លោក ធឿន បានឲ្យដឹងថា ជនសង្ស័យ ឈ្មោះ គីម រ័ត្ន ហៅ ឆ្អឹង អាយុ ២០ ឆ្នាំ (ជនដៃដល់), ហ៊ន ឡុង និងទី ៣ ឈ្មោះ បញ្ញា (អ្នករួមដំណើរ)៕