.jpg)
ជនប្រុសស្រីទាំង ៣ នាក់ ត្រូវបានឃុំជាបណ្ដោះអាសន្នក្នុងពន្ធនាគារ ក្រោយចាប់ខ្លួនរឿងបំពានច្បាប់ប្រឆាំងជំងឺកូវីដ ១៩។ រូបថត ប៉ូលិស
ភ្នំពេញ៖ មនុស្ស ៣ នាក់ ត្រូវបានចាប់ខ្លួន និងបញ្ជូនទៅឃុំជាបណ្ដោះអាសន្ននៅក្នុងពន្ធនាគារខេត្តកណ្ដាល ក្រោយពីពួកគេបានបើកបររថយន្តក្នុងភាពស្រវឹង បំពានច្បាប់ ក្នុងកាលៈទេសៈដែលរាជរដ្ឋាភិបាលប្រកាសបិទខ្ទប់រាជធានីភ្នំពេញ និងក្រុងតាខ្មៅ នៃខេត្តកណ្ដាល ដើម្បីប្រឆាំងការរីករាលដាលជំងឺកូវីដ ១៩។
លោក ឡាក់ ម៉េងធី ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលឱ្យដឹងនៅថ្ងៃទី ២៦ មេសាថា ជនសង្ស័យឈ្មោះ គឹម ពិសិដ្ឋ អាយុ ៣៣ ឆ្នាំ ជាយោធាបម្រើការនៅនាយកដ្ឋានវិស្វកម្ម, ទី២-ឈ្មោះ សាត សុម៉ាលី ភេទស្រី អាយុ ៤២ ឆ្នាំ និង ទី៣-ឈ្មោះ ណី ប៊ុនធឿន ជាគ្រូចិនសែ ត្រូវបានចាប់ខ្លួនកាលពីថ្ងៃទី ២៤ ខែមេសា នៅមហាវិថីសម្តេចហ៊ុនសែន (ផ្លូវ ៦០ ម៉ែត្រ) នៅភូមិសាស្រ្តសង្កាត់ ព្រែកហូរ ក្រុងតាខ្មៅ ខេត្តកណ្តាល ហើយត្រូវបានចៅក្រមស៊ើបសួរចេញដីកាឃុំខ្លួននៅពន្ធនាគារខេត្តកណ្តាលនៅយប់ថ្ងៃទី ២៥ ខែមេសា។
លោកថ្លែងថា៖ «ពួកគេត្រូវបានចោទតាមមាត្រា ១១ អនុវត្តតាមច្បាប់ស្តីពីការទប់ស្កាត់ការរីករាលដាលជំងឺកូវីដ»។
យោងតាមមាត្រា ១១ នៃច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវដទៃទៀត។ បើពួកគេត្រូវបានតុលាការរកឃើញថា ពិតជាបានប្រព្រឹត្តមែននោះ នឹងត្រូវជាប់ពន្ធនាគារពី ៦ ខែ ទៅ ៣ ឆ្នាំ និងពិន័យប្រាក់ពី ២ លាន ទៅ ១០ លានរៀល៕
