.jpg)
បុរស ៣ នាក់ ត្រូវបានឃាត់ខ្លួនករណីទន្រ្ទានដីព្រៃនៅខេត្តមណ្ឌលគិរី។ រូបថត ក្រសួងបរិស្ថាន
បុរស ៣ នាក់ ត្រូវបានចៅក្រមស៊ើបសួរនៃសាលាដំបូងខេត្តមណ្ឌលគិរី សម្រេចឃុំខ្លួនជាបណ្ដោះអាសន្ន ដោយចោទប្រកាន់ពីបទកាប់ទន្រ្ទានដីព្រៃក្នុងតំបន់ដែនជម្រកកែវសីម៉ា ដើម្បីធ្វើជាកម្មសិទ្ធិឯកជនតាមមាត្រា ៦២ និងមាត្រា ៥៦ នៃច្បាប់ស្ដីពីតំបន់ការពារធម្មជាតិ។
លោក ព្រំ វិបុលរតនៈ ប្រធានដែនជម្រកសត្វព្រៃកែវសីមា បានប្រាប់ ភ្នំពេញ ប៉ុស្តិ៍ នៅថ្ងៃចន្ទថា ជនសង្ស័យឈ្មោះ ឆោម វិជ្ជា អាយុ ២៦ ឆ្នាំ មានទីលំនៅ ភូមិប៉ោដើមចេក ឃុំក្រញ៉ូងសែនជ័យ ស្រុកស្នួល ខេត្តក្រចេះ និងប្អូនប្រុសរបស់គាត់ឈ្មោះ ឆោម វាសនា អាយុ ២២ ឆ្នាំ ព្រមទាំងអ្នកជិតខាងរបស់គាត់ម្នាក់ទៀត ឈ្មោះ ឈិត សំអាត អាយុ ៤៤ ឆ្នាំ។ ជនទាំង ៣ ត្រូវបានមន្ត្រីឧទ្យានុរក្ស ដែនជម្រកសត្វព្រៃកែវសីម៉ា ចាប់ឃាត់ខ្លួនកាលពីយប់ថ្ងៃទី ១២ ខែ មីនា ឆ្នាំ ២០២១ ខណៈកំពុងធ្វើសកម្មភាពកាប់រុករានដីព្រៃ ក្នុងតំបន់ដែនជម្រាកសត្វព្រៃកែវសីម៉ា។
លោក វិបុលរតនៈ បានថ្លែងថា៖ «ជនសង្ស័យទាំង ៣ ត្រូវបានចាប់ខ្លួនក្នុងបទល្មើសជាក់ស្ដែង។ ក្រុមជនសង្ស័យត្រូវបានមន្ត្រីជំនាញយើងកសាងសំណុំរឿងបញ្ជូនទៅតុលាការ ដោយចោទប្រកាន់ក្នុងបទល្មើសធនធានធម្មជាតិថ្នាក់ទី៤ តាមបញ្ញតិមាត្រាទី៥៦ និងមាត្រា ៦២ នៃច្បាប់ការពារតំបន់ធម្មជាតិ»។
បើតាមលោក វិបុលរតនៈ ក្រុមជនសង្ស័យទាំង ៣ ត្រូវបានតុលាការខេត្តមណ្ឌលគិរី សម្រេចឲ្យនាំយកទៅឃុំខ្លួនជាបណ្ដោះអាសន្ននៅពន្ធនាគារខេត្តមណ្ឌលគិរី កាលពីរសៀលថ្ងៃទី ១៤ ខែ មីនា ឆ្នាំ ២០២១។ ពួកគេត្រូវបានចោទប្រកាន់ពីបទកាប់ទន្ទ្រានដីព្រៃក្នុងតំបន់ការពារនិងអភិរក្ស ដែនជម្រកសត្វព្រៃកែវសីម៉ា តាមបញ្ញត្តិមាត្រា ៥៦ និងមាត្រា ៦២ នៃច្បាប់ការពារធនធានធម្មជាតិ បន្ទាប់ពីជនសង្ស័យទាំង ៣ បានសារភាពថាពួកគេបានធ្វើសកម្មភាពកាប់និងដុតបំផ្លាញព្រៃឈើក្នុងតំបន់ខាងលើនេះ អស់ប្រមាណ ៤ ហិកតា ដើម្បីពង្រីកផ្ទៃដីកសិកម្មរបស់ខ្លួន។
លោកបន្តថា យោងតាមបញ្ញតិ្តមាត្រា ៥៦ និង ៦២ នៃច្បាប់ស្ដីពីតំបន់ការពារធម្មជាតិ ជនសង្ស័យទាំង ៣ នឹងត្រូវប្រឈមការផ្តន្ទាទោសជាប់ពន្ធនាគារពី ៥ ឆ្នាំ ទៅ ១០ ឆ្នាំ ឬទោសពិន័យជាប្រាក់ពី ១៥ លានរៀល ទៅ ១៥០ លានរៀល។ បច្ចុប្បន្នជនសង្ស័យទាំង ៣ កំពុងត្រូវបានឃុំខ្លួន នៅពន្ធនាគារខេត្តមណ្ដលគិរី ដើម្បីរង់ចាំការជំនុំជំរះអង្គសេចក្ដីនៅពេលក្រោយ។
លោក វិបុលរតនៈ ក៏បានឲ្យដឹងផងដែរថា ថ្វីបើប្រទេសកម្ពុជា កំពុងប្រឈមចំពោះការរីករាលដាលនៃជំងឺឆ្លងកូវិដ ១៩ ប៉ុន្តែមន្ត្រីឧទ្យានុរក្សនៃក្រសួងបរិស្ថាន នៅតែសកម្មភាពក្នុងការចុះល្បាតការពារនិងទប់ស្កាត់បទល្មើសធនធានធម្មជាតិនិងសត្វព្រៃជាប្រចាំ។ មន្ត្រីឧទ្យានុរក្សបានបង្ក្រាបចាប់ឃាត់ខ្លួនជនប្រព្រឹត្តបទល្មើស និងកសាងសំណុំរឿងបញ្ជូនទៅតុលាការ ជាបន្តបន្ទាប់ដើម្បីចាត់វិធានការតាមនីតិវិធីច្បាប់៕
