.jpg)
ជនសង្ស័យចំនួន ៤ នាក់ត្រូវបានចាប់ខ្លួនពាក់ព័ន្ធរឿងជួញដូរមនុស្សហើយនគរបាលយកមកបង្ហាញមុខនៅនាយកដ្ឋាន។ រូបថត នគរបាល
ភ្នំពេញៈ ស្ត្រីម្នាក់ដែលជាមេខ្លោងរួមជាមួយអ្នកសមគំនិត ៣ នាក់ផ្សេងទៀតត្រូវបានចាប់ខ្លួន និងបញ្ជូនទៅសាលាដំបូងរាជធានីភ្នំពេញកាលពីម្សិលមិញពីបទជួញដូរស្ត្រីខ្មែរចំនួន ៣០ នាក់ឱ្យទៅរៀបការជាមួយបុរសជនជាតិចិនដោយខុសច្បាប់។
ប្រតិបត្តិការបង្ក្រាបនេះត្រូវបានធ្វើឡើងកាលពីថ្ងៃព្រហស្បតិ៍កន្លងទៅនៅខណ្ឌទួលគោក រាជធានីភ្នំពេញដោយកម្លាំងសមត្ថកិច្ចរបស់នាយកដ្ឋានប្រឆាំងការជួញដូរមនុស្ស និងការពារអនីតិជននៃអគ្គស្នងការដ្ឋាននគរបាលជាតិ សហការជាមួយអាជ្ញាធររាជធានីភ្នំពេញ និងសាលាដំបូងរាជធានីភ្នំពេញ បន្ទាប់ពីពួកគេបានធ្វើការស៊ើបអង្កេតលើករណីនេះរួចមក។
អគ្គស្នងការនគរបាលជាតិបានកំណត់អត្តសញ្ញាណជនសង្ស័យទាំង ៤ នាក់នោះរួមមានឈ្មោះ ស៊ូ សុភាព ភេទស្រី អាយុ ៣៧ ឆ្នាំជាមេខ្លោង និងអ្នកសមគំនិត ៣ នាក់ផ្សេងទៀតរួមមានឈ្មោះ ឃួន សារ៉ាវុធ អាយុ ៤៨ ឆ្នាំ ឈ្មោះ សុខ សុទ្ធារក្ស អាយុ ៣៤ ឆ្នាំ និងឈ្មោះ ផល ផា អាយុ ៣៤ ឆ្នាំ។
លោក កែវ ធា ប្រធានការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញបានបដិសេធធ្វើអត្ថាធិប្បាយដោយលោកបានបង្វែរសំណួរទៅនាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ។
ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃលោក ប៉ុល ភិធេយ្យ មិនអាចទាក់ទងដើម្បីសុំការបំភ្លឺបានទេ។
ចំណែកឯលោក ហ៊ុន សុធី អធិការខណ្ឌទួលគោក និងលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញក៏មិនអាចទាក់ទងសុំការបំភ្លឺបានដែរ។
យោងតាមអគ្គស្នងការនគរបាលជាតិបានឱ្យដឹងថាជនសង្ស័យបានធ្វើសកម្មភាពលួងលោម និងជ្រើសរើសនារីខ្មែរចំនួន ៣០ នាក់មកពីកន្លែងផ្សេងៗគ្នាក្នុងប្រទេសកម្ពុជាដើម្បីនាំទៅប្រទេសចិនជាកន្លែងដែលពួកគេត្រូវរៀបការជាមួយបុរសជនជាតិចិនចាប់ពីឆ្នាំ ២០១៤ ដល់ខែឧសភាឆ្នាំ ២០១៨។ ក្នុងស្ត្រីម្នាក់ត្រូវបានគេផ្តល់ប្រាក់ឲ្យចន្លោះពី ៥០០០ ទៅ ១០០០០ ដុល្លារ។
ក្នុងប្រតិបត្តិការនោះប៉ូលិសបានរឹបអូសរថយន្តចំនួន ២ គ្រឿងទូរស័ព្ទដៃចំនួន ៨ គ្រឿង និងប្រាក់ចំនួន ៩៥០០ ដុល្លារពីជនសង្ស័យទាំងនោះ។
យោងតាមគេហទំព័ររបស់អគ្គស្នងការដ្ឋាននគរបាលជាតិបានឲ្យដឹងថា៖ «អគ្គស្នងការដ្ឋាននគរបាលជាតិបានបង្ក្រាបមេខ្យល់ដែលបានធ្វើសកម្មភាពនាំនារីខ្មែរ ៣០ នាក់យកទៅលក់»។
ជនសង្ស័យទាំង ៤ នាក់ និងភ័ស្តុតាងត្រូវបានបញ្ជូនទៅសាលាដំបូងរាជធានីភ្នំពេញកាលពីម្សិលមិញ។
លោក អាន ភិន មន្ត្រីឃ្លាំមើលសិទិ្ធមនុស្សរបស់អង្គការសិទ្ធិមនុស្សអាដហុក ប្រចាំខេត្តកំពង់ស្ពឺបានថ្លែងថារហូតមកដល់ពេលនេះអង្គការអាដហុកបានទទួលពាក្យបណ្តឹងចំនួន ៥ ពីគ្រួសារជនរងគ្រោះបន្ទាប់ពីកូនស្រីរបស់ពួកគេត្រូវបានគេបោកប្រាស់ថា ឲ្យទៅធ្វើការនៅប្រទេសចិន។
លោកបានបញ្ជាក់ថាមេខ្លោងបានប្រកាសជ្រើសរើសស្ត្រីខ្មែរឱ្យទៅធ្វើការនៅក្នុងក្រុមហ៊ុននៅឯប្រទេសចិនដោយសន្យាទទួលបានប្រាក់ខែខ្ពស់ចាប់ពី ១០០០ ទៅ ១៥០០ ដុល្លារក្នុង ១ ខែ ប៉ុន្តែនៅពេលដែលពួកគេទៅដល់ប្រទេសចិនពួកគេត្រូវបានបង្ខំឱ្យរៀបការ។
លោកបន្តថា៖ «បន្ទាប់ពីរៀបការជាមួយប្តីទី ១ ហើយពួកគេមួយចំនួនត្រូវបានគេលក់បន្តឱ្យទៅរៀបការជាមួយបុរសជនជាតិចិនផ្សេងទៀតក្នុងតម្លៃចន្លោះពី ១៥០០០ ទៅ ២០០០០ ដុល្លារ»។
លោក ភិន ស្វាគមន៍ចំពោះការបង្ក្រាបនេះហើយលោកបានអំពាវនាវឱ្យតុលាការចាត់វិធានការផ្លូវច្បាប់ប្រឆាំងនឹងជនសង្ស័យទាំងនោះ និងស្វែងរកឲ្យមានការផ្តល់សំណងដល់ជនរងគ្រោះ ឬក្រុមគ្រួសាររបស់ពួកគេ៕ NS
