បន្ទាយមានជ័យៈ មន្ត្រីនគរបាលខេត្តបន្ទាយមានជ័យបានឲ្យដឹងកាលពីម្សិលមិញថា បុរស ៤ នាក់បានស្លាប់ និង ១២ នាក់ទៀតមានអាការឈឺក្បាល វិលមុខ ថប់ដង្ហើម និងក្អួតចង្អោរ សង្ស័យករណីពុលស្រា។
លោក ឈឿន ក្រៃយ៉ុង នាយករដ្ឋបាលសាលាខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា កាលពីល្ងាចថ្ងៃអង្គារមានករណីកម្មករសំណង់ ១៦ នាក់នៅក្នុងស្រុក-ក្រុងចំនួន ៣ គឺ ស្រុកម៉ាឡៃ, មង្គលបុរី និងក្រុងប៉ោយប៉ែតបាននាំគ្នាទិញស្រាថ្នាំចិនសែ យីហោ «តាំងកួយ» មកផឹក។ ក្រោយពីផឹកស្រានោះរួច ពួកគេទាំង ១៦ នាក់ក៏មានអាការឈឺក្បាល វិលមុខ ថប់ដង្ហើម និងក្អួតចង្អោរ រហូតដល់សន្លប់បាត់ស្មារតី សង្ស័យជាករណី «ពុលស្រា»។
លោក ក្រៃយ៉ុង បានបញ្ជាក់ថា៖ «ដោយសារអាការពុលខ្លាំងពេកមនុស្ស ៤ នាក់ក្នុងចំណោម ១៦ នាក់ ដែលបានទទួលទានស្រាថ្នាំចិនសែនោះបានស្លាប់ និង ១២ នាក់ទៀត កំពុងស្ថិតក្រោមការពិនិត្យព្យាបាលពីក្រុមគ្រូពេទ្យជំនាញនៃមន្ទីរពេទ្យ មិត្តភាពកម្ពុជា-ជប៉ុនមង្គលបុរី និងមន្ទីរពេទ្យបង្អែកក្រុងប៉ោយប៉ែត»។
លោក ក្រៃយ៉ុង បានឲ្យដឹងទៀតថា ជនរងគ្រោះដែលបានស្លាប់ក្នុងករណីនេះរួមមានឈ្មោះ ឃ្លាំង ចិត្រា អាយុ ២៨ ឆ្នាំ មានលំនៅភូមិចំណោមកើត ឃុំចំណោម ស្រុកមង្គលបុរី, ម៉ៃ គង់ អាយុ ៣៦ ឆ្នាំ មានលំនៅភូមិអូរអណ្ដូងកើត ឃុំបន្ទាយនាង ស្រុកមង្គលបុរី, នេត្រ ប្រុស អាយុ ២២ ឆ្នាំ មានលំនៅភូមិភ្នំរូង ឃុំបឹងបេង ស្រុកម៉ាឡៃ និងឈ្មោះ ឆន ឈឿន អាយុ ៣២ ឆ្នាំ មានលំនៅភូមិ-ឃុំអូរសំព័រ ស្រុកម៉ាឡៃ។
ថ្វីបើជនរងគ្រោះភាគច្រើនដែលទទួលបានការជួយសង្គ្រោះព្យាបាលទាន់ពេលវេលា ក្រោយពីពួកគេផឹកស្រាបានអះអាងថា អាការជំងឺរបស់ពួកគេគឺបណ្ដាលមកពីការផឹកស្រាថ្នាំចិនសែតាំងកួយលើសកម្រិតបណ្ដាលឲ្យពុលក៏ដោយ ក៏ក្រុមគ្រូពេទ្យជំនាញនៅមិនទាន់មានការបញ្ជាក់ថា ករណីនេះបណ្ដាលមកពីស្រាមានជាតិពុលនោះដែរ។
លោក ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យបានប្រាប់ភ្នំពេញ ប៉ុស្តិ៍ ថា ថ្វីបើនៅពេលនេះគេដាក់ការសង្ស័យខ្លាំងទៅលើស្រាថ្នាំចិនសែតាំងកួយមានកំហាប់ជាតិអាល់កុលខ្ពស់ដែលធ្វើឲ្យប៉ះពាល់ដល់សុខភាពអ្នកផឹក ប៉ុន្តែគេមិនអាចសន្មតថា ករណីពុលនេះបង្កឡើងពី «ស្រាមានជាតិពុល» នោះទេ។
លោក ច័ន្ទសង្វាត បានថ្លែងថា៖ «តាមការរៀបរាប់របស់អ្នកជំងឺ អាការៈរបស់ពួកគេគឺបណ្ដាលមកពីការពុលចំណីអាហារ។ ទោះជាបែបណា ស្រាថ្នាំចិនសែតាំងកួយត្រូវបានគេសង្ស័យជាបុព្វហេតុនៃការពុលអាហារនេះខ្លាំងជាងគេ ព្រោះអ្នកជំងឺទាំង ១៦ នាក់នោះ សុទ្ធតែបានទទួលទានស្រាថ្នាំចិនសែនោះ»។
លោក ច័ន្ទសង្វាត ថ្លែងថាសំណាកស្រា និងសំណាកឈាមរបស់អ្នកជំងឺ ដែលបានស្លាប់ក្នុងករណីនេះបានបញ្ជូនទៅកាន់មន្ទីរពិសោធន៍ផ្នែកវេជ្ជសាស្ត្ររបស់ក្រសួងសុខាភិបាលក្នុងរាជធានីភ្នំពេញ ដើម្បីពិសោធ ខណៈសមត្ថកិច្ចចម្រុះខេត្តបន្ទាយមានជ័យកំពុងសហការគ្នា ចុះស្រាវជ្រាវ និង រឹបអូសស្រាថ្នាំចិនសែយីហោ «តាំងកួយ»នោះពីលើទីផ្សារទាំងអស់នៃខេត្តនេះ និង ហាមឃាត់ការចរាចរទិញលក់ និងប្រើប្រាស់ជាបណ្ដោះអាសន្ននូវស្រាថ្នាំចិនសែគ្រប់ប្រភេទ ដើម្បីទប់ស្កាត់ការរីករាលដាលកាន់តែច្រើននៃករណីពុលស្រាថ្នាំចិនសែនេះទៅដល់បណ្ដាស្រុក និងខេត្តមួយចំនួនទៀតក្នុងប្រទេសកម្ពុជា។
លោកថា ស្រាថ្នាំចិនសែតាំងកួយនោះត្រូវបានគេច្រកនៅក្នុងដបទឹកសុទ្ធចំណុះ ១ ភាគ ៣ នៃលីត្រ លក់តម្លៃ ១ ០០០ រៀលក្នុង ១ ដប៕