ព្រះសីហនុៈ មនុស្សប្រុស និងស្រីចំនួន ៥០ នាក់ក្នុងចំណោមជាង ១០០ នាក់ បានលួចរត់កាលពីយប់ថ្ងៃសុក្រ សប្ដាហ៍មុនចេញពីមណ្ឌលបន្សាបគ្រឿងញៀនកែវផុស ស្ថិតក្នុងស្រុកស្ទឹងហាវ ខេត្តព្រះសីហនុ។
លោក រស់ កី អធិការនគរបាលស្រុកស្ទឹងហាវបានថ្លែងកាលពីម្សិលមិញថា ក្រោយពីទទួលរបាយការណ៍អំពីមនុស្សរត់ចេញពីមណ្ឌលបន្សាបគ្រឿងញៀន កម្លាំងជំនាញចម្រុះបានចេញអន្តរាគមន៍ភ្លាមៗរហូតមកដល់ថ្ងៃម្សិលមិញបានស្រាវជ្រាវនាំខ្លួនមនុស្ស ១៣ នាក់ ត្រឡប់មកមណ្ឌលវិញ។
លោក កី ថ្លែងថា៖ «ចំពោះអ្នកលួចរត់ចេញពីមណ្ឌលនោះមិនមានទោសកំហុសអីទេ ព្រោះអ្នកទាំងនោះក៏សុទ្ធតែជាអ្នករងគ្រោះដោយគ្រឿងញៀនដែរទេ»។
លោក កី អះអាងថា មនុស្សដែលជាប់គ្រឿងញៀនទាំងអស់នោះត្រូវបានបញ្ជូនមកពីមណ្ឌលបន្សាបគ្រឿងញៀនក្រាំងធ្នង់នៅរាជធានីភ្នំពេញ ហើយមូលហេតុដែលពួកគេលួចរត់ព្រោះមិនស៊ាំជាមួយការរស់នៅទីតាំងថ្មី។ ពួកគេបាននាំគ្នាគាស់ចម្រឹងបង្អួច ១ ផ្ទាំងនៅក្នុងមណ្ឌលហើយក៏នាំគ្នាប្លោះរបងចេញទៅខាងក្រៅ។
បើតាមប្រធានមណ្ឌលបន្សាបគ្រឿងញៀន កែវ ផុស បានឱ្យដឹងថា មណ្ឌលបន្សាបគ្រឿងញៀននេះជាការគ្រប់គ្រងដោយក្រសួងសង្គមកិច្ច អតីតយុទ្ធជន និងយុវនីតិសម្បទា។ សាងសង់សម្រាប់ព្យាបាលជនរងគ្រោះដោយគ្រឿងញៀន។
មន្ត្រីដដែលនេះបានឱ្យដឹងថាកាលពីថ្ងៃទី ២០ វិច្ឆិកា ខាងមណ្ឌលបន្សាបគ្រឿងញៀនក្រាំងធ្នង់បានដឹកជនរងគ្រោះដោយសារធាតុញៀនប្រុសស្រីចំនួន ១០៣ នាក់ ពីមណ្ឌលបន្សាបគ្រឿងញៀនក្រាំងធ្នង់ដើម្បីទៅរស់នៅ និងបន្សាបសារធាតុញៀននៅទីនោះ។ សមត្ថកិច្ចនឹងបន្តស្រាវជ្រាវរកអ្នកដែលកំពុងគេចខ្លួនយកមកវិញតាមរយៈអាណាព្យាបាល៕