.jpg)
ជនជាតិ ៣នាក់ និង ខ្មែរ ២នាក់ត្រូវបានចាប់ខ្លួនពាក់ព័ន្ធករណីជួញដូរ ដឹកជញ្ជូនគ្រឿងញៀនឆ្លងដែនដោយខុសច្បាប់ក្នុងខេត្តស្វាយរៀង ថ្ងៃទី៩ខែឧសភាឆ្នាំ២០២១។ រូបភាព Poilce
ភ្នំពេញៈ តុលាការខេត្តស្វាយរៀងនៅព្រឹកថ្ងៃទី ១២ ឧសភាបានសម្រេចចេញដីការឃុំខ្លួនបុរសត្រូវចោទជាជនជាតិខ្មែរ ២ នាក់ និងបុរសជនជាតិវៀតណាម ៣ នាក់ក្នុងពន្ធនាគារខេត្ត បន្ទាប់ពីចាប់ខ្លួនកាលពីថ្ងៃទី ៥ និងទី ៦ ឧសភានៅខេត្តស្វាយរៀង ខេត្តកណ្តាល និងនៅរាជធានីភ្នំពេញ។
លោក កែវ សុថា ស្នងការរងទទួលផែនការងារប្រឆាំងគ្រឿងញៀនខេត្ត ស្វាយរៀងប្រាប់ភ្នំពេញប៉ុស្តិ៍នៅថ្ងៃទី ១២ ឧសភាថា តុលាការខេត្តស្វាយរៀងបានចេញដីការឃុំខ្លួនជនត្រូវចោទជាជនជាតិខ្មែរ និងជនជាតិវៀតណាមទាំង ៥ នាក់ក្នុងពន្ធនាគារហើយនៅថ្ងៃទី ១២ ឧសភា។
លោកថ្លែងថា៖ «មុខសញ្ញាទាំង ៥ នាក់នេះមានទីតាំងរស់នៅផ្សេងៗគ្នាតែពួកគេមានគោលដៅតែមួយគឺដឹកជញ្ជូនគ្រឿងញៀន»។ លោកប្រាប់ថាជនត្រូវចោទឈ្មោះ ហ៊ួ តឹក អាយុ ៥៩ ឆ្នាំ និងឈ្មោះ ឡេ យ៉ាំងគួ ភេទប្រុស អាយុ ៤៥ ឆ្នាំ ឈ្មោះ ង្វៀង ថាន់លីន ភេទប្រុស អាយុ ៣៨ ឆ្នាំជាជនជាតិវៀតណាម។ ឈ្មោះ ហេង សុវត្ថា ភេទប្រុស អាយុ ៣៩ ឆ្នាំ និងឈ្មោះ នុត ប៊ុនធឿន ភេទប្រុស អាយុ ៥៦ ឆ្នាំជាជនជាតិខ្មែរ។ អ្នកទាំង ៥ នាក់ត្រូវរងការចោទប្រកាន់នៅក្រោមច្បាប់ ស្តីពីការត្រួតពិនិត្យគ្រឿងញៀន។
បើតាមលោក សុថា រំឭកឱ្យដឹងថាការបង្ក្រាបក្រុមឧក្រិដ្ឋជននេះគឺ ដំបូងចាប់ជនសង្ស័យ ឈ្មោះ ហ៊ួ តឹក នៅ ចំណុចគោលដៅត្រួតពិនិត្យការអនុវត្តច្បាប់ចរាចរណ៍ស្ថិតក្នុងភូមិធ្លក ឃុំក្រោលគោ ស្រុកស្វាយជ្រំ ខេត្ត ស្វាយរៀង។ ពេលចាប់នោះមានរថយន្ត ១ គ្រឿង ម៉ាក CRV រួមនឹងថ្នាំញៀន ១០ កញ្ចប់ធំ។ បន្ទាប់មកចាប់ បានជន ២ នាក់ទៀតនៅស្រុកកំពង់រោទ៍ ខេត្តស្វាយរៀង។ លោកប្រាប់ថាប្រតិបត្តិការនេះ សមត្ថកិច្ចរបស់លោកបានសហការជាមួយមន្ទីរប្រឆាំងគ្រឿងញៀន និង មានការសម្របសម្រួលផ្លូវច្បាប់ពីសាលាដំបូងខេត្តស្វាយរៀង និង សាលាដំបូងរាជធានីភ្នំពេញ៕
