ភ្នំពេញ៖ យ៉ាងហោចណាស់មនុស្ស ៥ នាក់ស្លាប់ និងរបួស ហើយគោ ៧ ក្បាលបានងាប់ ដោយសាររន្ទះបាញ់កាលពីថ្ងៃទី ២៧ ខែមេសា នៅខេត្តចំនួន ៣ គឺខេត្តកំពង់ចាម បាត់ដំបង និងខេត្តកំពង់ធំ។
លោក ម៉ា ប៊ុតតូ នាយនគរបាលប៉ុស្តិ៍ឃុំរអាងប្រាប់ ភ្នំពេញ ប៉ុស្តិ៍ នៅថ្ងៃទី ២៨ មេសាថា កាលពីល្ងាចថ្ងៃទី ២៧ ខែមេសា ខណៈមេឃកំពុងធ្លាក់ភ្លៀងស្រិចៗ ស្ត្រីម្នាក់ឈ្មោះ ឈុន រ៉ាវី អាយុ ៣៦ ឆ្នាំ ជាកម្មករសំណង់ មានទីលំនៅភូមិត្រពាំងត្រស់ ឃុំក្រឡា ស្រុកកំពង់សៀម បានធ្វើដំណើរតាមម៉ូតូត្រឡប់ពីធ្វើការងារសំណង់នៅភូមិវាលខ្សាច់ ឃុំរអាង ស្រុកកំពង់សៀម ដើម្បីទៅផ្ទះរបស់ខ្លួនវិញ ហើយក៏ត្រូវបានរន្ទះបាញ់ស្លាប់នៅក្បែររង្វង់មូល ព្រលានយន្តហោះខេត្តកំពង់ចាម។
ក្នុងហេតុការនោះ បុរសម្នាក់ឈ្មោះ ស៊ុន វ៉ា អាយុ៤៧ ឆ្នាំ ដែលជាបងប្អូនជីដូនមួយជនរងគ្រោះ និងជាអ្នករួមដំណើរតាមម៉ូតូពីក្រោយស្ត្រីរងគ្រោះបានរងរបួសស្រាល។
លោកបញ្ជាក់ថា៖ «តាមការរៀបរាប់របស់បុរសឈ្មោះ ស៊ុន វ៉ា នៅពេលមានរន្ទះបាញ់នោះ គឺមានចរន្តអគ្គិសនីឆក់មកលើខ្លួនគាត់ ដែលជិះពីក្រោយស្ត្រីរងគ្រោះជាប្អូនជីដូនមួយរបស់គាត់»។
ជាមួយគ្នានេះ លោក ប៊ុតតូ ក៏បានស្រង់សម្ដីរបស់លោក ស៊ុន វ៉ា មកបញ្ជាក់ដែរថា៖ «នៅពេលកំពុងជិះម៉ូតូត្រឡប់ពីធ្វើការមកផ្ទះវិញ ដល់ចំណុចក្បែររង្វង់មូលព្រលានយន្តហោះ ក៏ស្រាប់តែរន្ទះបាញ់ផាំង ម៉ូតូក៏ដួល ប្អូនស្រីជីដូនមួយរបស់ខ្ញុំ បានស្លាប់ភ្លាមៗនៅនឹងកន្លែង ហើយខ្ញុំក៏រងរបួសទន់ដៃទន់ជើង ព្រោះមានចរន្តអគ្គិសនីឆក់»។
ចំណែកស្ត្រីមា្នក់ឈ្មោះ ប៉ាក សល់ អាយុ៥២ ឆ្នាំ មានទីលំនៅក្នុងភូមិព្រៃទទឹង ឃុំបាយដំរ៉ាំ ស្រុកបាណន់ ខេត្តបាត់ដំបង ក៏ត្រូវបានរន្ទះបាញ់ស្លាប់នៅរសៀលថ្ងៃទី ២៧ ខែមេសាផងដែរ ខណៈគាត់ទៅព្រោះស្រូវជាមួយប្ដីរបស់គាត់ ឈ្មោះ ឈន ជា អាយុ ៥៣ ឆ្នាំ នៅចំណុចបឹងខ្ទំ ដែលមានចម្ងាយប្រមាណជាង ២០០ ម៉ែត្រ ខាងក្រោយផ្ទះរបស់គាត់។ នេះបើតាមលោក សាត សឿត អធិការរងស្រុកបាណន់ថ្លែងនៅថ្ងៃ ២៨ មេសានេះ។
លោក សឿត ថ្លែងថា៖ «ក្នុងហេតុការណ៍រន្ទះបាញ់នោះ ប្ដីស្ត្រីរងគ្រោះ ក៏រងរបួសដែរ ប៉ុន្តែរបួសស្រាល គឺគ្រាន់តែឆេះសក់ក្បាលបន្តិចបន្តួចប៉ុណ្ណោះ។ ចំណែកស្ត្រីរងគ្រោះគឺឆេះរោលជាំខ្មៅពេញខ្លួន គឺដូចជាត្រូវភ្លើងដុតឆេះទាំងរស់»។
លោកបន្តថា យោងតាមការអះអាងរបស់អ្នកភូមិដែលបានទៅធ្វើស្រែពង្រោះនៅក្បែរចំណុចកើតហេតុនោះ ជនរងគ្រោះទាំង ២ នាក់ប្ដីប្រពន្ធ បានព្យាយាមបន្តធ្វើការសាបព្រោះស្រូវនៅពេលមេឃកំពុងភ្លៀង ដោយមិនព្រមចូលឈប់សម្រាកនៅក្រោមដំបូលតង់កៅស៊ូ ដែលពួកគេបានសង់ ដើម្បីជ្រកភ្លៀងនោះទេ។
ករណីរន្ទះបាញ់ដូចគ្នានេះ ក៏បានកើតឡើងនៅខេត្តកំពង់ធំផងដែរ កាលពីរសៀលថ្ងៃទី ២៧ ខែមេសា ដោយមានជនរងគ្រោះម្នាក់បានស្លាប់ និងងាប់សត្វគោ ៧ ក្បាល។
លោក កែ កញ្ឆនា អធិការស្រុកកំពង់ស្វាយប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែមេសាថា រន្ទះបាញ់បានកើតឡើង ២ ករណី នៅឃុំត្រពាំងឫស្សី ក្នុងនោះករណីទី១ កើតឡើងនៅភូមិល្វាជោម បណ្ដាលឲ្យស្លាប់បុរសម្នាក់ ឈ្មោះ សៀង ឈឿន អាយុ ៥៥ឆ្នាំ និង ១ ករណីទៀត នៅភូមិក្រសាំង បណ្ដាលឲ្យងាប់សត្វគោ ៧ ក្បាល។
លោក កញ្ឆនា ថ្លែងថា៖ «ជនរងគ្រោះឈ្មោះ សៀង ឈឿន ត្រូវបានរន្ទះបាញ់ស្លាប់ ខណៈកំពុងជិះកង់ត្រឡប់ពីស្រែមកផ្ទះវិញ គ្រាដែលមេឃកំពុងរកកលចង់ភ្លៀង»៕