.jpg)
គោយន្តដឹកឈើដែលសមត្ថកិច្ចនិងប្រជាសហគមន៍ចាប់ឃាត់បាននៅក្នុងតំបន់ព្រៃព្រះរកា។ សហការី
ព្រះវិហារៈ មនុស្ស ៥ នាក់ និងគោយន្តដឹកបទល្មើសព្រៃឈើចំនួន ៥ គ្រឿង បន្ថែមទៀត ត្រូវបានសមត្ថកិច្ច និងប្រជាសហគមន៍បង្ក្រាបចាប់បាន នៅក្នុងតំបន់ដែនជម្រកសត្វព្រៃព្រះរកា កាលពីថ្ងៃចុងសប្ដាហ៍មុន ប៉ុន្តែមនុស្ស និងគោយន្តត្រូវបានដោះលែង ក្រោយពីធ្វើការអប់រំ និងការផាកពិន័យ។
លោក ប៊ុន សឿង នាយកដែនជម្រកសត្វព្រៃព្រះរកា បានប្រាប់ភ្នំពេញប៉ុស្តិ៍កាលពីម្សិលមិញថា កាលពីថ្ងៃទី ២០-២១ ខែ មិថុនា ឆ្នាំ ២០១៩ ក្រុមឧទ្យានុរក្សរបស់លោក បានសហការជាមួយកម្លាំងប្រជាសហគមន៍ព្រះរកាក្នុងឃុំម្លប់ព្រៃ និងឃុំឆែប ចុះល្បាតព្រៃនៅក្នុងតំបន់បរកឺប ស្ថិតក្នុងស្រុកឆែប ខេត្តព្រះវិហារ ហើយបានប្រទះឃើញ និងបង្ក្រាបសកម្មភាពដឹកជញ្ជូនបទល្មើសព្រៃឈើ ដោយឃាត់ខ្លួនមនុស្ស ៥ នាក់ និងរឹបអូសវត្ថុតាងគោយន្តចំនួន ៥ គ្រឿង រួមទាំងឈើក្ដារបន្ទះសរុបជាង ៣,៥ ម៉ែត្រគុប ដើម្បីធ្វើការអប់រំណែនាំនិងផាកពិន័យទៅតាមផ្លូវច្បាប់។
លោកសឿង បន្តថា៖ «នៅថ្ងៃទី ២២ ខែ មិថុនា ឆ្នាំ ២០១៩ មនុស្សទាំង ៥ នាក់នោះ ត្រូវបានដោះលែងជាមួយគោយន្តដឹកបទល្មើសព្រៃឈើរបស់ពួកគេទាំង ៥ គ្រឿងនោះ ត្រឡប់ទៅវិញ ក្រោយពីធ្វើការអប់រំណែនាំនិងផាកពិន័យអន្តរកាលក្នុងម្នាក់ៗ ៣ លានរៀល។ ដោយឡែក ឈើវត្ថុតាងប្រភេទ ផ្ដៀក និងឈើទាល សរុប ៣,៥ ម៉ែត្រគុប ត្រូវបានរឹបអូសជាសម្បត្តិរដ្ឋនិងកំពុងត្រូវបានរក្សាទុកនៅក្នុងទីស្នាក់ការបរិស្ថានកូនដំរី»។
លោកឲ្យដឹងថា កាលពីថ្ងៃទី ៧ ដល់ថ្ងៃទី ៩ ខែ មិថុនា ឆ្នាំ ២០១៩ ក្រុមមន្ត្រីរបស់លោក រួមទាំងក្រុមបណ្ដាញសហគមន៍ព្រៃព្រះរកា ក៏បានបង្ក្រាបចាប់រឹបអូសគោយន្តចំនួន ៦ គ្រឿង និងរណារយន្ត ៥ គ្រឿង និងឈើវត្ថុតាងប្រមាណ ៤ ម៉ែត្រគុបផងដែរ។ ក្នុងអំឡុងពេលនោះ ក្រុមមន្ត្រីឧទ្យានុរក្ស ក៏បានធ្វើការអប់រំណែនាំ និងផាកពិន័យក្រុមជនដឹកបទល្មើសក្នុងម្នាក់ៗ ៣ លានរៀល ខណៈរណារយន្ត និងឈើវត្ថុតាងត្រូវបានរឹបអូស។
លោកបន្ថែមថា៖ «សរុបមក នៅក្នុងខែមិថុនានេះ ក្រុមមន្ត្រីឧទ្យានុរក្ស របស់យើង បានរួមសហការជាមួយក្រុមបណ្ដាញសហគមន៍ព្រៃព្រះរកា បង្ក្រាបចាប់រឹបអូសគោយន្តសរុបចំនួន ១១ គ្រឿង រណារយន្ត ៥ គ្រឿង និងឈើវត្ថុតាងសរុប ៧,៥ ម៉ែត្រគុប ដោយបានផាកពិន័យក្រុមជនប្រព្រឹត្តបទល្មើសសរុបជាទឹកប្រាក់ ៣៣ លានរៀល»។
បើតាមក្រុមប្រជាសហគមន៍ព្រៃព្រះរកា ដែលចូលរួមចុះល្បាតព្រៃក្នុងតំបន់ដែនជម្រកព្រៃព្រះរកា ជាមួយក្រុមមន្ត្រីឧទ្យានុរក្ស នាពេលកន្លងមកនេះក្រុមជនដឹកបទល្មើសព្រៃឈើ ដែលត្រូវបានបង្ក្រាប ភាគច្រើនគឺជាប្រជាពលរដ្ឋមកពីខេត្តកំពង់ធំ។
លោក ស៊ុន ពៅ តំណាងប្រជាសហគមន៍ព្រៃព្រះរកាបានប្រាប់ភ្នំពេញប៉ុស្តិ៍ថា ក្រុមជនដឹកជញ្ជូនបទល្មើសព្រៃឈើ ភាគច្រើនជាអ្នករស់នៅក្នុងខេត្តកំពង់ធំ។ ការដឹកជញ្ជូនបទល្មើសព្រៃឈើរបស់ពួកគេ មានតាមច្រើនរូបភាព ក្នុងនោះ តាមរយៈរទេះក្របីគោយន្ត និង រថយន្តកែច្នៃ។
លោកបញ្ជាក់ថា៖ «នៅពេលក្រុមល្បាតយើងបង្ក្រាបចាប់បានពួកគេតែងឆ្លើយថា ពួកគេជាអ្នកស៊ីឈ្នួលដឹក ជញ្ជូនឈើឲ្យគេ ដើម្បីចិញ្ចឹមជីវិតប៉ុណ្ណោះ ដែលក្នុងមួយរទេះក្របីថ្លៃ ៥០ ០០០ រៀល និងសម្រាប់ការស៊ីឈ្នួលដឹកតាមគោយន្ត ឬរថយន្តកែច្នៃ ថ្លៃពី ១០-២០ ម៉ឺនរៀលក្នុងមួយជើង។ បើតាមចម្លើយសារភាពរបស់ពួកគេក្រុមឈ្មួញឈើដែលភាគច្រើនជាទាហាន បានជួលប្រជាពលរដ្ឋពីបណ្ដាខេត្តផ្សេងៗ ប្រព្រឹត្តបទល្មើសព្រៃឈើដោយបែងចែកជា ២ ក្រុមផ្សេងគ្នា គឺក្រុមកាប់ និងដឹកជញ្ជូន»។
ព្រៃព្រះរកាដែលមានទំហំ ៩៦ ០០០ ហិកតា ស្ថិតនៅចន្លោះព្រំប្រទល់ស្រុកចំនួន ៣ គឺស្រុកត្បែងមានជ័យ ស្រុកជាំក្សាន្ត និងស្រុកឆែបរបស់ខេត្តព្រះវិហារ។ ជនជាតិដើមភាគតិចកួយត្រូវបានគេកត់សម្គាល់ឃើញថា បានរស់នៅប្រមូលផ្ដុំគ្នានៅក្បែរតំបន់ព្រៃដ៏ធំនេះ ហើយពួកគេ បាននាំគ្នាការពារនិងអភិរក្ស ដោយចាត់ទុកព្រៃដ៏ធំមួយនេះ ជាជង្រុកស្បៀងរបស់ពួកគេ។
កាលពីខែ ឧសភា ឆ្នាំ ២០១៦ រាជរដ្ឋាភិបាលតាមរយៈក្រសួងបរិស្ថានបានសម្រេចដាក់បញ្ចូលជាតំបន់ការពារនិងអភិរក្សដោយឲ្យឈ្មោះថា «ដែនជម្រកសត្វព្រៃព្រះរកា»៕
