កំពង់ស្ពឺៈ ជនសង្ស័យ ៥ នាក់ ក្នុងនោះមានស្រ្តីម្នាក់កំពុងត្រូវសមត្ថកិច្ចអាវុធហត្ថ ខេត្ត កំពង់ស្ពឺសាកសួរពីម្សិលមិញនៅបញ្ជាការដ្ឋាន ខេត្តកំពង់ស្ពឺ បន្ទាប់ពីចាប់ខ្លួនពួកគេកាលពីថ្ងៃទី ៤ សីហា នៅភូមិអំពិលរូង ឃុំព្រះស្រែ ស្រុកឧដុង្គ ខេត្ត កំពង់ស្ពឺពាក់ព័ន្ធយកដីមានម្ចាស់លក់បន្តទៅឲ្យអ្នកផ្សេង។ លោក ទិត្យ វណ្ណៈ ប្រធានការិយាល័យព្រហ្មទណ្ឌនៃ បញ្ជាការដ្ឋានកងរាជអាវុធហត្ថ ខេត្តកំពង់ស្ពឺដែលចុះអនុវត្តការងារនេះផ្ទាល់កាលពីថ្ងៃទី ៤ សីហានោះ ពីម្សិលមិញភ្នំពេញប៉ុស្តិ៍បានព្យាយាមទាក់ទងតាមទូរស័ព្ទចំនួន ២ លើកដើម្បីសុំការបញ្ជាក់ប្រាប់ប៉ុន្តែជាប់ប្រជុំ។
លោកស្រី ចាត សូរស្មី ព្រះរាជអាជ្ញានៃសាលាដំបូងខេត្ត កំពង់ស្ពឺ ដែលបានចុះសហការសម្របសម្រួលផ្នែកច្បាប់ពាក់ព័ន្ធការចាប់ខ្លួនជនសង្ស័យប្រុសស្រី ៥ នាក់នោះដែរ បានប្រាប់ឲ្យដឹងពីម្សិលមិញថា ជនសង្ស័យទាំង ៥ នាក់នោះខាងសមត្ថកិច្ចអាវុធហត្ថកំពុងសាកសួរនៅឡើយ ។ ករណីនេះ លោកស្រីបានចុះទៅធ្វើការងារជាមួយសមត្ថកិច្ចអាវុធហត្ថមែន ប៉ុន្តែលោកស្រីមិនដឹងថាក្រុមជនសង្ស័យទាំង ៥ នាក់នោះ មានដីលក់ចំនួនប៉ុន្មាននោះទេ។
លោកស្រី ចាត សូរស្មី ថ្លែងប្រាប់ថា៖ «រឿងមនុស្ស ៥ នាក់នោះ ខ្ញុំមិនដឹងថាពាក់ព័ន្ធនឹងដីធ្លីប៉ុន្មាន ហើយខ្ញុំក៏មិនទាន់ដឹងរឿងលម្អិតយ៉ាងណាដែរព្រោះសំណុំរឿងខាងប៉េអឹមមិនទាន់បញ្ជូនដល់តុលាការនៅឡើយ»។
បើយោងតាមរបាយការណ៍របស់កងរាជអាវុធហត្ថដែលបានសរសេរសារនៅក្នុងបណ្តាញទំនាក់ទំនងសង្គមរបស់កងរាជអាវុធហត្ថ ខេត្តកំពង់ស្ពឺបានបង្ហាញថា ជនសង្ស័យដែលត្រូវកម្លាំងអាវុធហត្ថចាប់ខ្លួនទី១ មានឈ្មោះ នួន វណ្ណា ភេទប្រុស អាយុ ៤១ ឆ្នាំ ជាបុគ្គលិកក្រុមហ៊ុន សុខ រដ្ឋា អចលនទ្រព្យនិងមានលំនៅក្នុងភូមិជើង ស្រុក ឃុំជង្រុក ស្រុកគងពិសី ខេត្តកំពង់ស្ពឺ ,ទី២ ឈ្មោះ តន់ សុផាន់ណានិន ភេទស្រី អាយុ ៣៥ ឆ្នាំ ជាកម្មកររោងចក្រកាត់ដេរ មានលំនៅ ភូមិព្រៃភក្តី ឃុំព្រៃពួច ស្រុកអង្គស្នួល ខេត្តកណ្តាល, ទី៣ ឈ្មោះ ភោគ សានិន ភេទប្រុស អាយុ ៥៩ ឆ្នាំ មានលំនៅក្នុងភូមិសង្កាត់កំបូល ខណ្ឌពោធិសែនជ័យ រាជធានីភ្នំពេញ ,ទី៤ ឈ្មោះ ច្រឹក ចិត្រា ភេទប្រុស អាយុ ៣៨ ឆ្នាំ មានលំនៅក្នុងភូមិភ្នំពេញថ្មី សង្កាត់គោកឃ្លាង ខណ្ឌសែនសុខ និងទី៥ ឈ្មោះ ហ៊ាង អេងទ្រី ភេទ ប្រុស អាយុ ៣២ ឆ្នាំ មានលំនៅក្នុងសង្កាត់ក្រាំងធ្នង់ ខណ្ឌសែនសុខ៕