ព្រៃវែងៈ យ៉ាងហោចណាស់មានមនុស្សប្រុស-ស្រី ៦ នាក់ក្នុងគ្រួសារតែមួយ បានស្លាប់ដោយសារគ្រោះថ្នាក់ចរាចរណ៍រថយន្ត ២ គ្រឿងបុកគ្នានៅលើផ្លូវជាតិលេខ ១ ត្រង់ចន្លោះគីឡូម៉ែត្រលេខ ៩១-៩២ ក្នុងភូមិជ្រលង ឃុំសាទ ស្រុកកំពង់ត្របែក ខេត្តព្រៃវែងកាលពីរាត្រីថ្ងៃ ២៨ ខែមករា។ នេះបើតាមមន្ត្រីនគរបាលចរាចរណ៍ខេត្តម្នាក់ដែលចុះវាស់វែងនៅកន្លែងកើតហេតុ។
លោក ឃុត សារាយ នាយផ្នែកចរាចរណ៍ស្រុកកំពង់ត្របែក បានប្រាប់ភ្នំពេញប៉ុស្តិ៍កាលពីម្សិលមិញថា ជនរងគ្រោះដែលបានស្លាប់ក្នុងហេតុការណ៍គ្រោះថ្នាក់ចរាចរណ៍នេះ រួមមាន លោក ប៉ែន សៅសុម៉េតធា អាយុ ២៨ ឆ្នាំ ជាមន្ត្រីនគរបាលប៉ុស្តិ៍រដ្ឋបាលឃុំថ្កូវនៃអធិការដ្ឋានស្រុកកំពង់ត្របែក និងប្រពន្ធកូនរបស់គាត់ គឺ អ្នកស្រី ឡាយ ស្រីនិច អាយុ ២៤ ឆ្នាំនិងទារកឈ្មោះ ឌី វណ្ណៈ អាយុ ១ ឆ្នាំ ៦ ខែ រួមទាំងឪពុក ម្ដាយក្មេក របស់គាត់ គឺ លោក ឃឹម គា អាយុ ៥០ ឆ្នាំ និងអ្នកស្រី មោគ សុភាព អាយុ ៤៩ ឆ្នាំ ព្រមទាំងបងថ្លៃប្រុសគាត់ម្នាក់ទៀតឈ្មោះ សាក់ វណ្ណី អាយុ ២៨ ឆ្នាំ។
លោកបានថ្លែងថា ជនរងគ្រោះទាំង ៦ នាក់ មានលំនៅក្នុងភូមិចំបក់ ឃុំប្រាសាទ ស្រុកកំពង់ត្របែក ខេត្តព្រៃវែង។មុនពេលកើតហេតុគេឃើញពួក គាត់ធ្វើដំណើរតាមរថយន្ត Highlander ពណ៌ទឹកប្រាក់ ១ គ្រឿង ពាក់ស្លាកលេខភ្នំពេញ 2AI-8096 បើកបរដោយឈ្មោះ ប៉ែន សៅសុម៉េតធា ក្នុងទិសដៅពីលិចទៅកើត។លុះដល់ចំណុច កើតហេតុក៏មាន រថយន្តដឹកដីម៉ាក Hyundai ពណ៌ត្រេអុី ១ គ្រឿង ពាក់ស្លាកលេខ B1 ខេមរភូមិន្ទ 4.9457 បើកបរដោយជនមិនស្គាល់អត្តសញ្ញាណក្នុងទិសដៅបញ្ច្រាសគ្នាគឺពីកើតទៅលិចបានរេចង្កូតមកបុករថយន្តរបស់គាត់បណ្ដាលឲ្យក្រឡាប់ធ្លាក់ពីលើផ្លូវជាតិស្លាប់ទាំងអស់គ្នានៅនឹងកន្លែងកើតហេតុតែម្ដង។ ចំណែកអ្នកបើករថយន្តបង្កបានរត់គេចខ្លួនបាត់។
លោក សារាយ បានបញ្ជាក់ថា៖ «យោងតាមការពិនិត្យវាស់វែងនៅកន្លែងកើតហេតុ រថយន្តដែលបង្កខាងលើនេះគឺពិតជារថយន្តដឹកដីប្រាកដមែន ព្រោះស្នាមដានកង់រថយន្តដឹកដីបានអូសចូលក្នុងគំនូសចរាចរណ៍ខាងរថយន្ត Highlander និងធ្លាក់ពីផ្លូវជាតិមកខាងរថយន្ត Highlander ផងដែរ»។
លោកបានបន្តថា សពជនរងគ្រោះ ត្រូវបានកម្លាំងសមត្ថកិច្ចប្រគល់ជូន ក្រុមគ្រួសារសាច់ញាតិ នាំយកទៅធ្វើបុណ្យតាមប្រពៃណី។ ចំណែករថយន្តទាំង ២ គ្រឿង ត្រូវបានសមត្ថកិច្ចនគរបាលស្ទូចយកទៅរក្សាទុកនៅអធិការដ្ឋាននគរបាលស្រុកកំពង់ត្របែក ដើម្បីកសាងសំណុំរឿងបញ្ជូនទៅតុលាការ ចាត់វិធានការបន្តតាមនីតិវិធី។
ជុំវិញករណីនេះផងដែរ លោក ស្រេង ជា ស្នងការនគរបាលខេត្តព្រៃវែង បានប្រាប់ភ្នំពេញប៉ុស្តិ៍ថា ក្នុងករណីនេះ លោកបានបញ្ជាឲ្យកម្លាំងសមត្ថកិច្ចចុះស្រាវជ្រាវតាំងពីយប់ថ្ងៃកើតហេតុមកម្ល៉េះ ដើម្បីស្វែងរកអត្តសញ្ញាណម្ចាស់និងអ្នកបើកបររថយន្តបង្កហេតុនោះ ដើម្បីនាំខ្លួនឲ្យមកទទួលខុសត្រូវចំពោះមុខច្បាប់ និងផ្ដល់យុត្តិធម៌ដល់ជនរងគ្រោះ។
លោកបានបន្តថា គិតត្រឹមម៉ោង ១១ និង ៣០ នាទីព្រឹក ថ្ងៃអង្គារ [ម្សិលមិញ] នេះ នគរបាលជំនាញបានស្រាវជ្រាវតាមរយៈស្លាកលេខរថយន្តបង្កហេតុនោះ ហើយបានរកឃើញអត្តសញ្ញាណម្ចាស់រថយន្តគឺជាអ្នករស់នៅខេត្តស្វាយរៀង។ ដោយឡែកអ្នកបើកបររថយន្តនោះ ក៏សមត្ថកិច្ចបានកំណត់អត្តសញ្ញាណច្បាស់លាស់ផងដែរ និងកំពុងតាមស្វែងរកចាប់ខ្លួន។
លោកបានបញ្ជាក់ថា៖ «ពេលនេះ សមត្ថកិច្ចយើងកំពុងតាមស្វែងរកចាប់ខ្លួនអ្នកបើកបររថយន្តបង្កគ្រោះថ្នាក់ចរាចរណ៍នោះដើម្បីបញ្ជូនទៅតុលាការផ្ដន្ទាទោសតាមផ្លូវច្បាប់ចំណែកម្ចាស់រថយន្តបង្កហេតុនោះក៏ត្រូវជាប់កាតព្វកិច្ចបង់សំណងរដ្ឋប្បវេណីដល់គ្រួសារជនរងគ្រោះផងដែរ ព្រោះបានជួលឲ្យគេបើកបរធ្វើអាជីវកម្មដឹកដីលក់»៕
(កែសម្រួល ព្រុំ ភ័ក្រ្ត )