.jpg)
សមត្ថកិច្ចពិនិត្យសាកសព ដែលសង្ស័យស្លាប់ដោយឃាតកម្ម កាលពីថ្ងៃទី ៣០ ខែឧសភា នៅខេត្តព្រះសីហនុ។ សហការី
ព្រះសីហនុៈ នាយប៉ុស្ដិ៍រដ្ឋបាលឃុំរាម ប្រជាការពារភូមិ និងថៅកែឃ្លាំងទិញលក់ឈើសរុបចំនួន ៦ នាក់ នៅថ្ងៃទី ៤ មិថុនា នេះ ត្រូវបានលោក ជួន ណារិន្ទ ស្នងការនគរបាលខេត្តព្រះសីហនុ កោះហៅទៅសាកសួរជុំវិញរឿងឃាតកម្មវាយសម្លាប់បុរសម្នាក់ រួចហើយយកសាកសពទៅបោះចោល កាលពីថ្ងៃទី ៣០ ឧសភា ប៉ុន្តែក្រោយការសាកសួរលោកស្នងការ អះអាងថា វាមិនមែនជាអំពើឃាតកម្មទេ។
លោក ជួន ណារិន្ទ បានប្រាប់ភ្នំពេញប៉ុស្ដិ៍ កាលពីម្សិលមិញថា លោកមិនមែនឃាត់ខ្លួនអ្នកទាំង ៦ នាក់នេះទេ ដោយគ្រាន់តែកោះហៅមកសាកសួរជុំវិញករណីការស្លាប់របស់បុរសម្នាក់ដែលជាអ្នកចាំចម្ការឲ្យគេ នៅក្បែរក្បាលស្ពានទឹកសាប ស្ថិតនៅក្នុងឃុំរាម ស្រុកព្រៃនប់នេះ។
លោកបញ្ជាក់ថា៖ «ខ្ញុំកំពុងតែធ្វើការងារនេះ ព្រោះវាជារឿងស្មុគស្មាញពេក វាមិនមែនជាករណីឃាតកម្ម អ៊ីចឹងបានជារឿងស្មុគស្មាញ ខ្ញុំកំពុងតែធ្វើនីតិវិធី ហើយជនរងគ្រោះជាមនុស្សមានសតិមិនគ្រប់ដែរ។ យើងគ្រាន់តែហៅមេប៉ុស្តិ៍មកសួរនាំនៅស្នងការដ្ឋាននគរបាលខេត្ត មិនទាន់ឈានដល់ការឃាត់ខ្លួនទេ ពីព្រោះករណីនេះ មិនមែនជាករណីឃាតកម្ម ដោយចេតនាទេ យើងកំពុងតែសួរនាំរឿងហ្នឹង»។
លោកបន្តថា ដើមហេតុដំបូង គឺមានពលរដ្ឋទូរស័ព្ទទៅប្រាប់នគរបាលប៉ុស្ដិ៍ថា មានករណីគ្រោះថ្នាក់ចរាចរណ៍មួយ ហើយសមត្ថកិច្ចប៉ុស្ដិ៍បានជិះម៉ូតូទៅមើល ប៉ុន្ដែមិនមានករណីអ្វីកើតឡើងទេ។ នៅពេលនគរបាលឃុំជិះម៉ូតូត្រឡប់ទៅវិញ ក៏មានគេទូរស័ព្ទប្រាប់ម្ដងទៀតថា មានមនុស្សទៅអង្រួនទ្វារផ្ទះពលរដ្ឋ ហើយម្ចាស់ផ្ទះរុញច្រានគ្នាតិចតួច ហើយក៏បានប្រាប់នាយប៉ុស្ដិ៍រដ្ឋបាលឃុំរាមទៅជួយអន្តរាគមន៍។
លោក ណារិន្ទ បន្ថែមថា ក្រោយមកមេប៉ុស្ដិ៍ បាននាំគ្នាដេញបុរសរូបនោះចេញ កុំឲ្យទៅរំខានគេទៀត ស្រាប់តែព្រឹកឡើង ក៏មានគេរាយការណ៍ថា មានមនុស្សស្លាប់។ អ្នកស្លាប់នោះជាបុរសដែលដើរគោះទ្វារគេយប់នោះ ទើបលោកបានបង្កើតក្រុមជំនាញទៅស៊ើបអង្កេត ហើយក៏កោះមន្ត្រីទទួលខុសត្រូវមូលដ្ឋាននោះមកសួរនាំ ប៉ុន្ដែមិនមែនឃាត់ខ្លួនទេ។
លោក ហ៊ួ យ៉ៃ អធិការនគរបាលស្រុកព្រៃនប់ ពីម្សិលមិញ បានបដិសេធការធ្វើអត្ថាធិប្បាយជុំវិញករណីនេះ ដោយលោកអះអាងថា មិនទាន់បានដឹងរឿងនេះច្បាស់លាស់នៅឡើយ។
ចំណែក លោកគឹម ចាន់ មេឃុំរាម ប្រាប់ ពីម្សិលមិញថា ពិតជាមានការកោះហៅមនុស្សចំនួន ៦ នាក់មែន ជុំវិញការស្លាប់បុរសម្នាក់ឈ្មោះ ឆេង ភាស់ អាយុ ២៦ ឆ្នាំ មានស្រុកកំណើតនៅស្រុកព្រៃកប្បាស ខេត្តតាកែវ ដែលជាអ្នកចាំចម្ការឲ្យគេនៅក្បែរទីតាំងកើតហេតុនោះ។ ប៉ុន្ដែលោកថា មិនអាចរៀបរាប់ប្រាប់ពីហេតុការណ៍នេះបានទេ ហើយក៏បង្វែរសំណួរឲ្យទៅសួរអធិការស្រុកព្រៃនប់លោកហ៊ួ យ៉ៃ ដែលបដិសេធធ្វើអត្ថាធិប្បាយរឿងនោះ។
ទោះជាយ៉ាងណា បណ្ដាញសារព័ត៌មានក្នុងស្រុកមួយនៅថ្ងៃទី ៤ មិថុនា បានដកស្រង់សម្តីពលរដ្ឋម្នាក់សុំមិនបញ្ចេញឈ្មោះ ដោយគាត់បានរៀបរាប់ថា មុនពេលកើតហេតុជនរងគ្រោះឈ្មោះ ឆេង ភាស់ ជាអ្នកចាំដីឲ្យអ្នកមានអំណាចម្នាក់នៅម្ដុំនោះ។ ជនរងគ្រោះស្រវឹងស្រា នៅវេលាម៉ោងប្រហែល ៩ យប់ រូបគេបានមករុញច្រានទ្វារផ្ទះស្ត្រីម្នាក់ ហៅ ម៉ែអាគៀត (ម្ចាស់ផ្ទះដេប៉ូទិញ-លក់ឈើ) ដោយមិនដឹងមូលហេតុ ព្រមទាំងមានសំឡេងស្រែកជេរបញ្ចោរម្ចាស់ផ្ទះ ហើយម្ចាស់ ផ្ទះក៏ជេរត្រឡប់វិញដែរ។
ពលរដ្ឋរូបនេះបន្តថា ភ្លាមៗនោះកូនប្រុសពៅរបស់ម៉ែអាគៀត មិនស្គាល់ឈ្មោះក៏លីកាំបិតផ្គាក់ចេញមកកាប់ទៅលើជនរងគ្រោះដាច់ស្មាម្ខាងធ្លាក់តែម្តង ប៉ុន្ដែមិនទាន់ស្លាប់ទេ។ ហេតុការណ៍បានកើតឡើងបែបនេះ ម៉ែអាគៀតបានទូរស័ព្ទរាយការណ៍ទំនាក់ទំនងជាមួយលោក គង់ សាម៉ៃ នាយប៉ុស្តិ៍រដ្ឋបាលឃុំរាម ឲ្យមកជួយយកជនរងគ្រោះឲ្យផុតពីផ្ទះគាត់ ដោយសន្យាឲ្យប្រាក់ឈ្នួល ១ ម៉ឺនដុល្លារ។ គ្រាន់តែឮដូចនេះ លោកមេប៉ុស្តិ៍ចាត់ការដោយប្រើប្រជាការពារម្នាក់ទៀត ដឹកយកទៅផ្លុងចោល និងបញ្ចប់ជីវិតជនរងគ្រោះនៅក្បែរក្បាល ស្ពានទឹកសាប ក្នុងឃុំរាម ស្រុកព្រៃនប់តែម្តង។
លោកស្រី ជៀប សុធារី មន្ត្រីសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្តព្រះសីហនុ ថ្លែងថា លោកស្រី បានទទួលព័ត៌មាននេះដែរ ប៉ុន្តែលោកស្រីមិនទាន់ដឹងច្បាស់លាស់ពីមូលហេតុនៃការស្លាប់របស់ជនរងគ្រោះនៅឡើយទេ ដោយគ្រោងនឹងចុះស៊ើបអង្កេតលើករណីនេះ។
លោកស្រីសុធារី បានបញ្ជាក់ថា៖ «សូមឲ្យប្រជាពលរដ្ឋ ឬជាសាក្សី ដែលបានដឹងហេតុការណ៍នេះច្បាស់ សូមជួយផ្តល់ព័ត៌មាន ដើម្បីតាមចាប់ឃាតករ ដែលបានសម្លាប់មនុស្សយ៉ាងសាហាវនេះ»៕
