តាកែវៈ អាជ្ញាធរខេត្តតាកែវបាននិងកំពុងសម្របសម្រួលជាមួយវៀតណាមដើម្បីឱ្យពលរដ្ឋកម្ពុជាអាចដឹកស្រូវចេញតាមច្រកបាក់ដៃ ស្ថិតនៅឃុំគោកធ្លក ស្រុកអង្គរបុរី ខេត្តតាកែវ ចូលទៅវៀតណាមបាន បន្ទាប់ពីពលរដ្ឋកម្ពុជាប្រមាណ ១០ នាក់បានឃាត់ទូកដឹកទំនិញរបស់វៀតណាម ២ គ្រឿងដែលបានឆ្លងចូលមកកម្ពុជា។
លោក ព្រហ្ម ប៊ុនថន ប្រធានច្រកបាក់ដៃបានប្រាប់ភ្នំពេញប៉ុស្ដិ៍ពីម្សិលមិញថារដ្ឋបាលខេត្ត អាជ្ញាធរស្រុកអង្គរបុរី និងមន្ត្រីច្រកទ្វារបាក់ដៃកំពុងសម្របសម្រួលជាមួយភាគីវៀតណាមដើម្បីឱ្យភាគី វៀតណាមអនុញ្ញាតឱ្យពលរដ្ឋកម្ពុជាអាចនាំចេញស្រូវពួកគេទៅវៀតណាមតាមច្រកបាក់ដៃបាន។
លោក ព្រហ្ម ប៊ុនថន ឱ្យដឹងថា កន្លងមកខាងភាគីវៀតណាមមិនអនុញ្ញាតឱ្យពលរដ្ឋកម្ពុជានាំស្រូវចេញតាមច្រកនេះទេ ដោយឱ្យនាំចូលតាមច្រកអន្តរជាតិភ្នំដិន និងច្រកទ្វារព្រំដែនទ្វេភាគីកំពង់ក្រសាំង។ ប៉ុន្តែយ៉ាងណាក្ដី ភាគីកម្ពុជានឹងខិតខំសម្រួលជាមួយភាគីវៀតណាមដើម្បីឱ្យមានការយោគយល់លើការនាំទំនិញកម្ពុជាដូចជាស្រូវជាដើមទៅវៀតណាមតាមច្រកបាក់ដៃនេះដោយអនុវត្តតាមវិធានក្រសួងសុខាភិបាល។
លោកថា៖ «ក្នុងខេត្តតាកែវមានច្រកអន្តរជាតិភ្នំដិន និងច្រកទ្វេភាគីកំពង់ក្រសាំងដែលអាចដឹកស្រូវនាំចេញបាន ប៉ុន្តែសម្រាប់ច្រកបាក់ដៃជាច្រកទ្វារតំបន់វៀតណាមមិនឱ្យដឹកទំនិញទូទៅបានច្រើនទេ មានតែប្រភេទមុខទំនិញមួយចំនួនដែលត្រូវបានកំណត់ប៉ុណ្ណោះ ហើយចំពោះស្រូវគេឱ្យនាំចេញទៅកាន់ច្រកអន្តរជាតិ និងទ្វេភាគីអន្តរជាតិ»។
ទោះបីជាយ៉ាងណា ពលរដ្ឋកម្ពុជាបានទាមទារឱ្យភាគីវៀតណាមបើកច្រកបាក់ដៃនេះថែម ១ ទៀតក៏នាំគ្នាចុះឃាត់ទូកដឹកទំនិញរបស់វៀតណាម ២ គ្រឿងពីថ្ងៃទី ២៤ មីនា។ ការឃាត់ទូកវៀតណាមនេះវានឹងធ្វើឱ្យប៉ះពាល់ដល់ចំណូលរបស់ជាតិផងដែរ បើមិនមានការដោះស្រាយសមស្របនោះ។
បើតាមលោក ប៊ុនថន ភាគីវៀតណាម បើក ឬមិនបើកច្រកនេះ វាជាសិទ្ធិរបស់គេ ប៉ុន្តែគេក៏បានប្រាប់ដែរថា គេកំពុងស្នើសុំទៅមន្ត្រីថ្នាក់លើដើម្បីសម្រេច តែរហូតមកទល់ពេលនេះគឺមិនទាន់មានលទ្ធផលទេ។
លោក ឌឹម គឹមសាន អភិបាលស្រុកអង្គរបុរីថ្លែងថា ករណីនេះលោកបានចរចាជាមួយភាគីវៀតណាតជាច្រើនលើកមកហើយ ដើម្បីឱ្យបើកច្រកនេះ ដែលអាចឱ្យពលរដ្ឋកម្ពុជានាំស្រូវចេញតាមរដូវប្រមូលផលបាន ប៉ុន្តែភាគីវៀតណាមតម្រូវឱ្យមានឯកសារគ្រប់គ្រាន់។
លោកថ្លែងថា៖ «ទំនិញវៀតណាមដែលពលរដ្ឋខ្មែរឃាត់នោះគឺគេមានច្បាប់បង់ពន្ធអីត្រឹមត្រូវ ប៉ុន្តែស្រូវរបស់ពលរដ្ឋខ្មែរ ដែលបម្រុងនាំចេញនេះគឺវាខ្វះបែបបទ (CO) ដូច្នេះគេតម្រូវឱ្យមានគ្រប់គ្រាន់ហើយខាងវៀតណាមក៏គេត្រៀមទទួលយកស្រូវនេះដែរ»។
លោកបានបន្ថែមថា ពលរដ្ឋខ្មែរមួយចំនួនមិនយល់ពីនីតិវិធីនៃច្បាប់នាំចេញហើយពួកគាត់ក៏ចង់នាំចេញស្រូវចេញឱ្យបានលឿនក៏នាំគ្នាឃាត់ទូកទំនិញវៀតណាមដែលស្របច្បាប់ទៅ។
យ៉ាងណាក្ដី ភ្នំពេញ ប៉ុស្ដិ៍ មិនអាចទាក់ទងទៅតំណាងពលរដ្ឋទាំង ១០ នាក់ដើម្បីអត្ថាធិប្បាយបានទេកាលពីម្សិលមិញ។ ក៏ប៉ុន្តែពីថ្ងៃទី ២៤ ខែមីនា ពលរដ្ឋទាំងនោះបានអះអាងថា ការឃាត់ទូកវៀតណាម ២ គ្រឿងនេះគឺជាការឆ្លើយតបចំពោះការហាមឃាត់ទូកដឹកស្រូវពួកគាត់ចូលទៅវៀតណាម៕