ភ្នំពេញៈ មន្ត្រីជាន់ខ្ពស់ក្រសួងការពារជាតិ និងអ្នកនាំពាក្យរាជរដ្ឋាភិបាលកម្ពុជាបានស្វាគមន៍និងចាត់ទុកសេចក្ដីថ្លែងការណ៍របស់លោក Mike Pompeo រដ្ឋមន្ត្រីការបរទេសអាមេរិកថា បានផ្តល់យុត្តិធម៌ដល់រាជរដ្ឋាភិបាលកម្ពុជាពាក់ព័ន្ធទៅនឹងរបាយការណ៍នៃការតាំងមូលដ្ឋានកងទ័ពចិន នៅក្នុងទឹកដីខេត្តព្រះសីហនុ។
ការស្វាគមន៍របស់លោក ឈុំ សុជាត អ្នកនាំពាក្យក្រសួងការពារជាតិនិងលោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានធ្វើឡើង បន្ទាប់ពីលោក Mike Pompeo បានស្វាគមន៍ចំពោះការបដិសេធរបស់កម្ពុជាពីព័ត៌មានទាក់ទងនឹងមូលដ្ឋានយោធាចិនក្នុងទឹកដីខេត្តព្រះសីហនុ និងបានសរសើរពីការប្តេជ្ញាការពារបូរណភាពដែនដីរបស់កម្ពុជា។
កាលពីថ្ងៃព្រហស្បតិ៍សប្ដាហ៍មុនលោក Mike Pompeo បានថ្លែងក្នុងសន្និសីទសារព័ត៌មានក្នុងកិច្ចប្រជុំរដ្ឋមន្ត្រីការបរទេសអាស៊ាននៅទីក្រុងបាងកកប្រទេសថៃថា៖«ប្រទេសកម្ពុជាបានបដិសេធរបាយការណ៍ដែលថាកម្ពុជាអនុញ្ញាតឲ្យមានមូលដ្ឋានយោធាចិននៅលើទឹកដីរបស់ខ្លួន។ សហរដ្ឋអាមេរិកស្វាគមន៍ការការពារអធិបតេយ្យ បូរណភាពដែនដីដ៏ខ្លាំងក្លារបស់កម្ពុជា ហើយលើកទឹកចិត្តដល់ប្រទេសផ្សេងទៀតក្នុងតំបន់ឲ្យធ្វើតាមលំនាំរបស់កម្ពុជា»។
លោក ឈុំ សុជាត បានថ្លែងប្រាប់កាសែតភ្នំពេញប៉ុស្តិ៍កាលពីម្សិលមិញថា ការប្រកាសរបស់លោក Mike Pompeo បែបនេះគឺជាសញ្ញានៃការទទួលស្គាល់ការពិត និងផ្តល់យុត្តិធម៌ដល់កម្ពុជា។
លោកថា៖ «នេះគឺជាការឆ្លើយតបដោយវិជ្ជមានរបស់លោក Mike Pompeo រដ្ឋមន្ត្រីការបរទេសអាមេរិក ហើយខ្ញុំសង្ឃឹមថា បណ្តាប្រព័ន្ធផ្សព្វផ្សាយទាំងអស់របស់សហរដ្ឋអាមេរិកនិងអន្តរជាតិផ្សេងទៀតនឹងផ្សព្វផ្សាយនូវព័ត៌មានពិត និងបញ្ឈប់ការផ្សាយព័ត៌មាន Fake News»។
ទន្ទឹមនឹងនេះដែរ លោកផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានសម្ដែងការអរគុណដល់លោក Mike Pompeo ដោយចាត់ទុកសេចក្ដីថ្លែងការណ៍របស់លោកថា ជាការផ្តល់យុត្តិធម៌ដល់រាជរដ្ឋាភិបាលកម្ពុជា។
លោកបានសរសេរលើហ្វេសប៊ុកកាលពីថ្ងៃទី ២ ខែ សីហា ថា៖ «សេចក្ដីថ្លែងការណ៍របស់ឯកឧត្តម Mike Pompeo គឺជាប្រវត្តិសាស្ដ្រថ្មីមួយបន្ថែមទៀត នៃទំនាក់ទំនង និងកិច្ចសហប្រតិបត្តិការរវាងកម្ពុជានិងសហរដ្ឋអាមេរិក។ ជាសារមួយដ៏មានសារៈសំខាន់ក្នុងការបញ្ចប់យុទ្ធនាការអមិត្ត និងញុះញង់របស់ជនក្រុមឬអង្គការណាមួយដែលយកផលប្រយោជន៍នយោបាយរបស់ខ្លួនគេជាអាទិភាព ហើយបង្កើតអរិភាពរវាងប្រជាជាតិយើងទាំង ២ ខ្មែរអាមេរិក ដែលបង្កើតបាននូវការយល់ច្រឡំដ៏អាក្រក់បំផុត»។
លោកបានបន្ថែមថា សេចក្ដីថ្លែងការណ៍របស់លោក Mike Pompeo គឺជាការទទួលស្គាល់ចំពោះកិច្ចប្រឹងប្រែងរបស់លោកនាយករដ្ឋមន្ត្រីកម្ពុជាក្នុងកិច្ចការពារអព្យាក្រឹត និងអធិបតេយ្យភាពកម្ពុជាក៏ដូចជាប្រឆាំងនឹង ព័ត៌មានប្រឌិត ។
លោកថា៖ «ខ្ញុំសូមថ្លែងអំណរគុណចំពោះលោក Mike Pompeo ក៏ដូចជា ប្រជាពលរដ្ឋអាមេរិកដែលឱ្យតម្លៃដល់សច្ចភាព និងសន្ដិភាពរួមជាមួយកិច្ចសហប្រតិបត្តិការដ៏ជិតស្និទ្ធរវាងប្រជាជាតិយើងទាំង ២» ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានហៅសេចក្តីថ្លែងកាណ៍របស់លោក Mike Pompeo ថាជាការលាងជម្រះ និងបញ្ចប់ការចោទកម្ពុជាពីការអនុញ្ញាតឲ្យមានការតាំងមូលដ្ឋានទ័ពចិននៅខេត្តព្រះសីហនុនិងថាសារនេះអាចជួយស្តារទំនាក់ទំនងរវាងប្រទេសប្រទេសទាំង ២។
លោកបញ្ជាក់ថា៖ «នេះគឺជាការរុញទូកបណ្តោយទឹក ប្រសិនបើថ្ងៃក្រោយប្រទេសកម្ពុជា មានមូលដ្ឋានយោធាចិនដូចការចោទប្រកាន់ វាគឺជាការទទួលខុសត្រូវរបស់កម្ពុជាផ្ទាល់ប្រសិនបើសេចក្តីថ្លែងការណ៍នេះសុទ្ធចិត្ត និងស្មោះត្រង់គឺជាចំណុចល្អក្នុងការធ្វើឲ្យមានទំនាក់ទំនងល្អ តែបើវាគ្រាន់តែជាការបិទបាំង វាពិបាកក្នុង ការស្វាគមន៍»។
លោក ឡៅ ម៉ុងហៃ អ្នកវិភាគនយោបាយបានថ្លែងថាសម្ដីសំដៅរបស់រដ្ឋមន្ត្រីក្រសួងការបរទេសអាមេរិក គ្រាន់តែថា បានទទួលពត៌មានថាកម្ពុជាបានបដិសេធរបាយការណ៍ពីទីតាំងយោធាចិនមួយត្រូវបានអនុញ្ញាតឲ្យសាងសង់នៅលើទឹកដីរបស់ខ្លួន។
លោកបានបញ្ជាក់ថា៖ «គឺដូចជាថា (គាត់) បានទទួលសារមួយដែលគេបានផ្ញើជូនគាត់។ វាមិនច្បាស់ទេដែលថាគាត់បានយល់ស្របទៅលើខ្លឹមសារនោះ ហើយក្នុងករណីនេះ ខ្លឹមសារនោះគឺការអះអាងរបស់កម្ពុជា ដែលផ្ទុយនឹងរបាយការណ៍ទាំងនោះ។ដូច្នេះបញ្ហាដែលគេអះអាងថា មានទីតាំងយោធាចិននៅលើទឹកដីខ្មែរអត់ត្រូវបានដោះស្រាយចប់នៅឡើយទេ»។
លោក ឡៅ ម៉ុងហៃ បានបន្តថា តាមពិតទៅ រដ្ឋមន្ត្រីក្រសួងការបរទេសអាមេរិក បានឲ្យតម្លៃដល់កម្ពុជាដែលការពារអធិបតេយ្យរបស់ខ្លួនយ៉ាងខ្លាំងក្លាក្នុងបរិបទនៃយុទ្ធសាស្ត្ររបស់គាត់ដែលជំរុញឲ្យប្រទេសក្នុងតំបន់ការពារអធិបតេយ្យរៀងៗខ្លួន ប្រឆាំងនឹងការបង្កើនកម្លាំងយោធាកាន់តែខ្លាំងឡើងរបស់ចិន។
លោកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកនៅភ្នំពេញ មិនមានការឆ្លើយតបទេ នៅពេលភ្នំពេញប៉ុស្តិ៍ទាក់ទងសុំអត្ថាធិប្បាយកាលពីថ្ងៃម្សិលមិញ។
កាលពីចុងខែកក្កដាឆ្នាំ ២០១៩ កាសែត The Wall Street Journal បានដកស្រង់សម្តីមន្ត្រីអាមេរិកម្នាក់ និងមន្ត្រីដែលធ្វើកិច្ចការនេះ តែមិនបានប្រាប់ឈ្មោះមកផ្សព្វផ្សាយថាប្រទេស ចិន និងកម្ពុជា បានចុះហត្ថលេខាលើកិច្ចព្រមព្រៀងសម្ងាត់មួយដោយអនុញ្ញាតឲ្យកងទ័ពចិនប្រើមូលដ្ឋានទ័ពជើងទឹកកម្ពុជានៅសមុទ្ររាមខេត្តព្រះសីហនុ រយៈពេល ៣០ ឆ្នាំ។ ប៉ុន្តែភ្លាមៗនោះត្រូវបានលោកនាយករដ្ឋមន្ត្រី ហ៊ុន សែន និងលោក ទៀ បាញ់ រដ្ឋមន្ត្រីក្រសួងការពារជាតិបដិសេធដោយចាត់ទុកថាជា «ព័ត៌មានដ៏អាក្រក់បំផុត» ប្រឆាំងនឹងកម្ពុជា៕