ឯកអគ្គរាជទូតជប៉ុនប្រចាំកម្ពុជា លោក Masahiro Mikami និងមន្ត្រីកម្មវិធីស្បៀងអាហារពិភពលោក (WFP) ពីម្សិលមិញបានចុះទៅពិនិត្យមជ្ឈមណ្ឌលសុវត្ថិភាពដែលសាងសង់ថ្មី និងកម្មវិធីផ្តល់អាហារតាមសាលារៀនមួយចំនួនដែលងាយរងគ្រោះនៅខេត្តកំពង់ធំ ដើម្បីគាំទ្រដល់វិស័យសន្តិសុខស្បៀងអាហារូបត្ថម្ភ និងការត្រៀមខ្លួនមុនគ្រាមានអាសន្ន។
កម្មវិធីនេះត្រូវបានអនុវត្តក្នុងភាពជាដៃគូជាមួយក្រសួងអប់រំយុវជន និងកីឡា និងគណៈកម្មាធិការជាតិគ្រប់គ្រងគ្រោះមហន្តរាយដែលបង្ហាញភាពជាដៃគូយូរអង្វែងរវាងរដ្ឋាភិបាលជប៉ុន និងកម្មវិធីស្បៀងអាហារពិភពលោក ក្នុងការគាំទ្រដល់វិស័យសន្តិសុខស្បៀង និងអាហារូបត្ថម្ភ ក៏ដូចជាការត្រៀមរៀបចំខ្លួនឱ្យបានមុនគ្រាមានអាសន្ននៅកម្ពុជា។
លោក Masahiro Mikami ថ្លែងក្នុងដំណើរទស្សនកិច្ចនោះថា កម្មវិធីស្បៀងអាហារពិភពលោក និងរដ្ឋាភិបាលជប៉ុន បានធ្វើការជាមួយគ្នាអស់រយៈពេលជាច្រើនឆ្នាំមកហើយ ដើម្បីលុបបំបាត់ភាពអត់ឃ្លាន និងកាត់បន្ថយភាពក្រីក្រនៅកម្ពុជា។ បន្ទាប់ពីមានគម្រោងនេះ លោកបានទន្ទឹងរង់ចាំឱ្យមានដំណើរទស្សនកិច្ចផ្លូវការ ដើម្បីចុះពិនិត្យស្ថានភាពជាក់ស្ដែង។
ចាប់តាំងពីឆ្នាំ ១៩៩៨ មករដ្ឋាភិបាលជប៉ុន គឺជាដៃគូដ៏សំខាន់មួយសម្រាប់ការងាររបស់កម្មវិធីស្បៀងអាហារពិភពលោកនៅកម្ពុជា ដោយបានចូលរួមវិភាគទានចំនួន២២លានដុល្លាអាមេរិកក្នុងរយៈពេល ១០ ឆ្នាំចុងក្រោយនេះតាមរយៈជំនួយ (អង្ករ ត្រីខកំប៉ុង)។ រីឯវិភាគទានជាសាច់ប្រាក់ក្នុងការគាំទ្រសន្តិសុខស្បៀង និងអាហារូបត្ថម្ភ រួមមាន ការផ្តល់ចំណីអាហារនៅសាលារៀន ក៏ដូចជាការត្រៀម និងការឆ្លើយតបបញ្ហាបន្ទាន់ៗមួយចំនួន។ នេះជាការបញ្ជាក់ពីមន្ត្រីការទូតជាន់ខ្ពស់រូបនេះ។
លោកថ្លែងថា៖ «ការផ្តល់អាហារនៅតាមសាលារៀន គឺជាការផ្តល់អាហារប្រកបដោយសុវត្ថិភាព និងជីវជាតិដល់កុមារថ្នាក់ត្រៀមចូលបឋមសិក្សានិងបឋមសិក្សានៅក្នុងសហគមន៍ដែលងាយរងគ្រោះ។ វាលើកទឹកចិត្តកុមារឱ្យចុះឈ្មោះចូលរៀននិងចូលរៀនជាប្រចាំរួមទាំងកាត់បន្ថយភាពអត់ឃ្លានរយៈពេលខ្លីធ្វើឱ្យប្រសើរឡើងនូវការផ្តោតអារម្មណ៍ក្នុងអំឡុងពេលសិក្សា»។
លោកបញ្ជាក់ថា៖ «ដូច្នេះវារួមចំណែកដល់លទ្ធផលនៃការអប់រំ និងអាហារូបត្ថម្ភ ខណៈដែលវាដើរតួជាបណ្តាញ សុវត្ថិភាពដ៏សំខាន់សម្រាប់គ្រួសារដែលងាយរងគ្រោះបំផុត»។
បើតាមលោក Masahiro Mikami សម្រាប់នៅឆ្នាំ ២០១៩ ជប៉ុនបានចូលរួមវិភាគទានចំនួន ២.៧ លានដុល្លារអាមេរិក ដល់កម្មវិធីស្បៀងអាហារពិភពលោក ដើម្បីលើកកម្ពស់ភាពធន់របស់សហគមន៍កម្ពុជាដែលងាយរងគ្រោះ និងកសាងសមត្ថភាពស្ថាប័នក្នុងការត្រៀមលក្ខណៈសង្គ្រោះបន្ទាន់។ ដូច្នេះការគាំទ្រនេះបានជួយឱ្យមានការសាងសង់មជ្ឈមណ្ឌលជម្លៀសដែលមានសុវត្ថិភាពចំនួន ៦ នៅក្នុងខេត្តចំនួន ៣ ដែលជាខេត្តងាយរងគ្រោះដោយទឹកជំនន់។ ពង្រឹងការគ្រប់គ្រងផែនការ គ្រប់គ្រងគ្រោះមហន្តរាយនៅថ្នាក់ជាតិ ថ្នាក់ក្រោមជាតិ និងសហគមន៍មូលដ្ឋាន និងពង្រឹងសកម្មភាពមុនពេលតាមរយៈប្រព័ន្ធប្រកាសអាសន្ន។
លោកស្រី Claire Conan តំណាងកម្មវិធីស្បៀងអាហារពិភពលោកបានថ្លែងថា គ្រោះទឹកជំនន់ធ្ងន់ធ្ងរដែលបានប៉ះពាល់ដល់ប្រជាជនជាង ៨០ ម៉ឺននាក់ នៅទូទាំងខេត្ត ចំនួន ១៩ នៅកម្ពុជាកាលពីអំឡុងខែតុលា គឺជាការកត់សម្គាល់ដ៏សំខាន់មួយអំពីសារៈសំខាន់នៃការខិតខំរួមគ្នាក្នុងការរៀបចំនិងឆ្លើយតបចំពោះគ្រោះមហន្តរាយ។
លោកស្រីបញ្ជាក់ថា៖ «ការគាំទ្ររបស់រដ្ឋាភិបាលជប៉ុនក្នុងការកសាងមជ្ឈមណ្ឌលជម្លៀសដែលមានសុវត្ថិភាពចំនួន ៦ និងបង្កើនការត្រៀមរៀបចំជាបន្ទាន់នៅកម្រិតសហគមន៍ គឺជាចំណុចសំខាន់ក្នុងការជួយសង្គ្រោះជីវិត និងការរស់នៅរបស់ពលរដ្ឋក្នុងប្រទេសកម្ពុជា»។
តាមសេចក្ដីប្រកាសព័ត៌មានរបស់កម្មវិធីស្បៀងអាហារពិភពលោកឱ្យដឹងពីម្សិលមិញថា បេសកកម្មនេះត្រូវបានធ្វើដំណើរទៅកាន់សាលាបឋមសិក្សាជីមាក ខេត្តកំពង់ធំ ដើម្បីសង្កេតមើលកម្មវិធីផ្តល់អាហារដល់សាលារៀននិងបន្តដំណើរទៅកាន់ឃុំដែលងាយលិចទឹកក្នុងឃុំខ្សាច់ជីរួស ដើម្បីពិនិត្យមើលមជ្ឈមណ្ឌលជម្លៀសមួយក្នុងចំណោមមជ្ឈមណ្ឌលជម្លៀសទាំង ៦ ដែលកំពុងសាងសង់ក្នុងខេត្តចំនួន៣ផ្សេងទៀត៕