.jpg)
សិស្សចេញពីប្រឡងមធ្យមសិក្សទុតិយភូមិ នៅវិទ្យាល័យបឹងត្របែក។ រូបថត ហ៊ាន រង្សី
ភ្នំពេញៈ សមាជិកកំណែវិញ្ញាសារូបវិទ្យាម្នាក់សុំមិនបញ្ចេញឈ្មោះបានប្រាប់ភ្នំពេញប៉ុស្តិ៍ពីម្សិលមិញថា វិញ្ញាសារូបវិទ្យាប្រឡង (បាក់ឌុប) នៅឆ្នាំនេះគឺមានកំហុសត្រង់បាត់លេខសម្មតិកម្មក្នុងលំហាត់ទី ៣ ដែលមិនអាចឲ្យសិស្សរកចម្លើយតាមការចោទសួរបាន។
លោកថា៖ «ព្រោះនេះឧបមាថា ដូចជាលំហាត់វាអត់មានលេខអ៊ីចឹង។ លេខសម្មតិកម្មអត់គ្រប់គ្រាន់អ៊ីចឹង។ សិស្សមិនអាចធ្វើដោយ (មាន) ចម្លើយបានទេ។ និយាយចំអត់លេខ...ប្រសិនបើរកចម្លើយក៏អត់ចេញលេខដូចលំហាត់ផ្សេងទៀតដែរ»។
យ៉ាងណាក្ដីលោកថា សិស្សធ្វើលំហាត់ធម្មតា ប៉ុន្តែការឱ្យពិន្ទុមាន ៣ ប្រភេទ គឺប្រសិនបើសិស្សមិនធ្វើ ឬមិនសរសេរសោះគឺទទួលបាន ៥ ពិន្ទុ។
តែបើសរសេរលេខប្រធានលំហាត់ហើយគណនាបន្តិចគឺបាន ៧ ពិន្ទុ ហើយបើសិស្សបានសរសេរហើយមានរូបមន្តទៀតគឺទទួលបាន ១០ ពិន្ទុពេញ។ តែសិស្សភាគច្រើនទទួលបាន ៧ ពិន្ទុ។
លោកបន្តថាការចេញវិញ្ញាសាលំហាត់ធ្វើឱ្យសិស្សមិនអាចរកចម្លើយឃើញបែបនេះមិនមែនល្អទេ។ លោកថា៖ «ប្រសិនបើលំហាត់ហ្នឹងដាក់លេខឱ្យសិស្សធ្វើទៅវាអត់ពិបាកទេ។
សិស្សអាចធ្វើបាន។ តែសិស្សទូទៅទាក់ត្រង់ថា អត់មានលេខ។ អ៊ីចឹងសិស្សអត់ហ៊ានដោះស្រាយ។ សិស្ស (មិនដឹង) ធ្វើតាមណា? សិស្សធ្លាប់តែរៀនជាទូទៅគឺវាមានលេខ។ ប៉ុន្តែលំហាត់ខ្លះក៏វាអត់សម្មតិកម្មអ៊ីចឹងដែរ។ ប៉ុន្តែគ្រាន់តែលក្ខណៈសួរសំណួរជាអនុគមន៍។ ប៉ុន្តែលំហាត់នេះអត់សួរសំណួរបែបនេះផង។ សួរលក្ខណៈចង់ឱ្យសិស្សរកឃើញចម្លើយ។ ប៉ុន្តែខ្លួនឯង អត់ដាក់លេខឱ្យគ្នា»។
លោកថ្លែងថា៖ «ក្រសួងគួរតែបន្តឹងវិញ្ញាសា ហើយចៀសវាងកំហុសឆ្គង ហើយសុំពិនិត្យឱ្យបានច្បាស់លាស់មុននឹងចេញប្រធាន (វិញ្ញាសា) ឱ្យសិស្សប្រឡង»។
លោកបញ្ជាក់ថា សិស្សដែលមានសមត្ថភាពក៏អាចមើលដឹងថាលំហាត់ក្នុងវិញ្ញាសានេះមានបញ្ហាដែរព្រោះសម្មតិកម្មលំហាត់មិនអាចបាត់បាននោះទេ។
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្តិ៍ថាក្រសួងអប់រំ កំពុងតែស្រង់យកមតិយោបល់ពីសាធារណជនដើម្បីទុកពិចារណាថាតើ អាចនឹងមានទម្ងន់បើកឱ្យមានការពិនិត្យស្រាវជ្រាវករណីពាក់ព័ន្ធទាំងអស់ក្នុងកម្រិតណា។
លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានប្រាប់ភ្នំពេញប៉ុស្ដិ៍កាលពីម្សិលមិញថា នេះជារឿងមួយដែលគួរឱ្យសោកស្តាយ។ ប្រសិនបើវិញ្ញាសាត្រឹមត្រូវ ប្រហែលជាសិស្សមួយចំនួនដោះស្រាយលំហាត់បានល្អ។ តែបើប្រធានវិញ្ញាសាមិនត្រឹមត្រូវ មិនដឹងឱ្យសិស្សដោះស្រាយយ៉ាងម៉េច?
លោកថា៖ «បើតាមខ្ញុំយល់ ក្រសួងគួរឱ្យពិន្ទុគេ ១០ ទៅ ព្រោះអីអាហ្នឹងជាកំហុសរបស់ក្រសួង ត្រូវតែទទួលខុសត្រូវ។ កាលណាក្រសួងមានការថ្លោះធ្លោយក្នុងការដាក់វិញ្ញាសា ក្រសួងត្រូវតែមានការទទួលខុសត្រូវ។ មិនមែនឱ្យគេពាក់កណ្តាល។ មិនមែនថាគេអត់ធ្វើសោះឱ្យគេពាក់កណ្តាល។ អត់ធ្វើសោះក៏ឱ្យ ១០ ដែរ។ អ្នកណាធ្វើក៏ដោយត្រូវឱ្យ ១០ ទាំងអស់គ្នា»។
លោកថាការឱ្យពិន្ទុ ១០ ដូច្នេះគឺដើម្បីលើកក្រោយឱ្យក្រសួងមានការទទួលខុសត្រូវកាន់តែធំទៀត៕
