កោះកុងៈ អ្នកនាំពាក្យរដ្ឋបាលខេត្តកោះកុងនិយាយនៅថ្ងៃអាទិត្យថា ក្រុមការងារបច្ចេកទេសកំពុងបន្តចុះពិនិត្យទីតាំងដីមួយចំនួននៅឃុំជ្រោយស្វាយ និង ឃុំបឹងព្រាវ ស្រុកស្រែអំបិល ដែលសង្ស័យមានការទន្ទ្រានកាន់កាប់ដីរដ្ឋដោយខុសច្បាប់ក្នុងតំបន់របៀងជីវចម្រុះ និងតំបន់ប្រើប្រាស់ច្រើនយ៉ាង។
លោក សុខ សុទ្ធី អភិបាលរង និងជាអ្នកនាំពាក្យរដ្ឋបាលខេត្តកោះកុងប្រាប់ ភ្នំពេញ ប៉ុស្តិ៍ថា ការចុះពិនិត្យទីតាំងដីដែលសង្ស័យមានការចូលទន្ទ្រានកាន់កាប់ដីរដ្ឋនេះក្នុងគោលបំណងធ្វើការវាស់វែង និងកំណត់និយាមកាទីតាំងដីនីមួយៗឲ្យបានច្បាស់លាស់ដើម្បីសិក្សាស្រាវជ្រាវស្វែងរកឲ្យឃើញនូវអត្តសញ្ញាណជនសង្ស័យដើម្បីចាត់វិធានការតាមនីតិវិធីច្បាប់រដ្ឋបាល ឬកសាងសំណុំរឿងបញ្ជូនទៅតុលាការចាត់វិធានការតាមច្បាប់។
លោកបញ្ជាក់ថា៖ «ទីតាំងដីរដ្ឋ ដែលសង្ស័យមានការចូលទន្ទ្រាន កាន់កាប់ដោយខុសច្បាប់ទាំងនោះមានស្ថិតនៅក្នុងឃុំជ្រោយស្វាយ និងឃុំបឹងព្រាវ ស្រុកស្រែអំបិលដែលស្ថិតនៅក្នុងតំបន់ប្រើប្រាស់ច្រើនយ៉ាងដងពែង និងតំបន់ សហគមន៍ត្រពាំងប្រើសដែលជារបៀងជីវចម្រុះដ៏សំខាន់»។
បើតាមលោក សុទ្ធី ទីតាំងដីមួយចំនួននៅក្នុងតំបន់ភូមិសាស្ត្រខាងលើនេះមានកន្លែងខ្លះត្រូវបានរដ្ឋាភិបាលកាត់ឆ្វៀលជូនពលរដ្ឋ ដែលរស់នៅក្នុងតំបន់នោះ។ ហេតុដូច្នេះទើបក្រុមការងារ បច្ចេកទេសបានចាត់ទុកទីតាំងដែលមានការកាប់រានថ្មីមួយចំនួនក្នុងតំបន់នោះជាករណីសង្ស័យមានការចូលបំពានកាន់កាប់ដោយខុសច្បាប់ ព្រោះកន្លងមកក៏មានពលរដ្ឋមួយចំនួនបានឆ្លៀតឱកាសពេលអាជ្ញាធរខេត្តកំពុងជាប់រវល់ក្នុងកិច្ចការប្រយុទ្ធប្រឆាំងជំងឺរាតត្បាតកូវីដ ១៩ បាននាំគ្នាលួចទន្ទ្រានចូលកាន់កាប់ដីរដ្ឋដោយខុសច្បាប់តាមរយៈការចាក់ដីលុបចូលដីចំណីព្រែក ព្រៃកោងកាង និងកាប់រានដីព្រៃក្នុងតំបន់ការពារ និងអភិរក្សជីវចម្រុះ។
លោកបញ្ជាក់ថា៖ «ទោះយ៉ាងណានៅពេលនេះក្រុមការងាររបស់យើង កំពុងសិក្សាបន្ថែមទៀតទៅលើទីតាំងដីដែលប្រជាពលរដ្ឋកំពុងរស់នៅ និងអាស្រ័យផលថា តើមានការគ្របដណ្ដប់លើផ្ទៃដីក្នុងតំបន់ប្រើប្រាស់ច្រើនយ៉ាងដងពែង និងសហគមន៍ត្រពាំងប្រើសប៉ុនណា ដើម្បីមានចំណាត់ការតាមនីតិវិធីច្បាប់រដ្ឋបាល»។
លោកបន្តថា ការងារចុះត្រួតពិនិត្យ វាស់វែង និងកំណត់និយាមកាទីតាំងដីទាំងនោះធ្វើឡើងកាលពីថ្ងៃទី ៣ មេសា ដោយមានការចូលរួមពីមន្ទីរបរិស្ថាន មន្ទីររៀបចំដែនដី នគរូបនីយកម្ម សំណង់ និង សុរិយោដី រដ្ឋបាលស្រុកស្រែអំបិល មេឃុំ មេភូមិ និងមានការចូលរួមសហការពីតំណាងអយ្យការអមសាលាដំបូងខេត្តកោះកុងផងដែរ។
លោកបានណែនាំឱ្យអាជ្ញាធរមូលដ្ឋាន សហការជាមួយមន្ទីរអង្គភាពជំនាញទប់ស្កាត់ តាមដាន និងចាត់វិធានការម៉ឺងម៉ាត់ចំពោះការទន្ទ្រានដីរដ្ឋខុសច្បាប់៕