.jpg)
លោក ប៉ុល ហំម ឆ្លើយសំណួរអ្នកសារព័ត៌មានពីឆ្នាំ ២០១៧។ ហុង មិនា
ភ្នំពេញៈ មន្ត្រីជំនាញនៃក្រសួងមហាផ្ទៃបាននិងកំពុងពិនិត្យលើលិខិតស្នើសុំនីតិសម្បទានយោបាយឡើងវិញរបស់លោក ប៉ុល ហំម អតីតមន្ត្រីជាន់ខ្ពស់ និងលោក ផាន់ ច័ន្ទសាក់ សមាជិកនៃអតីតគណបក្សសង្គ្រោះជាតិ ក្រោយពីលោកទាំង ២ បានស្នើទៅក្រសួងនេះកាលពី ២ ថ្ងៃមុន។
លោក ឈឹម កាន អគ្គនាយករងនៃអគ្គនាយកដ្ឋានរដ្ឋបាលនៃក្រសួងមហាផ្ទៃប្រាប់ភ្នំពេញប៉ុស្តិ៍កាលពីម្សិលមិញថា ក្រសួងបានទទួលរួចហើយនូវសំណើសុំនីតិសម្បទានយោបាយឡើងវិញរបស់លោក ប៉ុល ហំម និង លោក ផាន់ ច័ន្ទសាក់ កាលពីថ្ងៃទី ១៧ ខែឧសភា។
លោកបានបន្តថា មន្ត្រីជំនាញរបស់ក្រសួងបាននិងកំពុងពិនិត្យមើលទៅលើសំណើរបស់បុគ្គលទាំង ២ នេះ ហើយប្រសិនបើគ្មានបញ្ហាអ្វីទេ ក្រសួងនឹងដាក់សំណើទៅព្រះមហាក្សត្រ ដើម្បីផ្តល់នីតិសម្បទានយោបាយជូនពួកគាត់វិញ។
លោក ឈឹម កាន បានបញ្ជាក់ថា៖ «បើគាត់អត់មានអនុវត្តខុសឆ្គងទេ នៅក្នុងដំណាក់កាលនៃការបិទសិទ្ធិហ្នឹង និងមិនមានសកម្មភាពល្មើសរបស់តុលាការ យើងប្រគល់ជូនគាត់ហើយ»។
បើតាមលោក ឈឹម កាន រហូតមកទល់ពេលនេះមានមន្ត្រីអតីតគណបក្សសង្គ្រោះជាតិចំនួន ២២ រូបហើយ ដែលត្រូវបានព្រះមហាក្សត្រផ្តល់តិសម្បទានយោបាយឡើងវិញ ហើយបើថែមទាំងបុគ្គល ២ រូបចុងក្រោយនេះនឹងកើនដល់ ២៤ រូប។
ភ្នំពេញប៉ុស្តិ៍មិនអាចទាក់ទង លោក ប៉ុល ហំម ដើម្បីសុំធ្វើអត្ថាធិប្បាយបានទេ កាលពីម្សិលមិញ។ ក៏ប៉ុន្តែលោក ផាន់ ច័ន្ទសាក់ ឱ្យដឹងថា ការដាក់ពាក្យស្នើសុំនីតិសម្បទានយោបាយឡើងវិញនេះគឺដើម្បីធ្វើនយោបាយឡើងវិញ ក្រោយពីសិទ្ធិនយោបាយរបស់លោកត្រូវបានព្យួរអស់ ៣ ឆ្នាំកន្លះមក។
លោក ច័ន្ទសាក់ បានបន្តថា នៅពេលទទួលបាននីតិសម្បទានយោបាយឡើងវិញ រូបលោកនឹងទៅចូលរួមអាជីពនយោបាយជាមួយលោក អ៊ូ ច័ន្ទរ័ត្ន ដែលបានបង្កើតគណបក្សថ្មីរួចហើយ គឺគណបក្សកែទម្រង់កម្ពុជា និងបានចុះបញ្ជីនៅក្នុងក្រសួងមហាផ្ទៃរួចហើយដែរ។
លោកបានបន្តថា គណបក្សដែលបង្កើតថ្មីនេះគឺជាការប្រមូលផ្ដុំគ្នារបស់មន្ត្រីអតីតគណបក្សសង្គ្រោះជាតិដែលបានស្នើសុំសិទ្ធិធ្វើនយោបាយថ្មីៗនេះ និងជាប៉ូលនយោបាយថ្មីមួយ ដើម្បីចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ ២០២២ ខាងមុខនេះ ដើម្បីកុំឱ្យគណបក្សកាន់អំណាចជិះសេះលែងដៃម្នាក់ឯង ដូចពីការបោះឆ្នោតជាតិកាលពីអាណត្តិមុន។
ទោះជាយ៉ាងណា លោក ផាន់ ច័ន្ទសាក់ បានបដិសេធធ្វើអត្ថាធិប្បាយចំពោះ លោក ប៉ុល ហំម ជុំវិញការចូលរួមអាជីពនយោបាយជាមួយលោក អ៊ូ ច័ន្ទរ័ត្ន ឬយ៉ាងណាទេ ព្រោះនេះជាសិទ្ធិរបស់លោកផ្ទាល់។ ប៉ុន្តែថ្នាក់ដឹកនាំដែលបានស្នើសុំសិទ្ធិធ្វើនយោបាយឡើងវិញចុងក្រោយនេះគឺជាការបង្កើតប៉ូលគណបក្សនយោបាយថ្មីមួយ ដើម្បីចូលរួមបោះឆ្នោតជ្រើសរើសក្រុមប្រឹក្សា ឃុំសង្កាត់ នៅឆ្នាំ ២០២២។
លោកថ្លែងថា៖ «គាត់ចូលរួមជាមួយនឹងគណបក្សនយោបាយណាមួយនោះ នៅពេលដែលធ្វើសមាជនៅពេលខាងមុខនឹងបានឃើញ»។
លោក អ៊ូ ច័ន្ទរ័ត្ន អតីតមន្ត្រីជាន់ខ្ពស់អតីតគណបក្សសង្គ្រោះជាតិ និងជាស្ថាបនិកគណបក្សកែទម្រង់កម្ពុជា បានថ្លែងពីម្សិលមិញដែរថា រហូតមកទល់ពេលនេះ មិនមានអ្វីដែលធ្វើឱ្យមន្ត្រីអតីតគណបក្សសង្គ្រោះជាតិរង់ចាំដំណោះស្រាយបន្តទៀតនោះទេ។ ទាំងប្រព័ន្ធអនុគ្រោះពន្ធ EBA ក៏ត្រូវបានកាត់ផ្តាច់ និងជំហររបស់រដ្ឋាភិបាលបច្ចុប្បន្ន ក៏ដូចជាថ្នាក់ដឹកនាំអតីតគណបក្សសង្គ្រោះជាតិក៏មិនមានការចុះសម្រុងក្នុងក្របខ័ណ្ឌណាមួយនោះទេ។
ស្ថាបនិកគណបក្សកែទម្រង់កម្ពុជារូបនេះបានបន្តថា បន្ទាប់ពីមានការផ្តាច់ EBA និងសម្ពាធរបស់សហគមន៍អន្តរជាតិផ្សេងៗហាក់មិនសូវមាន បើទោះបីមានក៏ប្រើប្រាស់ពេលយូរផងដែរ។ ប្រសិនបើរង់ចាំ រហូតដល់ឆ្នាំ ២០២២ ឬឆ្នាំ ២០២៣ នឹងអាចធ្វើឱ្យឆន្ទៈរបស់ពលរដ្ឋមានការប្រែប្រួលច្រើនពាក់ព័ន្ធនឹងការមិនចេញទៅបោះឆ្នោត។ នៅពេលពលរដ្ឋមិនចេញទៅបោះឆ្នោត វានឹងធ្វើឱ្យមានគ្រោះថ្នាក់ ដែលធ្វើឱ្យគណបក្សកាន់អំណាចនឹងជិះសេះលែងដៃបន្តកាន់អំណាចតកូន តចៅបន្តទៀត។
លោក អ៊ូ ច័ន្ទរ័ត្ន បានបញ្ជាក់បន្ថែមថា៖ «ដូច្នេះ អ្នកនយោបាយយល់ថា មិនអាចរង់ចាំតទៅមុខទៀតទេ ហើយក៏មិនមានច្រកអ្វីចេញក្រៅតែអំពីស្នើសុំសិទ្ធិធ្វើនយោបាយ ចូលប្រកួតប្រជែងបោះឆ្នោតឡើងវិញទេ»។
ចំពោះលោក ប៉ុល ហំម ចូលរួមអាជីពនយោបាយជាមួយលោកឬយ៉ាងណានោះ លោក អ៊ូ ច័ន្ទរ័ត្ន បានបដិសេធធ្វើអត្ថាធិប្បាយជុំវិញបញ្ហានេះ ប៉ុន្តែលោកក៏មិនបានបដិសេធថា មិនឱ្យលោក ប៉ុល ហំម ចូលរួមជាមួយដែរ ។ លោកថា រឿងនេះក៏មិនយូរដែរ លោក ប៉ុល ហំម នឹងប្រកាសជាសាធារណៈនូវជំហររបស់លោក។
លោក ឯម សុវណ្ណារ៉ា អ្នកវិភាគបញ្ហានយោបាយ និងសង្គមកម្ពុជា បានបង្ហាញការយល់ឃើញថា ទាំងលោក ប៉ុល ហំម និងលោក ផាន់ ច័ន្ទសាក់ ដែលបានស្នើសុំនីតិសម្បទានយោបាយនេះគឺក្នុងបំណងចូលរួមជាមួយគណបក្សថ្មី ដែលត្រូវបានបង្កើតឡើងដោយលោក អ៊ូ ច័ន្ទរ័ត្ន។
ប៉ុន្តែលោកបានបញ្ជាក់ថា ការទៅចូលរួមជាមួយគណបក្សថ្មីនេះគឺនៅមិនទាន់មានការគាំទ្រពេញលេញពីពលរដ្ឋនោះទេ ព្រោះគណបក្សថ្មីនេះ មិនទាន់មានចំណុចណាមួយដែលពលរដ្ឋបានផ្តល់តម្លៃឱ្យនោះទេ។
បើតាម លោក ឯម សុវណ្ណារ៉ា ដើម្បីទទួលបានការគាំទ្រ និងទទួលស្គាល់ពីពលរដ្ឋចំពោះគណបក្សថ្មីនេះ លុះត្រាតែមន្ត្រីអតីតគណបក្សសង្គ្រោះជាតិមានការរួបរួមគ្នា ដោយប្រមូលអ្នកសុំសិទ្ធិធ្វើនយោបាយទាំងអស់ និងមានការគាំទ្រពីលោក សម រង្ស៊ី និងលោក កឹម សុខា ជំរុញឱ្យមានការបោះឆ្នោតជ្រើសរើស ឃុំសង្កាត់ នោះទើបទទួលបានសំឡេងខ្លះ។
លោកបានថ្លែងថា៖ «យើងមើលយន្តការកន្លងមក ទាំងលោក កឹម សុខា និងលោក សម រង្ស៊ី មិនមានការគាំទ្រឱ្យមានការស្នើសុំសិទ្ធិធ្វើនយោបាយទេ។ ទោះបីលោក កឹម សុខា ស្ថិតក្នុងបទចោទក៏ដោយ ក៏មិនមានឃើញជំរុញឱ្យស្នើសុំសិទ្ធិធ្វើនយោបាយទេ ដែលនេះ ធ្វើឱ្យពលរដ្ឋមិនទាន់ឱ្យតម្លៃចំពោះគណបក្សតូចនោះ»៕
