.jpg)
ក្រុមមន្ត្រីចុះប្រមូលសត្វស្លាបដែលកំពុងតែងាប់ជាបន្តបន្ទាប់នៅបឹងស្នេហ៍ទួលពាន់តាឡី។ រូបថត ក្រសួងព័ត៌មាន
ព្រៃវែងៈ ក្រុមមន្ត្រីជំនាញនៃមន្ទីរបរិស្ថានខេត្តព្រៃវែងកំពុងចុះស្រាវជ្រាវ និងប្រមូលសំណាកសត្វស្លាបព្រៃ ដែលងាប់នៅក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡី ដើម្បីយកទៅពិសោធស្វែងរកការពិត បន្ទាប់ពីមានការរាយការណ៍ថា មានសត្វស្លាបជាច្រើនរយក្បាលក្នុងតំបន់នោះបានងាប់ជាបន្តបន្ទាប់។
លោក តូច វ៉ារដ្ឋា ប្រធានមន្ទីរបរិស្ថានខេត្តព្រៃវែងបានប្រាប់ ភ្នំពេញ ប៉ុស្តិ៍ នៅថ្ងៃទី ២២ មីនាថា តាមសេចក្ដីរាយការណ៍ពីប្រជាពលរដ្ឋ និងអាជ្ញាធរមូលដ្ឋាន ករណីសត្វស្លាបព្រៃងាប់នៅក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡីបានកើតឡើងជិត ១ សប្ដាហ៍មកហើយ ដោយខ្លះត្រូវបានប្រទះឃើញងាប់នៅតាមដងព្រៃក្បែរមាត់ទឹក និងខ្លះទៀតងាប់នៅតាមវាលស្រែរបស់ប្រជាកសិករ ដែលស្ថិតនៅជាប់តំបន់អភិរក្សនោះ។
លោក វ៉ារដ្ឋា បញ្ជាក់ថា៖ «ផ្អែកតាមការចុះពិនិត្យភាពជាក់ស្ដែងនៅក្នុងតំបន់នោះនាព្រឹកថ្ងៃទី ២២ មីនា ក្រុមការងារយើងសនិ្នដ្ឋានក្នុងជំហានដំបូងថា ការស្លាប់របស់សត្វទាំងនោះអាចបណ្ដាលមកពីអាកាសធាតុក្ដៅខ្លាំងពេក ឬដោយសារវ័យចំណាស់របស់វា ឬអាចបណ្ដាលមកពីការបំពុលដោយមនុស្ស»។
លោកបន្ថែមថា៖ «ឥឡូវនេះយើងបានប្រមូលយកសំណាកសត្វស្លាបដែលងាប់ និងទឹកនៅក្នុងវាលស្រែដែលអ្នកភូមិអះអាងថា វាបានចុះមកផឹកហើយប្រកាច់ងាប់នោះយកទៅពិសោធ ដើម្បីស្វែងរកការពិត»។ ជាមួយគ្នានេះ លោកបានអំពាវនាវដល់ប្រជាពលរដ្ឋ ដែលរស់នៅក្បែរតំបន់នោះសូមកុំប្រមូលសត្វស្លាបដែលងាប់ទាំងនោះយកទៅបរិភោគ ដែលអាចនឹងប្រឈមគ្រោះថ្នាក់ប្រសិនបើពួកវាងាប់ដោយជំងឺ ឬការបំពុលដោយថ្នាំគីមីពុលកសិកម្ម។
ក្នុងប្រតិបត្តិការចុះស្រាវជ្រាវ និងប្រមូលសំណាកសត្វដែលងាប់នៅក្នុងតំបន់នោះ ក្រុមមន្ត្រីបរិស្ថាន ប្រជាសហគមន៍ និង អាជ្ញាធរមូលដ្ឋានបានរកឃើញសត្វងាប់ ៨៥ ក្បាលដែលភាគច្រើនជាសត្វចង្កៀលខ្យង។
លោក ពុទ្ធ បូ ប្រធានសហគមន៍អភិរក្សបឹងស្នេហ៍ទួលពាន់តាឡីបានប្រាប់ភ្នំពេញប៉ុស្តិ៍ថា ដោយគិតចាប់តាំងពីថ្ងៃទី ១៧ ខែមីនា ឆ្នាំ ២០២១ មក ប្រជាកសិករនៅក្នុងសហគមន៍របស់លោកបានប្រមូលសត្វដែលងាប់យកមកដុតបំផ្លាញចោលអស់ចំនួនជាង ៣០០ ក្បាលមកហើយ។
លោកថ្លែងថា៖ «នៅថ្ងៃដំបូង គឺប្រជាសហគមន៍យើងបានប្រទះឃើញពួកវាងាប់នៅតាមដងអូរ វាលស្រែមាត់បឹង និងតាមដងព្រៃរបោះ។ ប៉ុន្តែមានចំនួនមិនច្រើននោះទេ ប៉ុន្តែ ២ ថ្ងៃចុងក្រោយនេះ យើងបានប្រទះឃើញមានងាប់កាន់តែច្រើនឡើង ដែលគួរឱ្យបារម្ភ»។
បើតាមលោក ពុទ្ធ បូ ប្រជាកសិករនៅក្នុងសហគមន៍របស់លោកពុំមានគ្រួសារណាមួយប្រើថ្នាំគីមីពុលកសិកម្ម នៅដីស្រែ ឬចម្ការរបស់ខ្លួនឡើយ បើទោះជាដីស្រែនៅក្នុងភូមិសម្បូរទៅដោយប្រភេទខ្យងសៀម ដែលអាចកាត់បំផ្លាញដំណាំស្រូវក៏ដោយ ព្រោះពួកគាត់ជឿជាក់ទៅលើប្រភេទសត្វចង្កៀលខ្យងដែលមានតួនាទីជាភ្នាក់ងារការពារសុវត្ថិភាពដល់ដំណាំស្រូវរបស់ពួកគាត់។ ប៉ុន្តែប្រជាកសិករនៅក្នុងភូមិផ្សេងទៀត ពួកគេអាចប្រើប្រាស់ថ្នាំគីមីពុលកសិកម្ម សម្រាប់បំផ្លាញសត្វខ្យងសៀមទាំងនោះ។
ជាមួយគ្នានេះលោក កង ធឿន អាយុ ៥២ ឆ្នាំ ជាប្រជាកសិករនៅភូមិទួលតាឡី ឃុំធាយ ស្រុកបាភ្នំ បានសម្ដែងក្ដីព្រួយបារម្ភអំពីការឆ្លងជំងឺពីសត្វដល់មនុស្ស។
លោកថ្លែងថា៖ «បើសត្វស្លាបព្រៃទាំងនោះ ងាប់ដោយថ្នាំគីមីពុលកសិកម្ម ឬពីអាកាសធាតុ វានឹងមិនបង្កគ្រោះថ្នាក់ធ្ងន់ធ្ងរដល់មនុស្សទេ តែបើពួកវាបានឆ្លងជំងឺផ្ដាសាយបក្សីប្រភេទថ្មីពីតំបន់ណាមួយហើយហើរមកងាប់នៅក្នុងតំបន់នេះ នោះវានឹងបង្កការឆ្លងរីករាលដាលដល់មនុស្សយើងទៀត»។
បើតាមលោក កង ធឿន សត្វស្លាបព្រៃនៅក្នុងតំបន់នោះបានស៊ាំទៅនឹងមនុស្ស វាមិនផ្អើលទេ ព្រោះអ្នកភូមិនៅក្នុងតំបន់នោះ គ្មាននរណាម្នាក់ធ្វើសកម្មភាពយាយីដល់ពួកវាឡើយ ហើយពួកវាក៏មិនបំផ្លាញផលដំណាំរបស់អ្នកភូមិដែរ។ ក្រៅពីការដាំដុះដំណាំស្រូវ និងដំណាំរួមផ្សំ ប្រជាកសិករនៅក្នុងតំបន់នោះបានរកប្រាក់ចំណូលបន្ថែមទៀតតាមរយៈការនាំភ្ញៀវទស្សនាសត្វស្លាបព្រៃក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡីនេះផងដែរពិសេសនៅក្នុងរដូវវស្សា។
តំបន់អភិរក្សសត្វស្លាបបឹងស្នេហ៍ទួលពាន់តាឡីមានទំហំ ៨៣ ហិកតា ស្ថិតនៅភូមិបឹងស្នេហ៍ឃុំធាយ ស្រុកបាភ្នំ ខេត្តព្រៃវែង។ តំបន់នេះមានសត្វស្លាបជាច្រើនប្រភេទរស់នៅដូចជា សត្វកុក ខ្វែក ក្អែកទឹក ចង្កៀលខ្យង ទុង និងសត្វក្រសារ ផងដែរ។
លោក កង ធឿន បានឱ្យដឹងថា កាលពីមុនតំបន់អភិរក្សសត្វស្លាបបឹងស្នេហ៍នេះមានការទាក់ទាញភ្ញៀវទេសចរជាតិ និងអន្តរជាតិទៅទស្សនាកម្សាន្តជាហូរហែ ប៉ុន្តែចាប់តាំងពីផ្ទុះការរីករាលដាលនៃជំងឺកូវីដ ១៩ ឆ្លងចូលសហគមន៍ ២០ កុម្ភ:មក ភ្ញៀវទេសចរក៏បានអាក់ខានទៅទស្សនាសត្វស្លាបក្នុងតំបន់នោះដែរ៕
