អាជ្ញាធររាជធានីភ្នំពេញកំពុងរៀបចំសាងសង់ឈាបនដ្ឋានដើរដោយថាមពលអគ្គិសនីចំនួន ៤ សម្រាប់បូជាអ្នកស្លាប់ដោយជំងឺកូវិដ ១៩ នៅលើផ្ទៃដី ១០ ហិកតា ដែលមានទីតាំងស្ថិតនៅឃុំតាសាល ស្រុកឱរ៉ាល់ខេត្តកំពង់ស្ពឺ។ នេះបើតាមការអះអាងរបស់លោកអភិបាលរាជធានីភ្នំពេញ។
លោក ឃួង ស្រេង អភិបាលរាជធានីភ្នំពេញ បានប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា នៅពេលនេះ ក្រុមការងាររដ្ឋបាលរាជធានីភ្នំពេញ បានចាប់ផ្ដើមដំណើរការឈូសឆាយពង្រាបទីតាំងដីនៅក្បែរតំបន់ជើងភ្នំឱរ៉ាល់ ដើម្បីសាងសង់ឈាបនដ្ឋាន សម្រាប់បូជាសពអ្នកដែលស្លាប់ដោយជំងឺកូវីដ ១៩ បន្ទាប់ពីទទួលបានការឯកភាពពីរដ្ឋបាលខេត្តកំពង់ស្ពឺ ។
លោកថ្លែងថា៖ «យើងមិនអាចសាងសង់ឈាបនដ្ឋានសម្រាប់បូជាសពអ្នកស្លាប់ដោយជំងឺកូវីដ ១៩ នៅក្នុងតំបន់ទីប្រជុំជនបានទេ ព្រោះវាងាយនឹងឆ្លង ហើយការធ្វើឈាបនដ្ឋាន ក៏មិនមែនចេះតែធ្វើឲ្យរួចពីដៃ ដោយគ្មានបទដ្ឋានបច្ចេកទេសនោះដែរ។ ហេតុនេះខ្ញុំក៏បានសម្រេចបញ្ជាទិញឧបករណ៍ បច្ចេកទេសមួយចំនួនពីប្រទេសថៃ ដើម្បីសាងសង់ឈាបដ្ឋានដើរដោយថាមពលអគ្គិសនីចំនួន ៤ នៅលើទីតាំងដី ១០ ហិកតា ជាប់តំបន់ជើងភ្នំឱរ៉ាល់ ក្នុងខេត្តកំពង់ស្ពឺ»។
បើតាមលោក ឃួង ស្រេង ការចាប់ផ្ដើមសាងសង់ឈាបនដ្ឋាន សម្រាប់បូជាសពអ្នកស្លាប់ដោយជំងឺកូវីដ ១៩ នាពេលនេះ មិនមែនជាការប្រមាថដល់អាយុជីវិត អ្នកដែលបានឆ្លងជំងឺកូវីដ ១៩ នោះទេ តែជាការគិតគូរដ៏ធំ និងប្រកបដោយទឹកចិត្ត និងស្មារតីមនុស្សធម៌ជាសកល។
ទន្ទឹមនឹងនេះ លោកក៏បានអំពាវនាវដល់ប្រជាពលរដ្ឋចូលរួមសហការជាមួយអាជ្ញាធរមូលដ្ឋានក្នុងការរាយការណ៍អំពីជនសង្ស័យមានការប៉ះពាល់ដោយផ្ទាល់ ឬដោយប្រយោលនឹងអ្នកមានវិជ្ជមានកូវីដ ១៩ ដើម្បីឲ្យសមត្ថកិច្ចអន្តរាគមន៍នាំពួកគាត់មកពិនិត្យព្យាបាល និងធ្វើចត្តាឡីស័កឲ្យបានត្រឹមត្រូវ និងទាន់ពេលវេលា។
ជុំវិញករណីនេះ លោក វ៉ី សំណាង អភិបាលខេត្តកំពង់ស្ពឺ បានប្រាប់ ភ្នំពេញ ប៉ុស្តិ៍ថា រដ្ឋបាលខេត្តកំពង់ស្ពឺ បានត្រៀមផ្ទៃដីទំហំ ៤៩ ហិកតា នៅក្នុងឃុំតាសាល ស្រុកឱរ៉ាល់ខេត្តកំពង់ស្ពឺ សម្រាប់សាងសង់ទីបញ្ចុះសព និងឈាបនដ្ឋាន សម្រាប់បូជាសពអ្នកស្លាប់ដោយជំងឺកូវីដ ១៩។
លោកថ្លែងថា៖ «ស្ថានភាពដីក្នុងតំបន់នោះ ជាតំបន់ទីទួលមិនលិចទឹក គ្មានបឹង អូរ ឬប្រឡាយ នោះទេ។ ការជ្រើសយកតំបន់នេះ ធ្វើជាឈាបនដ្ឋាន និងទីបញ្ចុះសពអ្នកស្លាប់ដោយជំងឺកូវីដ គឺពិតជាល្អ និងមិនចម្លងដល់អ្នកដទៃ ព្រោះទីតាំងនោះ មានចម្ងាយ ២ ៩០០ម៉ែត្រ ពីតំបន់ទីប្រជុំជន»។
លោកអភិបាលខេត្តបានបន្តថា ក្នុងជំហានដំបូងនេះ រដ្ឋបាលខេត្តកំពង់ស្ពឺ បានសហការជាមួយរដ្ឋបាលរាជធានីភ្នំពេញ ធ្វើការសាងសង់ឈាបនដ្ឋានដើរដោយថាមពលអគ្គិសនីចំនួន ៤ នៅលើទីតាំងដី ១០ ហិកតាជាបណ្ដោះអាសន្ន ក្នុងករណីមានអ្នកស្លាប់ដោយជំងឺកូវីដ។ ប៉ុន្តែជាអ្នកកាន់សាសនាម៉ូស្លីម ឬសាសនាគ្រីស្ត៍ ដែលនិយមបញ្ចុះសពនោះ គឺ រដ្ឋបាលខេត្ត នឹងរៀបចំឲ្យមានទីលានបញ្ចុះនៅក្នុងតំបន់នេះផងដែរ។
លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា កាលពីថ្ងៃទី ១៥ មីនា ក៏បានប្រាប់ ភ្នំពេញ ប៉ុស្តិ៍ ផងដែរថា នៅពេលនេះអាជ្ញាធរ រាជធានី-ខេត្ត ទាំងអស់កំពុងរៀបចំសាងសង់ឈាបនដ្ឋាន សម្រាប់បូជាសពអ្នកស្លាប់ដោយជំងឺកូវីដ នៅក្នុងទីតាំងសមស្រប ដែលអាចការពារ ពីការឆ្លងនៃជំងឺនេះ ដល់ប្រជាពលរដ្ឋដទៃទៀត។
លោកថ្លែងថា៖ «នៅពេលនេះ អាជ្ញាធររាជធានីភ្នំពេញ និងខេត្តកំពង់ស្ពឺ បានឯកភាពគ្នាជ្រើសយកទីតាំងក្នុងតំបន់ជើងភ្នំឱរាល់ សម្រាប់ធ្វើឈាបនដ្ឋាន និងទីលានបញ្ចុះសពអ្នកស្លាប់ដោយជំងឺកូវីដ ចំណែកបណ្ដាខេត្តមួយចំនួនទៀត ដែលស្ថិតក្នុងតំបន់ដាច់ស្រយាល គឺបានយកវត្តអារាម ដែលមានទីធ្លាធំ សម្រាប់ធ្វើឈាបនដ្ឋានថ្មីមួយ សម្រាប់បូជាអ្នកស្លាប់ដោយជំងឺកូវិដ»។
លោកបានបន្តថាអ្នកស្លាប់ដោយជំងឺកូវីដ ១៩ មិនអាចយកមកបូជាក្នុងឈាបនដ្ឋានរួមជាមួយសពមនុស្សទូទៅនោះទេ។ ទោះយ៉ាងណានេះមិនមែនជាការមើលងាយឬរើសអើងនោះទេ តែជាការប្រុងប្រយ័ត្ន និងបង្ការទប់ស្កាត់ពីការឆ្លងរាលដាលនៃជំងឺនេះ។
ជាមួយគ្នានេះ លោកបានអំពាវនាវដល់ពលរដ្ឋ ឲ្យបន្តអនុវត្តឲ្យបានខ្ជាប់ខ្ជួន នូវវិធានសុវត្ថិភាព អនាម័យ តាមគោលការណ៍ណែនាំរបស់ក្រសួងសុខាភិបាល និងត្រូវអនុវត្តគោលការណ៍៣កុំ ៣ការពារឲ្យបានគ្រប់គ្នា។
សកម្មភាពនៃការរៀបចំសាងសង់ឈាបនដ្ឋាន សម្រាប់បូជាសពអ្នកស្លាប់ដោយជំងឺកូវីដ បានធ្វើឡើងភ្លាមៗ បន្ទាប់ពីស្ថានភាពនៃការឆ្លងជំងឺកូវីដ ជាសហគមន៍ក្នុងព្រឹត្តិការណ៍ ២០ កុម្ភៈ កាន់តែខ្លាំឡើងៗ។ លោកនាយករដ្ឋមន្ត្រី ហ៊ុន សែន បានប្រកាសដាក់ចេញវិធានការរៀបចំសាងសង់នូវឈាបនដ្ឋាននេះ ដល់អាជ្ញាធររាជធានីខេត្តទាំងអស់ កាលពីថ្ងៃទី ៩ ខែមីនា៕