ភ្នំពេញៈ យ៉ាងហោចណាស់ជនសង្ស័យ ៣ នាក់ក្នុងចំណោមពលរដ្ឋជាច្រើនដែលបានតវ៉ាប្រឆាំងជាមួយអាជ្ញាធរធ្វើការរុះរើខ្ទមនៅក្នុងតំបន់ការពារធម្មជាតិឧទ្យានជាតិព្រះសីហនុរាម ហើយបានបង្កឲ្យមានការរងរបួសដល់សមត្ថកិច្ច អាចនឹងប្រឈមក្នុងការបញ្ជូនទៅតុលាការ។
លោក ឃាង ភារម្យ អ្នកនាំពាក្យសាលាខេត្តព្រះសីហនុបានប្រាប់ភ្នំពេញប៉ុស្តិ៍ពីម្សិលមិញថា៖ «មន្ត្រីអធិការស្រុកព្រៃនប់កំពុងរៀបចំបែបបទនីតិវិធីបន្តទៅតុលាការ»។
កាលពីថ្ងៃទី ៣ ខែមករា ឆ្នាំ ២០២០ មន្ត្រីឧទ្យានុរក្សនៃឧទ្យានជាតិព្រះសីហនុរាមសហការជាមួយកម្លាំងគណៈបញ្ជាការឯកភាពរដ្ឋបាលស្រុកព្រៃនប់ និងកងរាជអាវុធហត្ថខេត្តព្រះសីហនុបានចុះធ្វើការរុះរើខ្ទមអនាធិបតេយ្យដែលបានសង់រំលោភយកដីនៅក្នុងតំបន់ការពារធម្មជាតិក្នុងដែនឧទ្យានជាតិព្រះសីហនុរាមត្រង់ចំណុចខាងលិចក្បាលកោះខ្យង ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ។
យោងតាមសេចក្តីជូនដំណឹងរបស់រដ្ឋបាលខេត្តព្រះសីហនុបានឲ្យដឹងថា នៅពេលដែលក្រុមការងារធ្វើការរុះរើខ្ទមបានចំនួន ៣ ខ្នង ស្រាប់តែមានក្រុមអនាធិបតេយ្យប្រមូលផ្តុំគ្នាប្រមាណជាង ១០០ នាក់ប្រើហិង្សាតដៃមកលើកម្លាំងសមត្ថកិច្ច ដោយប្រើដបសាំង ដំបង ដុតភ្លើង កាំបិត ពូថៅ និងចម្ពាមកៅស៊ូ ធ្វើការវាយប្រហារមកលើកម្លាំងសមត្ថកិច្ច បណ្តាលឱ្យប្រជាការពារចំនួន ២ នាក់រងរបួសធ្ងន់ និងកម្លាំងនគរបាល ៣ នាក់រងរបួសស្រាល។
ជាមួយនឹងហេតុការណ៍នេះរដ្ឋបាលខេត្តព្រះសីហនុបានព្រមាននឹងចាត់វិធានការផ្លូវច្បាប់ ដើម្បីស្រាវជ្រាវរកអត្តសញ្ញាណមេខ្លោង និងអ្នកពាក់ព័ន្ធដែលបំផុសចលនានេះឱ្យមកទទួលខុសត្រូវចំពោះមុខច្បាប់ ដោយគ្មានការលើកលែង។ រដ្ឋបាលខេត្តព្រះសីហនុបានប្រកាសព្រមានជូនដំណឹងដល់ប្រជាពលរដ្ឋដែលចាញ់បោកជនខិលខូចចូលទៅកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិដោយខុសច្បាប់ត្រូវដកខ្លួនចេញជាបន្ទាន់។
សេចក្តីជូនដំណឹងដដែលបានឲ្យដឹងថាយោងតាមច្បាប់ស្តីពីការការពារធនធានធម្មជាតិត្រង់មាត្រា ៦២ និងមាត្រា ៥៦ បានចែងថាការកាប់គាស់រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិ ជាបទល្មើសធនធានធម្មជាតិ និងត្រូវផ្តន្ទាទោសដាក់ពន្ធនាគារពី ៥ ឆ្នាំ ទៅ ១០ ឆ្នាំ និងទោសពិន័យជាប្រាក់ចាប់ពី ១៥ លានរៀលដល់ ១៥០ លានរៀលផងដែរ។
លោក ឃាង ភារម្យ បានឲ្យដឹងថា បន្ទាប់ពីមានការប៉ះទង្គិចអាជ្ញាធរស្រុកព្រៃនប់បានឃាត់ខ្លួនអ្នកពាក់ព័ន្ធជាបន្តបន្ទាប់ចំនួន ១៧ នាក់ ដើម្បីសាកសួរ។ ក្រោយមកប្រជាពលរដ្ឋចំនួន ១៤ នាក់ក៏ត្រូវបានដោះលែងវិញ ចំណែក ៣ នាក់ទៀតកំពុងបន្តនីតិវិធីសាកសួរនៅអធិការដ្ឋាននគរបាលស្រុកព្រៃនប់។
លោកថ្លែងថា៖ «យើងអញ្ជើញពួកគាត់មកសាកសួរ ហើយអ្នកដែលគ្មានជាប់ពាក់ព័ន្ធ ក៏ត្រូវអនុញ្ញាតឲ្យត្រឡប់ទៅផ្ទះវិញ ដោយនៅតែ ៣ នាក់ប៉ុណ្ណោះ»។
ទោះយ៉ាងណាក៏ដោយ លោក ឃាង ភារម្យ បានអះអាងថាអាជ្ញាធរស្រុកនៅតែមានវិធានការ និងចុះទៅរុះរើសំណង់អនាធិបតេយ្យទាំងនោះបន្តទៀត ដើម្បីការពារតំបន់អភិរក្ស។
លោក ហួ យ៉ៃ អធិការនគរបាលស្រុកព្រៃនប់មិនអាចទាក់ទងសុំការអត្ថាធិប្បាយជុំវិញចំណាត់ការបន្តលើពលរដ្ឋទាំង ៣ នាក់នេះបាននៅឡើយទេកាលពីម្សិលមិញ ព្រោះតែមិនមានប្រភពដើម្បីទាក់ទង។
លោកស្រី ជៀប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុបានឲ្យដឹងថាក្នុងករណីនេះបើទោះជាប្រជាពលរដ្ឋបានសាងសង់ផ្ទះ និងកាន់កាប់ដីដោយខុសច្បាប់ក៏ដោយ ក៏អាជ្ញាធរគួរតែស្វែងរកដំណោះស្រាយដោយសន្តិវិធី មិនគួរណាប្រើយន្តការបែបនេះនោះទេ។ ការប៉ះទង្គិចបែបនេះគឺជារូបភាពមួយដែលបង្ហាញពីគំរូអាក្រក់បំផុត ដែលមិនគួរឲ្យកើតមាននោះទេ។
លោកស្រីបញ្ជាក់ថា៖ «យើងមិនចង់ឱ្យមានការប្រឈមដាក់គ្នាអ៊ីចឹងទេ។ បើទោះជាប្រជាពលរដ្ឋ ទើបតែសាងសង់ផ្ទះនេះក៏ដោយ ក៏គួរណាធ្វើការជូនដំណឹង និងកោះហៅពួកគាត់ដោយសន្តិវិធី ព្រោះផ្ទះពួកគាត់ដែលបានសាងសង់រួចហើយនោះចំណាយលុយកាក់អស់ច្រើនដែរ»។
លោកស្រី ជៀប សុធារី បានឲ្យដឹងថា ប្រជាពលរដ្ឋមួយចំនួនបានចូលទៅរស់នៅលើដីជម្លោះនោះប្រហែលជានៅក្នុងអំឡុងឆ្នាំ ២០០០ និងមានអ្នកខ្លះបានមកតាំងទីលំនៅក្នុងអំឡុងឆ្នាំ ២០១៨ ដែលរហូតមកដល់បច្ចុប្បន្នមានប្រជាពលរដ្ឋជាង ១០០ គ្រួសារកំពុងតាំងទីលំនៅលើទីតាំងខាងលើដែលជាដីឧទ្យានជាតិព្រះសីហនុរាម ប៉ុន្តែត្រូវបានផ្តល់ទៅឲ្យក្រុមហ៊ុនឯកជនធ្វើការវិនិយោគ៕