ភ្នំពេញ៖ អ្នកនាំពាក្យក្រសួងការពារជាតិ ជំរុញឱ្យម្ចាស់រថយន្តដែលជ្រកក្រោមស្លាកលេខ ខ.ម គួរផ្លាស់ប្ដូរទៅប្រើស្លាកលេខធម្មតាវិញ ដើម្បីចៀសវាងការបង្កឱ្យប៉ះពាល់ដល់កិត្តិយស និងសេចក្ដីថ្លៃថ្នូររបស់ក្រសួង ខណៈអគ្គនាយកដ្ឋានពន្ធដារបានតម្រូវឱ្យម្ចាស់រថយន្ត ដែលពាក់ស្លាកលេខរដ្ឋ និងស្លាកលេខ ខ.ម ត្រូវចូលទៅបង់ពន្ធជូនរដ្ឋ។
លោក ឈុំ សុជាត អ្នកនាំពាក្យក្រសួងការពារជាតិ បានប្រាប់ ភ្នំពេញ ប៉ុស្តិ៍ កាលពីម្សិលមិញថា ជាទូទៅរថយន្តដែលជាកម្មសិទ្ធិឯកជន ទោះជ្រកក្រោមស្លាកលេខ ខ.ម ស្លាកលេខ រដ្ឋ ឬស្លាកលេខអ្វីក៏ដោយ គឺមិនអាចគេចវេះពីការបង់ពន្ធជូនរដ្ឋបានទេ បើពុំនោះទេ នឹងត្រូវប្រឈមការពិន័យទោសទណ្ឌទៅតាមច្បាប់។
លោក សុជាត បញ្ជាក់ថា៖ «ការបង់ពន្ធជាបន្ទុករបស់រដ្ឋ ចំពោះតែរថយន្តដែលបានចុះក្នុងបញ្ជីសារពើភណ្ឌរបស់រដ្ឋ ដែលត្រូវបានប្រើប្រាស់ក្នុងក្របខ័ណ្ឌក្រសួង និងស្ថាប័នរដ្ឋប៉ុណ្ណោះ។ ចំពោះរថយន្តកម្មសិទ្ធិឯកជន ទោះជ្រកក្រោមស្លាកលេខអ្វីក៏ដោយ គឺត្រូវទទួលកាតព្វកិច្ចបង់ពន្ធជូនរដ្ឋ ដោយសាមីកម្មសិទ្ធិផ្ទាល់»។
ជាមួយគ្នានេះ លោក សុជាត បានជំរុញឱ្យម្ចាស់រថយន្តកម្មសិទ្ធិឯកជនដែលជ្រកក្រោមស្លាកលេខ ខ.ម រដ្ឋ និងស្លាកលេខ ន.ប គួរធ្វើការផ្លាស់ប្ដូរមកប្រើប្រាស់ស្លាកលេខធម្មតា ឬស្លាកលេខ ពិសេសដែលចេញដោយក្រសួងសាធារណការ និងដឹកជញ្ជូនវិញ ដើម្បីចៀសវាងការបង្កឱ្យមានបាតុភាពផ្សេងៗដែលអាចធ្វើឱ្យប៉ះពាល់ដល់កិត្តិយស និងសេចក្ដីថ្លៃថ្នូររបស់ក្រសួង និងស្ថាប័នរដ្ឋ។
យោងតាមលិខិតចុះថ្ងៃទី ២៥ ខែ មករា ឆ្នាំ ២០២១ ដែលមានត្រា និងហត្ថលេខា លោក គង់ វិបុល ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានពន្ធដារបានបញ្ជាក់ថា រថយន្តពាក់ស្លាកលេខ ខ.ម ដែលបានចុះក្នុងបញ្ជីសារពើភណ្ឌរបស់រដ្ឋ គ្រប់គ្រងដោយក្រសួងការពារជាតិ សរុបចំនួន ៦ ៣៧៤ គ្រឿង។
ក្នុងនោះ រថយន្តប្រភេទទេសចរណ៍សរុបចំនួន ៥ ៨៣៨ គ្រឿង [ពណ៌ត្រេអ៊ី ចំនួន ៥ ២៩៣ គ្រឿង និងពណ៌ចម្រុះចំនួន ៥៤៥ គ្រឿង] រថយន្តប្រភេទបែន ចំនួន ១២ គ្រឿង រថយន្តប្រភេទដឹកទំនិញ ចំនួន ១ គ្រឿង រថយន្តប្រភេទក្បាលសណ្តោងរ៉ឺម៉ក ចំនួន ៣ គ្រឿង និងរថយន្តជំនួយពីប្រទេសកូរ៉េ ប្រទេសចិន វៀតណាម និងពីលោកនាយករដ្ឋមន្ត្រី ហ៊ុន សែន សរុបចំនួន ៥២០ គ្រឿង។
ជាមួយគ្នានេះ លោកបានជំរុញឱ្យលោក ចៅ ភិរុណ អគ្គនាយកនៃអគ្គនាយកដ្ឋានសម្ភារបច្ចេកទេសនៃក្រសួងការពារជាតិ ប្រញាប់ស្នើសុំលតាបត្រពន្ធ សម្រាប់ឆ្នាំ ២០២០ លើមធ្យោបាយដឹកជញ្ជូន និងរថយន្តគ្រប់ប្រភេទ ដែលបានចុះក្នុងបញ្ជីសារពើភណ្ឌរបស់ក្រសួងការពារជាតិ ដោយភ្ជាប់មកជាមួយនូវបណ្ណសម្គាល់យានយន្ត និងវិញ្ញាបនបត្រត្រួតពិនិត្យលក្ខណៈបច្ចេកទេសរថយន្ត ដើម្បីយកទៅបិទលើមធ្យោបាយដឹកជញ្ជូន និងរថយន្តទាំងនោះ ចៀសវាងកើតមាននូវបាតុភាពអសកម្មណាមួយ។
លោក វិបុល បញ្ជាក់ ក្នុងលិខិតនោះថា៖ «អនុលោមតាមចំណារយល់ព្រមដ៏ខ្ពង់ខ្ពស់ របស់សម្តេចតេជោនាយករដ្ឋមន្ត្រី កាលពីថ្ងៃទី ២៥ ខែ ធ្នូ ឆ្នាំ ២០២០... ពន្ធជាបន្ទុករបស់រដ្ឋ ចំពោះយានយន្តដែលជាកម្មសិទ្ធិរបស់អង្គភាពកងយោធពលខេមរភូមិន្ទ កងរាជអាវុធហត្ថ ដែលបម្រើការងារសម្រាប់កិច្ចការការពារជាតិជាមធ្យោបាយប្រើប្រាស់ដឹកជញ្ជូនសម្ភារទ័ព ឬដឹកជញ្ជូនកងទ័ពក៏ដូចជាសម្រាប់កិច្ចការសន្តិសុខ និងសណ្តាប់ធ្នាប់សង្គមស្របតាមប្រកាសលេខ ៥៣១ សហវ.ប្រក ចុះថ្ងៃទី ៣០ ខែ ឧសភា ឆ្នាំ ២០១៨»។
តាមរយៈលិខិតនោះ រថយន្តដែលជាកម្មសិទ្ធិឯកជន ជ្រកក្រោមស្លាកលេខ ខ.ម ទាំងអស់ត្រូវបង់ពន្ធចាប់ពីឆ្នាំ ២០២០ តទៅ ដោយបានលើកលែងប្រាក់ពន្ធត្រឹមឆ្នាំ ២០១៩ និងលើកលែងពិន័យទោសទណ្ឌដល់ឆ្នាំ ២០២០។ ប៉ុន្តែម្ចាស់រថយន្តទាំងនោះ ត្រូវទៅចុះបញ្ជីបង់ពន្ធនៅអគ្គនាយកដ្ឋានពន្ធដារ និងចុះបញ្ជីនៅក្រសួងសាធារណការ និងដឹកជញ្ជូន។ លោក វិបុល បញ្ជាក់ទៀតថា៖ «ម្ចាស់រថយន្តត្រូវទៅបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទជាសាច់ប្រាក់ផ្ទាល់ខ្លួន»។
លោក ចៅ ភិរុណ អគ្គនាយកនៃអគ្គនាយកដ្ឋានសម្ភារបច្ចេកទេសនៃក្រសួងការពារជាតិ មិនអាចស្នើសុំធ្វើអធិប្បាយ ជុំវិញករណីនេះបានទេ កាលពីម្សិលមិញ ដោយលោកបានប្រាប់ថា កំពុងជាប់រវល់ប្រជុំ៕
វីដេអូ៖