ភ្នំពេញៈ មន្ត្រីក្រសួងបរិស្ថានបានប្រគល់ឡដុតសំរាមចំនួន ២៥ ឡ និងដំឡើងឲ្យអាជ្ញាធរមូលដ្ឋាន សម្រាប់យកកាកសំណល់កខ្វក់ទៅដុតដើម្បីដោះស្រាយរយៈពេលខ្លី និងមធ្យមក្នុងការកាត់បន្ថយគំនរសំរាមដែលមានច្រើនហួសហេតុនៅតាមទីប្រជុំជននៅក្នុងខេត្ត ១៥។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានឲ្យភ្នំពេញប៉ុស្ដិ៍ដឹងកាលពីថ្ងៃពុធថា ការផ្តល់ឡដុតសំរាមដល់អាជ្ញាធរស្រុកនេះបានធ្វើឡើងតាំងពីឆ្នាំ ២០១៧ ហើយឡទាំងនោះមានបច្ចេកទេសមិនប៉ះពាល់ដល់បរិស្ថាន ដោយមានសមត្ថភាពដុតសំណល់សំរាមចន្លោះពី ២ ទៅ ៧ តោនក្នុង ១ ថ្ងៃ។
លោក នេត្រ ភក្ត្រា បានឲ្យដឹងថា៖ «ការដំឡើងឡដុតសំរាមនៅតាមមូលដ្ឋាននេះដើម្បីងាយស្រួលដល់អាជ្ញាធរក្នុងការសម្អាតអនាម័យ បរិស្ថាន និងមិនចាំបាច់ដឹកជញ្ជូនផ្លូវឆ្ងាយ និងមិនធ្វើឱ្យកកស្ទះសំណល់សំរាមនៅនឹងមូលដ្ឋានផ្ទាល់»។
លោកក៏បានឲ្យដឹងទៀតថា ក្រសួងបរិស្ថានបានផ្តល់ម៉ូតូរ៉ឺម៉កដឹកសំរាមចំនួន ៥០ គ្រឿងដល់អាជ្ញាធរស្រុកនានាដើម្បីប្រើប្រាស់ជាមធ្យោបាយដឹកសំរាមពីមូលដ្ឋាននានាមកកាន់កន្លែងឡដើម្បីដុតសំរាម។ ម៉ូតូរ៉ឺម៉កទាំងនោះជាអំណោយរបស់ក្រុមហ៊ុនជីបម៉ុង។
លោក លាង ឃុន ប្រធានក្រុមប្រឹក្សាភិបាលក្រុមហ៊ុនជីបម៉ុងបានឲ្យដឹងថា ជំនួយនោះគឺជាការចូលរួមចំណែកដើម្បីធ្វើឱ្យមានសោភណភាពក្នុងរាជធានីភ្នំពេញ និងខេត្តមួយចំនួន ក្រោយពីកាត់បន្ថយកាកសំណល់កខ្វក់បានកាន់តែច្រើន។
លោក នេត្រ ភក្ត្រា បានឲ្យដឹងថាបញ្ហាសំរាមនៅកម្ពុជានេះបច្ចុប្បន្នមានបរិមាណសរុបជាង ១ ម៉ឺនតោននៅក្នុង ១ ថ្ងៃ និងប្រមាណជិត ៤ លានតោនក្នុង ១ ឆ្នាំដែលក្នុងនោះ ៦៥ ភាគរយជាសំណល់សរីរាង្គ ២០ ភាគរយជាសំណល់ថង់ប្លាស្ទិក និងនៅសេសសល់ជាសំណល់រឹង និងសំណល់ផ្សេងទៀត។
លោកបានឱ្យដឹងថាចំនួនសំរាមទាំងនោះមានត្រឹមតែប្រមាណ ៥១ ភាគរយប៉ុណ្ណោះដែលត្រូវបានយកទៅចាក់នៅទីលានចាក់សំរាមក្រៅនោះត្រូវបានយកទៅបោះចោលអនាធិបតេយ្យតាមដងផ្លូវខ្លះបោះចោលក្នុងប្រភពទឹក និងខ្លះទៀតត្រូវបានដុត។ អាត្រាកំណើននៃសំរាមនៅកម្ពុជាមានប្រមាណ ១៥ ភាគក្នុង ១ ឆ្នាំ។
ការកើនឡើងនៃបរិមាណសំរាមគឺដោយសារតែមានកំណើនប្រជាពលរដ្ឋកំណើននៃការប្រើប្រាស់ទំនិញច្រើនឥរិយាបថនៃការវេចខ្ចប់ទំនិញរបស់ប្រជាពលរដ្ឋមានការផ្លាស់ប្តូរការញែកសំរាមតាមប្រភេទនៅមានតិចតួចនៅឡើយ និងការកែច្នៃសំណល់ឡើងវិញនៅមានកម្រិត។
លោកបានបញ្ជាក់ថា៖ «ការកើនឡើងនូវបរិមាណសំរាមនេះសំណល់រឹងពី ១ ឆ្នាំទៅ ១ ឆ្នាំបានបង្កក្តីបារម្ភយ៉ាងខ្លាំងដល់គុណភាពបរិស្ថានសុខភាពសាធារណៈ និងការបាត់បង់សោភណភាពទីប្រជុំជនរាជធានី-ក្រុង-ស្រុក»។
លោកបានឲ្យដឹងទៀតថា ការអនុវត្តជាក់ស្តែងលើការគ្រប់គ្រងសំរាមសំណល់រឹងនៅកម្ពុជាបច្ចុប្បន្នជាទូទៅនៅជួបឧបសគ្គជាច្រើនដែលអាចបង្កផលប៉ះពាល់នាពេលអនាគត៕