ភ្នំពេញៈ មន្ត្រីជាន់ខ្ពស់នៃក្រសួងផែនការអះអាងថា ការរីករាលដាននៃជំងឺកូវីដ១៩នៅក្នុងប្រទេសនឹងប៉ះពាល់ដល់ផែនការអភិវឌ្ឍន៍ជាតិដែលធ្វើឲ្យសកម្មភាពដែលបានកំណត់រួចមួយចំនួននឹងទទួលបរាជ័យ ខណៈលទ្ធផលជាផ្លូវការនៃការធ្វើជំរឿនទូទាំងប្រទេសដែលគ្រោងប្រកាសនៅខែកក្កដាខាងមុខក៏នឹងត្រូវពន្យារពេលដោយគ្មានកំណត់ផងដែរ។
ការអះអាងបែបនេះបានធ្វើឡើងកាលពីម្សិលមិញដោយលោក ថេង បញ្ញាធន ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានផែនការ និងមន្ត្រី ១ រូបទៀតទទួលបន្ទុកស្ថិតិនៃក្រសួងផែនការនៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងផែនការ» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនៅទីស្តីការគណៈរដ្ឋមន្ត្រី។
ឆ្លើយតបទៅនឹងសំណួររបស់អ្នកសារព័ត៌មានក្នុងឱកាសនោះលោក ថេង បញ្ញាធន បានលើកឡើងថា ការរីករាលដាលជំងឺកូវីដ ១៩ គឺពិតជាធ្វើឲ្យប៉ះពាល់ដល់ផែនការអភិវឌ្ឍន៍ជាតិឆ្នាំ ២០១៩ ដល់ ឆ្នាំ ២០២៣ ដែលរដ្ឋាភិបាលបានដាក់ចេញ ខណៈក្នុងដំណាក់កាលដំបូងនេះ ការប្រែប្រួលស្ថានភាពបានធ្វើឲ្យប៉ះពាល់ដល់ផ្នែកខ្លះនៃសកម្មភាពរបស់រដ្ឋ។
លោកថ្លែងយ៉ាងដូច្នេះថា៖ «នៅពេលមានការកើតឡើងបន្ទាប់ក្នុងករណីកូវីដ១៩ នេះអ៊ីចឹងគឺរដ្ឋាភិបាលបានរៀបចំថវិកាមួយចំណែកសម្រាប់អន្តរាគមន៍បន្ទាន់។ ប្រសិនបើថវិការបស់យើងមានកំណត់ ហើយមួយចំណែកត្រូវបានប្រើប្រាស់សម្រាប់អន្តរាគមន៍បន្ទាន់នេះ យើងឃើញថាដំណាក់កាលទី ២ គឺជាការណែនាំរបស់សម្តេចតេជោ ប្រមុខរដ្ឋាភិបាលកម្ពុជាដែលបានណែនាំឲ្យយើងពិនិត្យរឿងអាទិភាពណា ដែលមិនទាន់ចាំបាច់ក្នុងពេលនេះត្រូវផ្អាកសិន។ ករណីនេះព្រោះតែថវិកាមួយចំនួនហ្នឹងត្រូវបែងចែកទៅក្នុងវិស័យសុខាភិបាលធ្វើម៉េចអន្តរាគមន៍រឿងកូវីដនេះឲ្យទាន់ពេលសិន»។
លោក បញ្ញាធន បន្ថែមថាការអន្តរាគមន៍ដំបូងគឺរដ្ឋាភិបាលកម្ពុជាបានបញ្ជាឲ្យក្រសួងសេដ្ឋកិច្ច និងហិរញ្ញវត្ថុចាប់ផ្តើមបែងចែក ឬក៏វិភាជថវិការបស់រដ្ឋាភិបាល ដើម្បីអន្តរាគមន៍ទប់ស្កាត់ជំងឺកូវីដទូទាំងប្រទេសស្របពេលពេលដែលការអនុវត្តផែនការអភិវឌ្ឍន៍ជាតិជាទូទៅក្នុង ១ ឆ្នាំគឺត្រូវធ្វើការតាមដាន និងវាយតម្លៃពីវឌ្ឍនភាពដែលសម្រេចបាន។ ដូច្នេះនៅពេលដែលធនធានថវិកាមួយចំនួនមិនបានប្រើប្រាស់សម្រាប់អភិវឌ្ឍតាមផែនការ ដោយសារតែយកទៅអន្តរាគមន៍បន្ទាន់នោះ ច្បាស់ណាស់ពិតជាប៉ះពាល់ផែនការអភិវឌ្ឍន៍ជាតិ។
ចំណែកលោកស្រី ហង់លីណា ប្រតិភូរាជរដ្ឋាភិបាលទទួលបន្ទុកផ្នែកស្ថិតិ និងជាអគ្គនាយិកាវិទ្យាស្ថានជាតិស្ថិតិនៃក្រសួងផែនការបានថ្លែងដែរថា បញ្ហានៃកូវីដនេះក៏បានប៉ះពាល់ដល់ដំណើរការនៃការប្រកាសលទ្ធផលជាផ្លូវការនៃការធ្វើជំរឿនផងដែរ។ លោកស្រីបន្ថែមថាពេលដែលមានបញ្ហាកូវីដនេះមន្ត្រី និងនិស្សិត ដែលស្ម័គ្រចិត្តមួយចំនួនក៏មិនបានមកធ្វើការដូចជាធម្មតាដែរ ស្របពេលក្រសួងផែនការក៏បានឈប់សម្រាកដែលជាហេតុនាំឲ្យប៉ះពាល់ដល់ផែនការនៃការប្រកាសលទ្ធផលជំរឿនជាផ្លូវការនេះ។
លោកស្រីបន្តថា៖ «នៅក្នុងអំឡុងពេលនេះនឹងប៉ះពាល់ ព្រោះថាការងារមួយចំនួនមិនបានអនុវត្តទៅតាមចំណុចដៅដែលបានកំណត់នៅក្នុងផែនការនោះទេ។ បើមិនបានសម្រេចតាមការកំណត់ដៅនេះទេ ដែលជាលក្ខណៈបច្ចេកទេស យើងធ្វើការវិភាគហើយថាវាបណ្តាលមកពីមូលហេតុអ្វី ដើម្បីឈានទៅធ្វើការកែសម្រួល»។
លោកស្រី ហង់ លីណា បានបញ្ជាក់ថាក្នុងដំណាក់កាលរៀបចំរបាយការណ៍ជំរឿននេះគឺបន្ទាប់ពីបានប្រមូលទិន្នន័យបានមកពីគ្រួសារប្រមាណជាង ៣ លាន ៣ សែនគ្រួសារគឺត្រូវប្រើប្រាស់មន្ត្រីប្រមាណ ១៥០ នាក់សម្រាប់កែ និងចុះលេខកូដ ហើយ ១៥០ នាក់ទៀតសម្រាប់វាយបញ្ចូលទិន្នន័យក្នុងកុំព្យូទ័រ។
លោកស្រីបានបន្ថែមថា ដូច្នេះក្នុងការវាយបញ្ចូលទិន្នន័យជាង ៣ លានគ្រួសារនេះយើងតម្រូវឲ្យពួកគាត់ក្នុង ១៥០ នាក់ហ្នឹងសម្រាប់អ្នកកែគឺត្រូវកែឲ្យបាន ៦ ពាន់៥រយគ្រួសារក្នុង ១ ខែទើបយើងបានបញ្ចប់តាមផែនការដែលយើងបានកំណត់ ហើយសម្រាប់អ្នកចុះលេខកូដម្នាក់គឺត្រូវចុះ ៨ ពាន់ ៥ រយគ្រួសារក្នុង ១ ខែទើបអាចបញ្ចប់តាមផែនការបាន។
លោកស្រីបានបញ្ជាក់ថា៖ «ដូច្នេះបើការវាយបញ្ចូលអាចធ្វើតាមផែនការកំណត់ នោះការងារជំរឿននេះនឹងអាចបញ្ចប់ក្នុងខែ ៣ ទៅខែ ៤ ឲ្យស្របតាមផែនការដែលអាចឲ្យមានពេលគ្រប់គ្រាន់សម្រាប់ធ្វើការវិភាគដើម្បីចេញលទ្ធផលផ្លូវការនៅក្នុងខែ ៧ ខាងមុខហើយបើការងារនេះធ្វើមិនបានតាមការកំណត់ដែលបានដាក់ចេញទេគឺអត់អាចបញ្ចប់បានទេ»។
យ៉ាងណាក្ដីលោកស្រីមិនទាន់អាចបញ្ជាក់បានទេថា ការពន្យារពេលប្រកាសលទ្ធផលផ្លូវការនេះអាចនឹងបន្តអូសបន្លាយរហូតដល់ពេលណាទេ ដោយលោកស្រីគ្រាន់តែអះអាងថា បើបញ្ហាជំងឺនេះអូសបន្លាយពេលវេលាយូរនោះការប្រកាសលទ្ធផលជំរឿនជាផ្លូវការក៏នឹងពន្យារពេលទៅតាមនោះដែរ៕