.jpg)
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលក្នុងសន្និសីទកាលពីថ្ងៃទី ១៨ តុលា។ រូប FN
ភ្នំពេញៈ ជាការគិត និងការប៉ាន់ស្មានទុកជាមុនរបស់អ្នកបច្ចេកទេសនៃអង្គការសុខភាពពិភពលោកគឺក្នុងរង្វង់ប្រហែលជាពាក់កណ្តាលឆ្នាំ ២០២១ ប្រហែលនឹងអាចមានវ៉ាក់សាំងមួយចំនួនក្នុងចំណោមវ៉ាក់សាំងពី ៨ ទៅ ៩ ដែលអាចយកមកប្រើប្រាស់បាន។ នេះបើតាមអ្នកនាំពាក្យក្រសួងសុខាភិបាល លោកស្រី ឱ វណ្ណឌីន។
បើតាមលោកស្រី អង្គការសុខភាពពិភពលោក (WHO) អង្គការ ហ្គាវី (GAVI) និងកម្មវិធីជាតិចាក់ថ្នាំបង្ការរបស់ក្រសួងសុខាភិបាលបានមូលមតិគ្នា ដើម្បីរៀបចំធ្វើផែនការអភិវឌ្ឍន៍នូវផែនការមួយដែលហៅថា Deployment Plan សម្រាប់ធ្វើការពិនិត្យមើល គ្រប់គ្រង ការបែងចែករួមគ្នា និងការមើលថាតើក្រុមណាដែលត្រូវទទួលនូវវ៉ាក់សាំងមុនគេ។
នៅពេលចុះសួរសុខទុក្ខពលរដ្ឋរងគ្រោះដោយទឹកជំនន់នៅខេត្តបន្ទាយមានជ័យពីម្សិលមិញ លោកស្រីថ្លែងថា៖ «យើងត្រូវគិតថា តើប្រភេទវ៉ាក់សាំងណាដែលអាចប្រើប្រាស់បាននៅក្នុងប្រទេសកម្ពុជារបស់យើង។ ដូចនេះហើយបានជាយើងត្រូវមានផែនការមួយច្បាស់លាស់»។
លោកស្រីបន្ថែមថា៖ «ហើយនៅក្នុងថ្នាក់អន្តរជាតិ គេគិតរួចហើយគឺវ៉ាក់សាំងដែលទទួលបានមកដែលគេហៅថា COVAC Facility អ្នកដែលសម្របសម្រួលទទួលខុសត្រូវលើវ៉ាក់សាំងនេះ គឺសម្រាប់ប្រទេសកម្ពុជា យើង គឺប្រហែលជាអាចត្រូវបានគេផ្តល់ជូនក្នុងរង្វង់ ៣ ភាគរយនៃចំនួនប្រជាជន។ ដូចនេះប្រទេសកម្ពុជាយើងបានខ្ទង់ប្រមាណជាជាង ៣ លាននាក់»។
អ្នកនាំពាក្យរូបនេះបន្តទៀតថា អ្វីដែលគេគិតជាបឋមទៀត គេត្រូវគិតនៅក្នុងចំណោម ៣ ភាគរយ ដែលនឹងអាចទទួលបានមកនេះ មិនអាចមកម្តងទាំង ៣ ភាគរយនោះទេ។ ប៉ុន្តែអាចនឹងមានការបែងចែកជាដំណាក់ៗ ដោយសារផលិតភាពនៃវ៉ាក់សាំងនេះក៏មានកម្រិតដែរ។
លោកស្រីថ្លែងថា៖ «វាមិនមែនតែសម្រាប់បែងចែកតែមកក្នុងប្រទេសកម្ពុជាយើងទេ តែត្រូវបែងចែកនៅទូទាំងសកលលោក។ អ៊ីចឹង វាត្រូវមានការបែងចែកមួយដែលគេហៅថា ការបែងចែកដោយស្មើភាពគ្នា ហើយមានសិទ្ធិស្មើគ្នានៅក្នុងការទទួលបាននូវវ៉ាក់សាំងកូវីដ ១៩ នេះ»។
ស្ថិតក្នុងស្ថានភាពដែលកំពុងប្រឈមនឹងទឹកជំនន់នេះដែរ ប្តីប្រពន្ធ ១ គូ ដែលជាជនជាតិខ្មែរត្រូវបានរកឃើញមានវិជ្ជមានវីរុសកូវីដ១៩ បន្ទាប់ពីពួកគាត់បានវិលត្រឡប់មកពីប្រទេសអ៊ីរ៉ាក់កាលពីថ្ងៃទី ១៨ តុលា។ ចំណែកកូនអាយុ ៣ ឆ្នាំរបស់គាត់ម្នាក់ត្រូវបានបុគ្គលិកសុខាភិបាលកំពុងធ្វើការតាមដានសុខភាពបន្ត ក្រោយពីការធ្វើតេស្តលើកទី ១ របស់គាត់អវិជ្ជមាន។
យោងតាមសេចក្តីជូនដំណឹងរបស់ក្រសួងសុខាភិបាលពីម្សិលមិញឱ្យដឹងថា បុរសជនជាតិខ្មែរអាយុ ៣៣ ឆ្នាំ ដែលជាស្វាមី និងប្រពន្ធរបស់គាត់អាយុ ៣២ ឆ្នាំដែលមានអាសយដ្ឋានស្នាក់នៅភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ បានធ្វើដំណើរមកពីប្រទេសអ៊ីរ៉ាក់ដោយបានឆ្លងកាត់ទីក្រុងដូហា និងបន្តជើងហោះហើរនៅប្រទេសកូរ៉េខាងត្បូង ហើយបានមកដល់ប្រទេសកម្ពុជានៅថ្ងៃទី ១៨ តុលា។
ក្រសួងបញ្ជាក់ថា៖ «លទ្ធផលធ្វើតេស្តវត្ថុសំណាករបស់បុគ្គលជាស្វាមី និងភរិយាទាំង ២ នាក់ខាងលើ គឺ វិជ្ជមានវីរុសកូវីដ១៩ ដែលផ្តល់ដោយវិទ្យាស្ថានប៉ាស្ទ័រកម្ពុជា ហើយបច្ចុប្បន្នអ្នកជំងឺទាំង ២ នាក់ត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត»។
សេចក្តីជូនដំណឹងបញ្ជាក់ថា អ្នកដំណើរតាមយន្តហោះជាមួយប្តីប្រពន្ធ ២ នាក់នេះចំនួន ១០៩ នាក់ (ស្រី ៣៤ នាក់ កុមារ ៣ នាក់ និងទារកម្នាក់)។ រីឯអ្នកដំណើរចំនួន ១០៦ នាក់ ដែលមានលទ្ធផលតេស្តអវិជ្ជមានជំងឺកូវីដ ១៩ ត្រូវបានដាក់ឱ្យធ្វើចត្តាឡីស័ក ១៤ ថ្ងៃនៅសណ្ឋាគារផ្សេងៗគ្នាក្នុងរាជធានីភ្នំពេញ។ អ្នកដំណើរចំនួន ៦៩ នាក់ បានធ្វើចត្តាឡីស័កនៅក្នុងសណ្ឋាគារ ៥ ផ្សេងគ្នា។ ឯអ្នកដំណើរចំនួន ៣៧ នាក់ផ្សេងទៀត ធ្វើចត្តាឡីស័កនៅមណ្ឌលកងទ័ពជើងអាកាស។
លោកស្រី ឱ វណ្ណឌីន ប្រាប់ពីម្សិលមិញថា ២ នាក់ប្តីប្រពន្ ធដែលមានវិជ្ជមានវីរុសកូវីដ ១៩ មានកូនអាយុ ៣ ឆ្នាំ ប៉ុន្តែកូនរបស់គាត់លទ្ធផលតេស្តឃើញអវិជ្ជមាន។
លោកស្រីថ្លែងថា៖ «យើងនៅបន្តតាមដានសុខភាពរបស់កូននេះថា តើគាត់អាចឆ្លងពីឪពុកម្តាយរបស់គាត់ដែរឬអត់ តែលទ្ធភាពនៃការចម្លងគឺខ្ពស់។ ប៉ុន្តែយើងកំពុងធ្វើការតាមដានថា តើអាចឆ្លងឬយ៉ាងណាដោយការធ្វើតេស្ត លើកទី ១ របស់គាត់គឺអវិជ្ជមាន»។
បើតាមលោកស្រីដោយសារកូនរបស់អ្នកជំងឺប្តីប្រពន្ធនេះមិនមានអ្នកមើលថែ ដូចនេះកូនគាត់ត្រូវដាក់តាមដានសុខភាពនៅមន្ទីរពេទ្យជាមួយឪពុកម្តាយរបស់គាត់។ ក្រសួងនឹងយកចិត្តទុកដាក់បន្ថែមទៀតលើការពិនិត្យព្យាបាលជូនពួកគាត់ ហើយក៏ដូចជាតាមដានសុខភាពឱ្យបានដិតដល់សម្រាប់កូនរបស់គាត់អាយុ ៣ ឆ្នាំនេះផងដែរ។
យោងតាមរបាយការណ៍របស់ក្រសួងសុខាភិបាលគិតត្រឹមម៉ោង ៧ ព្រឹកថ្ងៃទី ២០ ខែតុលា ស្ថានភាពជំងឺកូវីដ ១៩ នៅកម្ពុជាចំនួនអ្នកព្យាបាលជាសះស្បើយសរុបទូទាំងប្រទេសមានចំនួន ២៨០ នាក់ (ស្មើនឹង ៩៨,២៥ ភាគរយធៀបនឹងចំនួនអ្នកមានកូវីដ-១៩ទាំងអស់) ដែលនៅក្នុងចំនួននោះមានស្រីចំនួន ៥៦ នាក់ និងបុរសចំនួន ២២៤ នាក់។
អ្នកមានកូវីដ១៩មានចំនួនសរុប ២៨៥ នាក់ (ស្ត្រី ៥៨ នាក់ និងបុរសចំនួន ២២៧ នាក់)។ រីឯអ្នកជំងឺសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញមានចំនួន ៥ នាក់ក្នុងនោះមានបុរសជនជាតិឥណ្ឌូនេស៊ី ១ នាក់ បុរសជនជាតិខ្មែរ ២ នាក់ ស្ត្រីជនជាតិខ្មែរ ១ នាក់ និងស្ត្រីជនជាតិបារាំង ១ នាក់៕
វីដេអូ៖
