.jpg)
មន្ត្រីក្រុង ពេលចុះពិនិត្យការស្ដារប្រឡាយ។ រូបថត ខណ្ឌពោធិ៍សែនជ័យ
ភ្នំពេញៈ អភិបាលរាជធានី-ភ្នំពេញលោក ឃួង ស្រេង ក្នុងរយៈពេល ២-៣ ថ្ងៃ មកនេះបានដឹកនាំមន្ត្រីជំនាញចុះកាយប្រឡាយ និងតភ្ជាប់បណ្ដាញលូបេតុងធំៗ ដើម្បីរំដោះទឹកចេញពីតំបន់មួយចំនួនក្នុងខណ្ឌពោធិ៍សែនជ័យ ខណ្ឌដង្កោ និងខណ្ឌកាំបូល រាជធានីភ្នំពេញដែលរងការជន់លិចពីទឹកភ្លៀងស្របពេលក្រសួងធនធានទឹកអំពាវនាវឱ្យប្រុងប្រយ័ត្នពីទឹកជំនន់។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្ដិ៍នៅថ្ងៃ ៥ តុលា ថា ក្នុងរយៈពេលប៉ុន្មានថ្ងៃកន្លងមកនេះ អាកាសធាតុមិនអំណោយផលដោយមានភ្លៀងធ្លាក់ជាប់ៗគ្នាធ្វើឱ្យជន់លិចលំនៅឋានពលរដ្ឋជាច្រើនខ្នង និងកំណាត់ផ្លូវមួយចំនួននៅភាគខាងលិចរាជធានីភ្នំពេញក្នុងនោះក៏មានកំណាត់ផ្លូវជាតិលេខ ៤ ផងដែរ។
លោកបានបន្តថា ដោយពិនិត្យឃើញបញ្ហាទាំងនេះលោកអភិបាលរាជធានីភ្នំពេញបានដឹកនាំឱ្យមន្ត្រីជំនាញនៃមន្ទីរសាធារណការ និងដឹកជញ្ជូន និងមន្ត្រីជំនាញនៃមន្ទីរធនធានទឹក និងឧតុនិយម រួមសហការគ្នាជាមួយអាជ្ញាធរដែនដីធ្វើការជីកកាយបើកមុខទឹកដោយចាប់ផ្ដើមពីថ្ងៃទី ២ ខែ តុលា ឆ្នាំ ២០២០។
លោក ភក្ដី បានបញ្ជាក់ថា៖ «តាមរយៈការចុះពិនិត្យភាពជាក់ស្ដែង ទីតាំងដែលទទួលរងការលិចខ្លាំងដោយជំនន់ទឹកភ្លៀងនាប៉ុន្មានថ្ងៃកន្លងមកនេះ ស្ថិតក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ។ ប៉ុន្តែឥឡូវនេះបានថមថយទៅវិញហើយ បន្ទាប់ពីមន្ត្រីប្រើគ្រឿងចក្រកាយបើកមុខទឹក ២ កន្លែងអមផ្លូវរថភ្លើង ដើម្បីនាំទឹកទៅប្រឡាយត្រពាំងក្រសាំងធ្លាក់ទៅស្ថានីយបូមទឹកទួលសំពៅ»។
បើតាមលោក ភក្ដី ការជន់លិចភូមិ និងផ្លូវក្នុងតំបន់នេះបង្កឡើងពីកត្តាមួយចំនួនរួមមាន ភ្លៀងធ្លាក់ខ្លាំងក្នុងរយៈពេលប៉ុន្មានថ្ងៃនេះមានកម្រិតចន្លោះពី ១៥០ ម.មដល់ ១៩០ ម.ម ក្នុង ១ វិនាទី ការចាក់ដីរំលោភយកដីចំណីប្រឡាយ ការសាងសង់សំណង់លំនៅឋានរំលោភលើប្រព័ន្ធប្រឡាយ និងការចោលសំរាមពាសវាលពាសកាលនាំឱ្យស្ទះមាត់លូជាដើម។
លោកថា៖ «យើងមិនអាចទប់ស្កាត់គ្រោះធម្មជាតិមិនឱ្យកើតមាននោះទេ ប៉ុន្តែយើងអាចរួមគ្នាដោះស្រាយផលប៉ះពាល់ដែលបង្កឡើងពីគ្រោះធម្មជាតិនោះបានតាមរយៈការបញ្ឈប់សកម្មភាពដែលបង្កមហន្តរាយដល់សង្គម និងបរិស្ថាន»។
ជាមួយគ្នានេះលោក ភក្ដី បានសុំការយោគយល់ពីពលរដ្ឋដែលរស់នៅជិតទីតាំងស្ដារប្រព័ន្ធប្រឡាយមេមួយក្នុងខណ្ឌកំបូល ដែលនឹងត្រូវជីកស្ដារតភ្ជាប់ទៅបឹងតាមោក និងចូលទន្លេសាប ដើម្បីកាត់បន្ថយការលិចលង់។
ជុំវិញបញ្ហាជំនន់ទឹកភ្លៀងនេះដែរលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមបានចេញសេចក្ដីជូនដំណឹងកាលថ្ងៃទី ៥ ខែតុលា ដោយអំពាវនាវដល់ពលរដ្ឋរស់នៅតាមទីប្រជុំជន ទីទំនាបក្បែរផ្លូវទឹក បង្កើនការប្រុងប្រយ័ត្នខ្ពស់ចំពោះគ្រោះជំនន់ទឹកភ្លៀងដែលអាចនឹងកើតមានចាប់ពីពាក់កណ្ដាលនៃសប្ដាហ៍នេះទៅ។
តាមរយៈសេចក្ដីជូនដំណឹងនេះ លោករដ្ឋមន្ត្រីបានបញ្ជាក់ថា ពេលនេះប្រព័ន្ធសម្ពាធទាបនៅតែបន្តឆ្លងកាត់កម្ពុជាដោយភ្ជាប់នឹងវិសម្ពាធទាបលើសមុទ្រចិនខាងត្បូង។ ស្ថានភាពបែបនេះនឹងធ្វើឱ្យមានភ្លៀងធ្លាក់ខ្លាំងក្នុងផ្នែកមួយចំនួននៃបណ្ដារាជធានី-ខេត្តនៅភាគខាងត្បូង និងខាងកើតជាប់ព្រំដែនវៀតណាម និងខេត្តជាប់មាត់សមុទ្រ។
លោកបានបញ្ជាក់ថា៖ «ចាប់ពីថ្ងៃទី ៧ ដល់ថ្ងៃទី ៩ ខែ តុលា ឆ្នាំ ២០២០ ខាងមុខនេះនៅតាមតំបន់ដែលស្ថិតនៅទីទំនាបក្បែរផ្លូវទឹក តំបន់ភ្នំ និងតំបន់ជួរភ្នំក្រវាញនឹងមានបញ្ហាប្រឈមខ្ពស់ចំពោះជំនន់ទឹកភ្លៀង រលកសមុទ្រ និងខ្យល់បោកបក់ខ្លាំង»៕
