.jpg)
អភិបាលខេត្ដកោះកុង លោកស្រី មិថុនា ភូថង ថ្លែងក្នុងសន្និសីទកាសែតកាលពីព្រឹកមិញ។ ហុង មិនា
កោះកុងៈ អភិបាលខេត្ដកោះកុង លោកស្រី មិថុនា ភូថង បានអះអាងថាមានពលរដ្ឋជាង ១ ០០០ គ្រួសារ ដែលវិវាទដីធ្លីត្រូវបានអាជ្ញាធរដោះស្រាយ គិតចាប់តាំងពីឆ្នាំ ២០១៨ មក ខណៈនៅមានសំណុំរឿងវិវាទដីធ្លី ៩ ករណីទៀត កំពុងបន្តពន្លឿនការដោះស្រាយជាមួយនឹងការប្ដេជ្ញាចិត្តថានឹងបញ្ចប់ការងារនេះឱ្យរួចរាល់ក្នុងឆ្នាំ ២០២០នេះ។
ការអះអាងរបស់លោកស្រី មិថុនា ភូថង បែបនេះ ធ្វើឡើងក្នុងពេលឆ្លើយតបនឹងសំណួរភ្នំពេញប៉ុស្ដិ៍នៅឯសន្និសីទសារព័ត៌មានស្តីពី «វឌ្ឍនភាពនិងទិសដៅការងារបន្តរបស់រដ្ឋបាលខេត្តកោះកុង» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនៅថ្ងៃទី ១១ មិថុនា នេះ នៅទីស្ដីការគណៈរដ្ឋមន្រ្ដី។
លោកស្រីអភិបាលខេត្ដបានថ្លែងថា បញ្ហាវិវាទដីធ្លីក្នុងខេត្ដកោះកុងគិតចាប់តាំងពីឆ្នាំ ២០១៨ មកទល់បច្ចុប្បន្ន រដ្ឋបាលខេត្ដបានដោះស្រាយជូនពលរដ្ឋបានជាង ១ ០០០ គ្រួសាររួចហើយ។ ប៉ុន្តែនៅមានករណីខ្លះមិនទាន់បានបញ្ចប់ដែលភាគច្រើនជាករណីវិវាទដីធ្លីជាប់ពាក់ព័ន្ធទៅលើដីអភិរក្ស ដីបរិស្ថាន និងដីគម្របព្រៃឈើជាដើម។
លោកស្រីថ្លែងថា៖ «នៅមានចំនួនបញ្ហាវិវាទដីធ្លីនេះតិចតួចទៀតដែលរដ្ឋបាលខេត្ដបាន និងកំពុងខិតខំបន្តការដោះស្រាយបញ្ចប់ឲ្យបានឆាប់រហ័សនៅក្នុងឆ្នាំ ២០២០ នេះ»។
ដោយឡែកចំពោះការចុះបញ្ជីក្បាលដីជាលក្ខណៈប្រព័ន្ធ លោកស្រី មិថុនា ភូថង បានឲ្យដឹងថា រដ្ឋបាលខេត្ដក៏កំពុងពន្លឿនរៀបចំឲ្យឆាប់ចប់នៅក្នុងឆ្នាំ ២០២១ ផងដែរ តាមរយៈការសហការគ្នាជាមួយក្រសួងពាក់ព័ន្ធ។
លោក រស់ វីរ៉ាវុធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ដកោះកុង បានបញ្ជាក់បន្ថែមលើសំណួរភ្នំពេញប៉ុស្ដិ៍ដែរថា វិវាទដីធ្លីក្នុងខេត្ដកោះកុងមាន ២ ប្រភេទ គឺវិវាទដែលពលរដ្ឋដាក់បណ្ដឹងមកតាមរយៈមន្ទីរពាក់ព័ន្ធ និងវិវាទដែលពលរដ្ឋប្ដឹងផ្ទាល់នៅរដ្ឋបាលសាលាខេត្ដកោះកុងតែម្ដង។
លោកថ្លែងថា៖ «ដូចដែលលោកជំទាវអភិបាលខេត្ដបានមានប្រសាសន៍មុននេះ គឺយើងបានដោះស្រាយមួយចំនួនធំនាពេលកន្លងមកនៅសេសសល់មួយចំនួនតូចដែលយើងត្រូវបន្តដោះស្រាយ។ បច្ចុប្បន្នក្នុងខេត្ដមានបញ្ហាវិវាទចំនួន ១២ ក្នុងនោះយើងបានដោះស្រាយរួចរាល់ខ្លះហើយនៅសល់តែ ៩ ទៀតប៉ុណ្ណោះ ដែលត្រូវបន្តដោះស្រាយ»។
ក៏ប៉ុន្តែ លោក វីរ៉ាវុធ បញ្ជាក់ថា ការចុះបញ្ជីក្បាលដីជាលក្ខណៈប្រព័ន្ធក្នុងខេត្ដកោះកុងអាចធ្វើបានតែត្រឹមពាក់កណ្ដាលឆ្នាំប៉ុណ្ណោះ តែពេលចូលដល់រដូវវស្សាមិនអាចបន្តធ្វើបានទេ ដោយសារមានភ្លៀងជាប្រចាំធ្វើឲ្យប៉ពាល់ដល់ទីតាំងភូមិសាស្រ្ដស្របពេលដែលចំនួនមន្រ្ដីបច្ចេកទេសលើការងារនេះនៅមានកម្រិតនៅឡើយ។
ទោះជាយ៉ាងណា លោក វីរ៉ាវុធ បានអំពាវនាវដល់ពលរដ្ឋដែលមានដីក្នុងខេត្ដកោះកុងឲ្យចូលរួមចុះបញ្ជីក្បាលដីឱ្យបានគ្រប់ៗគ្នាដើម្បីពន្លឿនការងារឲ្យឆាប់ចប់។
លោក សុខ សុទ្ធី អភិបាលរងនិងជាអ្នកនាំពាក្យរដ្ឋបាលសាលាខេត្ដកោះកុងបានបន្ថែមដែរថា ករណីវិវាទដីធ្លីធំៗក្នុងខេត្ដ កោះកុងមាន ៣ ក្នុងនោះមានវិវាទរវាងពលរដ្ឋក្នុងស្រុកស្រែអំបិលជាមួយក្រុមហ៊ុនស្កអំពៅតែករណីនេះដោះស្រាយជិតចប់ ១០០ ភាគរយហើយ ពោលគឺនៅសេសសល់ ១ គ្រួសារប៉ុណ្ណោះដែលមិនព្រមទទួលយកបណ្ណកម្មសិទ្ធិ។
ទី២ គឺបញ្ហាវិវាទដីធ្លីរវាងពលរដ្ឋជាមួយក្រុមហ៊ុនអភិវឌ្ឍន៍ UnionDevelopment Group (UDG) នៅឃុំព្រែកខ្សាច់ស្រុកគិរីសាគរ តែដោះស្រាយបានជាង ៨០ ភាគរយហើយ ខណៈពលរដ្ឋជាង ១០ ភាគរយ ចង់រស់នៅក្នុងទីតាំងវិនិយោគ ប៉ុន្ដែក្រុមហ៊ុនចង់រកទីតាំងថ្មីជូន។ ចំណែកវិវាទដីធ្លីមួយទៀតគឺករណីកន្លងមកមានពលរដ្ឋរស់ក្នុងខេត្ដដែលទទួលបានគោលនយោបាយបែងចែកដីរួចហើយប៉ុន្ដែពួកគាត់នៅចង់បានសំណងគោលនយោបាយ(ចង់បានដី)បន្ថែមពីរាជរដ្ឋាភិបាល។
លោក សុទ្ធី បានបញ្ជាក់ថា៖ «សរុបមកវិញយន្តការធំៗនូវការដោះស្រាយបញ្ហាវិវាទដីធ្លីក្នុងខេត្ដកោះកុងសឹងតែបញ្ចប់អស់ទៅហើយនៅមានមួយចំនួនយើងកំពុងសិក្សាគោលនយោបាយបន្ថែមជូនពលរដ្ឋក្នុងការដោះស្រាយ។ពេលនេះ យើងបានសុំគោលនយោបាយទៅថ្នាក់ជាតិក្នុងការដោះស្រាយបញ្ហាវិវាទដីធ្លីក្នុងខេត្ដកោះកុងនេះឱ្យបានចប់នៅក្នុងឆ្នាំ ២០២០ ឬយ៉ាងយូរនៅពាក់កណ្ដាលឆ្នាំ ២០២១ ខាងមុខ»៕
