.jpg)
លោក វ៉ា ថន (កំពុងថ្លែង) និងមន្ត្រីក្នុងសន្និសីទកាសែតកាលពីម្សិលមិញ។ ហេង ជីវ័ន
ភ្នំពេញៈ រដ្ឋបាលខេត្តក្រចេះអះអាងកាលពីម្សិលមិញថាបញ្ហាវិវាទដីធ្លីនៅក្នុងខេត្តនេះមានការស្ងប់ស្ងាត់ និងមានភាពប្រសើរ ដោយសារតែខេត្តបានអនុវត្ដបទបញ្ជាលេខ ០១ របស់រដ្ឋាភិបាលក្នុងការធ្វើប្រទានកម្មដីធ្លី និងផ្ដល់ដីសម្បទានសង្គមកិច្ចដល់ពលរដ្ឋបានទាន់ពេល ខណៈគិតចាប់ពីឆ្នាំមុនមកទល់ពាក់កណ្ដាលឆ្នាំនេះ ខេត្ដបានទទួលសំណុំរឿងវិវាទដីធ្លី ១៤៨ ករណី តែដោះស្រាយបាន ៨៣ ករណីហើយ។
លោក វ៉ា ថន អភិបាលខេត្ដក្រចេះថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្ដក្រចេះ» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនៅទីស្ដីការគណៈរដ្ឋមន្ដ្រីកាលពីម្សិលមិញថា វិស័យដីធ្លី និងសំណង់នៅក្នុងប្រទេសកម្ពុជាមានការរីកចម្រើនខ្លាំង។
ដោយឡែកចំពោះខេត្ដក្រចេះទីផ្សារដីធ្លី និងការសាងសង់រីកដុះដាលគ្រប់ទីកន្លែងផងដែរ។
លោកបានបន្តថា ការងាររដ្ឋបាលដីធ្លី រដ្ឋបាលខេត្ដបានសហការជាមួយមន្ដ្រីបច្ចេកទេសនៃក្រសួងរៀបចំដែនដីនគរូបនីយកម្ម និងសំណង់ដោយបានចុះបញ្ជីដីធ្លីជាលក្ខណៈប្រព័ន្ធនៅក្នុង ៤ ក្រុង/ស្រុក (ក្រុងក្រចេះ ស្រុកចិត្របុរី ស្រុកព្រែកប្រសព្វ និងស្រុកឆ្លូង) បានចំនួន ១៥ ៩៨៨ បណ្ណ ក្នុងនោះបណ្ណសម្បទានដីសង្គមកិច្ចចំនួន ២ ៤៩១ បណ្ណ។ ចុះបញ្ជីដីសហគមន៍ជនជាតិដើមភាគតិចបាន ២ សហគមន៍ស្ថិតនៅភូមិស្រែឈូក ឃុំរលួសមានជ័យ និងភូមិត្នោត ឃុំស្រែជិះ ស្រុកសំបូរ។
លោកបានបន្តថា ចំពោះការងារដោះស្រាយទំនាស់ដីធ្លីខេត្តបានទទួលពាក្យបណ្ដឹងសរុប ១៤៨ ករណីក្នុងនោះបានដោះស្រាយបញ្ចប់ចំនួន ៨៣ ករណី និងកំពុងដោះស្រាយមួយចំនួន។
ក៏ប៉ុន្តែក្នុងនោះមានពលរដ្ឋសុំដកពាក្យបណ្ដឹងទៅវិញចំនួន ៨ ករណី និងបានរក្សាទុកដោះស្រាយតាមផ្លូវតុលាការចំនួន ៩ ករណី បន្ទាប់ពីស៊ើបអង្កេតទៅខុសនឹងសមត្ថកិច្ចរបស់រដ្ឋបាលខេត្ដ។
លោក កៅ ម៉ាឌីឡែន ប្រធានមន្ទីរ រៀបចំដែនដី នគរូបនីយកម្ម សំណង់ និងសុរិយោដី ខេត្ដក្រចេះថ្លែងក្នុងសន្និសីទនេះដែរថា ចាប់ពីឆ្នាំ ២០១៩ រហូតដល់ពាក់កណ្ដាលឆ្នាំនេះ រដ្ឋបាលខេត្ដបានបែងចែកដីសម្បទានសង្គមកិច្ចដល់ពលរដ្ឋបានចំនួន ៣ ០៣៤ គ្រួសារ និងផ្ដល់ដីសម្បទានសង្គមកិច្ចដល់អតីតកងកម្លាំងប្រដាប់អាវុធ និងគ្រួសារចូលនិវត្ដន៍បាន ៣៦២ គ្រួសារ។
លោកថ្លែងថា៖ «ការងារបែងចែកដីនេះគឺធ្វើទៅតាមបទបញ្ជាលេខ ០១ របស់រាជរដ្ឋាភិបាលនេះបានធ្វើឱ្យបញ្ហាទំនាស់ដីធ្លីនៅក្នុងខេត្ដក្រចេះ មានភាពប្រសើរឡើងមានភាពស្ងប់ស្ងាត់ល្អរហូតដល់បច្ចុប្បន្ននេះ»។ លោកបន្តថា ការងារបែងចែកដីសម្បទានសង្គមកិច្ច ដើម្បីធ្វើឱ្យចំមុខសញ្ញា បែងចែកជូនពលរដ្ឋក្រីក្រដែលមានការខ្វះខាតដី គ្មានដីសម្រាប់សង់លំនៅឋាន និងធ្វើកសិកម្មជាលក្ខណៈគ្រួសារពិតប្រាកដមែន។
បើតាមលោក កៅ ម៉ាឌីឡែន ខេត្ដក្រចេះបានចាប់ផ្ដើមបែងចែកដីសម្បទានសង្គមកិច្ចតាំងពីឆ្នាំ ២០១០ រហូតមកដល់បច្ចុប្បន្ននេះសរុបបាន ១២ ០០០ គ្រួសារ។ ចំពោះដីប្រទានកម្ម (ដីដែលរាជរដ្ឋាភិបាលបានឃើញពលរដ្ឋប្រើប្រាស់ដីជាក់ស្ដែង ហើយអាជ្ញាធរបានចុះទៅពិនិត្យឃើញការប្រើប្រាស់ដីនោះមែនក៏បានអនុវត្ដតាមបទបញ្ជាលេខ ០១ របស់រាជរដ្ឋាភិបាល វាស់វែង និងចេញបណ្ណកម្មសិទ្ធិដីធ្លីជូនពលរដ្ឋតែម្ដង។
លោកបានបន្ថែមថា ចំពោះការធ្វើប្រទានកម្មដីដល់ពលរដ្ឋគិតចាប់ពីឆ្នាំ ២០១២ មក រដ្ឋបាលខេត្ដបានបែងចែកជូនដល់ពលរដ្ឋបានចំនួន ២៨ ០០០ គ្រួសារ ស្មើនឹង ២៨ ០០០ ក្បាលដី។ ប៉ុន្តែបើគិតជាក្បាលដីដែលរាជរដ្ឋាភិបាលបានកាត់ដីសាធារណៈរបស់រដ្ឋគឺស្មើនឹងជិត ១៣ ម៉ឺនហិកតា៕
