.jpg)
ក្រុមមន្ត្រីហ៊្វុនស៊ិនប៉ិច នៅមុខស្នាក់ការគណបក្សកាលពីម្សិលមិញ។ ហេង ជីវ័ន
ភ្នំពេញ: មន្ត្រីជាន់ខ្ពស់ និងសមាជិកគណបក្សហ៊្វុនស៊ិនប៉ិចប្រមាណ ៨៥ ភាគរយ គ្រោងប្ដឹងព្រះអង្គម្ចាស់នរោត្តម ចក្រាវុឌ្ឍ ប្រធានស្តីទីគណបក្សហ៊្វុនស៊ិនប៉ិចទៅក្រសួងមហាផ្ទៃជុំវិញករណីបញ្ជាឲ្យសមត្ថកិច្ចបិទទីស្នាក់ការគណបក្សនេះនៅសង្កាត់ជ្រោយចង្វាររាជធានីភ្នំពេញ ខណៈមន្ត្រី ៤ រូប ទើបត្រូវបានដកចេញពីគណបក្សនេះ។
លោក ណុប សុធារិទ្ធិ អតីតអ្នកនាំពាក្យគណបក្សហ៊្វុនស៊ិនប៉ិចដែលទើបត្រូវបានបញ្ចប់ពីសមាជិកភាពក្នុងបក្សជាមួយមន្ត្រី ៣ នាក់ទៀត បានថ្លែងក្នុងសន្និសីទកាសែតនៅមុខស្នាក់ការធំរបស់បក្សកាលពីម្សិលមិញថា ព្រះអង្គម្ចាស់នរោត្តម ចក្រាវុឌ្ឍ បានបញ្ជាសមត្ថកិច្ចប្រមាណជាង ៣០ នាក់ ឲ្យហ៊ុមព័ទ្ធទីស្នាក់ការគណបក្សហ៊្វុនស៊ិនប៉ិចនៅសង្កាត់ជ្រោយចង្វារ និងបានយកសេចក្ដីប្រកាសបិទទីស្នាក់ការមកចែកជូនសមាជិកគ្រប់ៗគ្នា ប៉ុន្ដែលោកមិនដឹងពីចេតនារបស់ព្រះអង្គម្ចាស់នរោត្តម ចក្រាវុឌ្ឍ នោះទេ។
លោកបន្តថា សមាជិកបក្សប្រមាណ ៨៥ ភាគរយ នឹងតស៊ូមតិតាមផ្លូវច្បាប់ដោយប្ដឹងទៅក្រសួងមហាផ្ទៃ ពីព្រោះគណបក្សដែលមានសិទ្ធិឈរឈ្មោះឲ្យគេបោះឆ្នោតជូនគឺត្រូវឆ្លងកាត់ការចុះបញ្ជីនៅក្រសួងមហាផ្ទៃជាអាណាព្យាបាល។ ដូច្នេះពួកលោកជំទាស់ចំពោះការបិទទីស្នាក់ការនេះ ហើយស្នើឲ្យក្រសួងមហាផ្ទៃរកមូលហេតុ និងជួយដោះស្រាយតាមនីតិវិធីច្បាប់។
លោកថា៖ «យើងខ្ញុំនឹងរៀបចំពាក្យបណ្ដឹងនាពេលឆាប់ៗខាងមុខនេះ។ ពួកខ្ញុំរំពឹងលទ្ធផលជាវិជ្ជមាន ព្រោះពួកខ្ញុំគិតថា ប្រទេសកម្ពុជាមានច្បាប់គ្រប់គ្រាន់ក្នុងការដោះស្រាយបញ្ហាទាំងនេះ។ ពួកខ្ញុំមកប្រជុំនេះ មិនមែនមកតវ៉ារឿងបង្រួបបង្រួមគ្នាជាមួយលោក ញឹក ប៊ុនឆៃ ទេ គឺប្រជុំរឿងប្រចាំឆមាស ប៉ុន្ដែព្រះអង្គម្ចាស់បែរជាធ្វើឲ្យមានការរាំងស្ទះដល់ការប្រជុំការងារបក្សនេះ ខ្ញុំយល់ថា ប្រហែលជាព្រះអង្គមានព្រះទ័យបារម្ភរឿងអ្វីមួយ តែខ្ញុំមិនទាន់ដឹងយ៉ាងណាទេ»។
ព្រះអង្គម្ចាស់ នរោត្តម ចក្រាវុឌ្ឍ ប្រធានស្តីទីគណបក្សហ៊្វុនស៊ិនប៉ិចពីម្សិលមិញមិនអាចស្វែងរកប្រភពទាក់ទងសុំការបញ្ជាក់ជុំវិញការបិទទីស្នាក់ការគណបក្សហ៊្វុនស៊ិនប៉ិចនៅឡើយ។
ប៉ុន្តែតាមលិខិតសេចក្ដីជូនដំណឹងរបស់គណបក្សហ៊្វុនស៊ិនប៉ិចដែលមានចុះហត្ថលេខាដោយព្រះអង្គម្ចាស់ នរោត្តម ចក្រាវុឌ្ឍ បានឲ្យដឹងពីម្សិលមិញថា៖ «គណបក្សហ៊្វុនស៊ិនប៉ិចមានកិត្តិយសដ៏ខ្ពង់ខ្ពស់សូមជម្រាបជូនសមាជិក សមាជិកា គណបក្សទាំងអស់ និងសាធារណជនមេត្តាជ្រាបថា ទីស្នាក់ការគណបក្សហ៊្វុនស៊ិនប៉ិចដែលមានអាសយដ្ឋានផ្ទះលេខ ៥៩ ផ្លូវលំក្រុមទី ១ ភូមិ ២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញត្រូវបានផ្អាកសកម្មភាពការងារ និងបិទទ្វារជាបណ្តោះអាសន្នចាប់ពីថ្ងៃជូនដំណឹងនេះតទៅ»។ ប៉ុន្ដែលិខិតនេះមិនបានបញ្ជាក់ពីមូលហេតុទេ។
លោក ហួន ហ៊ួត សមាជិកក្រុមការងារគណបក្សហ៊្វុនស៊ិនប៉ិចខេត្តកណ្ដាលបានថ្លែងពីម្សិលមិញថា លោកបានមកចូលប្រជុំប្រចាំឆមាស ប៉ុន្ដែពេលមកដល់ទីស្នាក់ការបក្សត្រូវបានមិនឲ្យចូលដោយមិនដឹងមូលហេតុដែលធ្វើលោកខកចិត្តជាខ្លាំង។
លោកបន្តថា លោកធ្លាប់បានឮពាក្យចចាមអារ៉ាមពីការបង្រួបបង្រួមជាមួយគណបក្សលោក ញឹក ប៊ុនឆៃ ដែរ ប៉ុន្ដែលោកមិនទាន់មានមតិយោបល់ពីរឿងនេះទេ តែលោកថានឹងគាំទ្រមតិភាគច្រើន។
យ៉ាងណាក្ដីលោកបានបញ្ជាក់ថា៖ «គម្រោងបង្រួបបង្រួមគ្នានេះខ្ញុំមានការបារម្ភ ព្រោះការច្របាច់បញ្ចូលគ្នាជាច្រើនលើកមកហើយ ប៉ុន្ដែមិនបានផលចំណេញ ឬធ្វើឲ្យបក្សរីកចម្រើនទេ តែវាថែមទាំងធ្វើបក្សកាន់តែជិតរលាយទៅវិញធ្វើឲ្យបែកបាក់ផ្ទៃក្នុង។ ម្យ៉ាងទៀតយើងមិនគួរបង្រួបបង្រួមជាមួយអ្នកដែលធ្លាប់ធ្វើឲ្យគណបក្សហ៊្វុនស៊ិនប៉ិចស្ទើររលាយកន្លងមកនេះទេ»។
បើតាមលោក ណុប សុធារិទ្ធិ នៅថ្ងៃទី ១៧ ខែវិច្ឆិកា គឺជាថ្ងៃដែលសមាជិកសមាជិកាគណបក្សហ៊្វុនស៊ិនប៉ិចមកជួបប្រជុំគណៈកម្មការអចិន្រៃ្តយ៍ស្ដីពីការវិវឌ្ឍនយោបាយចុងក្រោយនៅប្រទេសកម្ពុជា ការផ្សព្វផ្សាយពីគោលនយោបាយគណបក្សបន្ថែម និងការផ្លាស់ប្ដូរមតិយោបល់ជុំវិញបញ្ហានានាដែលគណបក្សហ៊្វុនស៊ិនប៉ិចកំពុងប្រឈមដើម្បីដោះស្រាយទាំងអស់គ្នា។
លោក ណុប សុធារិទិ្ធ បានបញ្ជាក់ពីម្សិលមិញថា៖ «ព្រះអង្គម្ចាស់ នរោត្តម ចក្រាវុឌ្ឍ នៅតែប្រើអំណាចដែលខុសច្បាប់ និងខុសលក្ខន្តិកៈបក្សត្រង់ប្រការ ២៤ នេះ» ។
យ៉ាងណាក៏ដោយ លោក ណុប សុធារិទិ្ធ ដែលជាអគ្គលេខាធិការរងផងនោះ រួមទាំងមន្ត្រី ៣ នាក់ទៀតរួមមាន លោក ពេជ្រ សូជេថ្ថា អគ្គលេខាធិការ, លោក រស់ សាផន អគ្គលេខាធិការរង និងលោកស្រី កង បូរាណ នាយខុទ្ទកាល័យសម្តេចក្រុមព្រះនរោត្តម រណឫទ្ធិ សុទ្ធតែត្រូវបានបញ្ចប់សមាជិកភាពពីបក្សនេះទាំងអស់។
នេះបើតាមសេចក្ដីសម្រេចដែលចុះហត្ថលេខាដោយព្រះអង្គម្ចាស់ នរោត្ដម ចក្រាវុឌ្ឍ ប្រធានស្តីទីគណបក្សហ៊្វុនស៊ិនប៉ិចចុះថ្ងៃ ១៦ វិច្ឆិកា ឆ្នាំនេះ៕
