កោះកុងៈ គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា កំពុងចុះស៊ើបអង្កេតករណីបុគ្គលឈ្មោះ ហួរ ហាប់ ដែលបានបំពានចាក់ដី និងព័ទ្ធរបងនៅតាមបណ្តោយឆ្នេរសមុទ្រជិត ២ គីឡូម៉ែត្រប្រមាណ ១០ ហិកតាត្រង់ចំណុចពយជិនទុង ភូមិជ្រោយស្វាយ ឃុំជ្រោយស្វាយ ស្រុកស្រែអំបិល ខេត្តកោះកុង។ មន្ត្រីអះអាងថា របាយការណ៍នឹងត្រូវបិទបញ្ចប់នៅសប្តាហ៍ក្រោយ។
លោក នី ផល្លី អនុរដ្ឋលេខាធិការក្រសួងទេសចរណ៍ និងជាសមាជិកគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាដែលបានចុះស៊ើបអង្កេតករណីនេះកាលពី ២ សប្តាហ៍មុនបានប្រាប់ភ្នំពេញប៉ុស្តិ៍ពីម្សិលមិញថា ពិតជារកឃើញមានការចាក់ដីលុបសមុទ្រក្នុងតំបន់នោះពិតប្រាកដមែន។ ប៉ុន្តែតាមរយៈការផ្ទៀងផ្ទាត់ឯកសារនៅមានមន្ទិលសង្ស័យខ្លះៗដែលទាមទារឲ្យមានការធ្វើការស្រាវជ្រាវបន្ថែមទៀត។
លោកបន្តថា៖ «ក្រុមការងារកំពុងបន្តការស៊ើបអង្កេត ដើម្បីបិទបញ្ចប់របាយការណ៍ និងដើម្បីដាក់ជូនប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរ ធ្វើការពិនិត្យ និងសម្រេច»។
លោក នី ផល្លី បានប្រាប់ភ្នំពេញ-ប៉ុស្តិ៍បន្តថា៖ «ជាក់ស្តែងយើងបានឃើញមានការចាក់ចូល (សមុទ្រ) អ៊ីចឹងមែន ប៉ុន្តែយើងឃើញមានសំណើពីសហគមន៍នេសាទ និងសហគមន៍ការពារបរិស្ថានដែលនៅទីតាំងហ្នឹងបានស្នើសុំដើម្បីធ្វើជាចំណតសម្រាប់ចតទូករបស់សហគមន៍ផង និងជាកន្លែងទីស្នាក់ការផង»។
លោកបន្តថា៖ «ខ្ញុំត្រូវលម្អិតបន្ថែមទៀតថា តើការចាក់ដីចូលនេះក្នុងគោលបំណងឯកជន ឬដើម្បីផលប្រយោជន៍សាធារណៈ»។
លោក នី ផល្លី បានអះអាងថា នៅចំពោះមុខអាជ្ញាធរបានផ្អាករាល់សកម្មភាពបំពានទាំងឡាយដោយរង់ចាំការសម្រេចពីប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ក្រោយបញ្ចប់ការស៊ើបអង្កេតនៅសប្តាហ៍ក្រោយ។
ប្រជាសហគមន៍ការពារបរិស្ថាន និងសហគមន៍នេសាទរួមទាំងបុគ្គលដែលមានឈ្មោះថា ហួរ ហាប់ ដែលរងការចោទប្រកាន់ថាបំពានចាក់ដីចូលសមុទ្រ ភ្នំពេញប៉ុស្តិ៍ មិនអាចស្វែងរកប្រភពដើម្បីទាក់ទងបានទេ។
លោក សុខ សុទ្ធី អ្នកនាំពាក្យសាលាខេត្តកោះកុងបានឲ្យដឹងថាការចាក់លុបសមុទ្រក្នុងតំបន់នេះគឺបានកើតឡើងរយៈពេល ៣ ឆ្នាំមកហើយ។ លោកថា៖ «យើងស្វាគមន៍ចំពោះចំណាត់ការរបស់គណៈកម្មាធិការនេះដែរ។ សម្រាប់យើង មានតែរបាយការណ៍ថា ពិតជាមានការចាក់រំលោភពិតមែន សម្រាប់បុគ្គលក៏យើងរាយការណ៍ទៅក្រសួងស្ថាប័នដែរ ដែលទុកឲ្យសមត្ថកិច្ចគណៈកម្មធិការជាតិគ្រប់គ្រង និងអភិវឌ្ឍន៍តំបន់ឆ្នេរលោកធ្វើការ»៕
វីដេអូ៖