.jpg)
អ្នកចូលរួមនៅក្នុងសន្និបាតនៅក្រសួងបរិស្ថានម្សិលមិញ។ រូបថត សហការី
ភ្នំពេញៈ មន្ត្រីជាន់ខ្ពស់ក្រសួងបរិស្ថានចង់ឲ្យមន្ត្រីពាក់ព័ន្ធ និងសហគមន៍អភិរក្សធនធានធម្មជាតិទាំង ១៦៨ ចូលរួមជជែកពិភាក្សាគ្នាឲ្យបានស៊ីជម្រៅអំពីវិធានការការពារ និងអភិរក្សធនធានធម្មជាតិ ខណៈដែលប្រជាសហគមន៍ចង់ឲ្យរដ្ឋាភិបាលធ្វើការផ្សព្វផ្សាយច្បាប់ និងអត្ថប្រយោជន៍នៃព្រៃឈើឲ្យបានច្រើន។
នៅក្នុងសន្និបាតបណ្តាញសហគមន៍អភិរក្សធនធានធម្មជាតិប្រចាំឆ្នាំលើកទី ១ ឆ្នាំ ២០១៩ នៅទីស្តីការក្រសួងបរិស្ថានកាលពីថ្ងៃអង្គារ លោកស្រី ម៉ុម ថានី រដ្ឋលេខាធិការក្រសួងបរិស្ថានបានថ្លែងនៅចំពោះមុខអ្នកចូលរួមប្រមាណ ៥០០ នាក់ ថាទន្ទឹមនឹងលទ្ធផលដែលទទួលបានក៏មានបញ្ហាប្រឈមមួយចំនួនដែរ ដែលលោកស្រីជឿជាក់ថាបញ្ហាប្រឈមនេះគឺអាចដោះស្រាយបាន ដរាបណាអ្នកពាក់ព័ន្ធលើកយកបញ្ហាទាំងនោះមកដាក់លើតុ ហើយរួមគ្នារកវិធីដោះស្រាយ។
លោកស្រីបន្ថែមថា៖ «យើងគួរតែយកឱកាសនេះ ជជែកគ្នាឱ្យស៊ីជម្រៅអំពីតួនាទី និងភារកិច្ចរបស់បណ្តាញនៅគ្រប់កម្រិតហើយនិងការផ្សារភ្ជាប់រចនាសម្ព័ន្ធយ៉ាងម៉េចយន្តការយ៉ាងម៉េច ដែលយើងត្រូវប្រើប្រាស់ដើម្បីពង្រឹងការងារបណ្តាញរបស់យើង»។
លោកស្រី ម៉ុម ថានី លើកឡើងថា ការបង្កើតជាបណ្តាញគឺមិនមែនគ្រាន់តែបង្កើតឱ្យតែបាននោះទេ គឺត្រូវឱ្យមានដំណើរការ ហើយអាចជួយគ្នាទៅវិញទៅមកបានហើយទិសដៅចុងក្រោយគឺសម្រេចបាននូវការការពារ អភិរក្សធនធានធម្មជាតិ ដោយធ្វើយ៉ាងម៉េចឱ្យធនធានធម្មជាតិនៅគង់វង្ស។ លើសពីនេះការប្រើប្រាស់ផល និងអនុផលព្រៃឈើគឺត្រូវបានធ្វើឡើងដោយមាននិរន្តរភាព ហើយអ្វីដែលសំខាន់លទ្ធផលចុងក្រោយគឺជីវភាពរបស់ប្រជាសហគមន៍មានភាពល្អប្រសើរជាងមុន។
លោកស្រីបញ្ជាក់ថាការជជែកគ្នានេះគួរតែរកឱ្យឃើញនូវអ្វីដែលជាតម្រូវការចាំបាច់របស់បណ្តាញនៅគ្រប់កម្រិតដែលត្រូវឱ្យនាយកដ្ឋានសហគមន៍មូលដ្ឋាននៃក្រសួងបរិស្ថានយកទៅពិភាក្សាគ្នាបន្តទៀតដើម្បីដាក់បញ្ចូលទៅក្នុងផែនការសកម្មភាព ដើម្បីពង្រឹងសមត្ថភាព ប្រសិទ្ធភាពក៏ដូចជាដំណើរការរបស់បណ្តាញឱ្យមានប្រសិទ្ធភាព។
លោកស្រី ថានី នីបញ្ជាក់ថា៖ «តែខ្ញុំជឿជាក់ថា ប្រសិនបើអគ្គនាយកដ្ឋាន [សហគមន៍មូលដ្ឋាន] ធ្វើការយ៉ាងជិតស្និទ្ធជាមួយសហគមន៍ទាំង ១៦៨ អ៊ីចឹងសមិទ្ធផល ឬក៏លទ្ធផលដែលយើងនឹងទទួលបានយើងត្រូវគុណនឹង ១០ គុណនឹង ២០ ហ្នឹងទៅទៀត ព្រោះអីយើងទាមទារឱ្យមានការចូលរួមពីបងប្អូនដែលជាសហគមន៍តំបន់ការពារធម្មជាតិ ព្រោះអស់លោកទាំងអស់គ្នាស្ថិតនៅជាមួយនឹងសហគមន៍ស្ថិតនៅជាមួយនឹងធនធានធម្មជាតិ»។
បើតាមឯកសារទស្សនទាន ក្រសួងបរិស្ថាន គិតត្រឹមពាក់កណ្តាលឆ្នាំ ២០១៩ ក្រសួងបរិស្ថានបានបង្កើតសហគមន៍តំបន់ការពារធម្មជាតិបានចំនួន ១៦៨ សហគមន៍ ហើយសហគមន៍ទាំងអស់នេះត្រូវចងក្រង និងបង្កើតទៅជាបណ្តាញចំនួន ៣៥ ក្នុងតំបន់ការពារធម្មជាតិចំនួន ២៤ ក្នុងខេត្តចំនួន ១៧។
លោក រ៉ាត់ រឿយ ប្រធានបណ្តាញសហគមន៍មូលដ្ឋានព្រះជ័យវរ្ម័ននរោត្តមភ្នំគូលែននៃខេត្តសៀមរាបដែលបានចូលរួមសន្និបាតនេះបានប្រាប់ភ្នំពេញ-ប៉ុស្តិ៍ថា បច្ចុប្បន្នលោកមានតួនាទីគ្រប់គ្រងសហគមន៍ចំនួន ៥ និងដឹកនាំប្រធាន និងសមាជិកសហគមន៍ទាំងអស់ ដើម្បីការពារ និងថែរក្សាធនធានធម្មជាតិនៅក្នុងមូលដ្ឋាន។
លោកថាកាលពីមុនមិនមានការចូលរួមច្រើនពីសហគមន៍ ដើម្បីចូលរួមអភិរក្សការពារធនធានធម្មជាតិនោះទេ ព្រោះតំបន់នោះសម្បូរទៅដោយជនក្រីក្រ ហើយពួកគាត់រវល់តែជីវភាពប្រចាំថ្ងៃ។ ប៉ុន្តែឥឡូវពួកគាត់មានទឹកចិត្តចូលរួមចំណែកការពារច្រើននៅក្នុងតំបន់ដែលជាសក្តានុពលអេកូទេសចរណ៍ ហើយពួកគាត់មានចំណាប់អារម្មណ៍ទាក់ទាញភ្ញៀវទេសចរផងដែរ។
លោកបានឲ្យដឹងថា បច្ចុប្បន្នការកាប់រុករានទន្ទ្រានដីព្រៃធ្វើជាកម្មសិទ្ធិនៅមានចំនួនតិចតួច បើធៀបនឹងឆ្នាំ ២០១៥ ដល់ឆ្នាំ ២០១៧ ដែលសកម្មភាពបែបនេះកើតមានច្រើនពីព្រោះកាលនោះអ្នកដែលកាប់រុករានដីព្រៃ មិនទាន់មានការយល់ដឹងពីសារៈប្រយោជន៍ព្រៃឈើដែលជាសក្តានុពលរបស់អេកូទេសចរណ៍។
លោកថ្លែងថា៖ «ខ្ញុំចង់ឱ្យរដ្ឋាភិបាលជួយជ្រោមជ្រែងទៅលើគ្រួសារពលរដ្ឋក្រីក្រមួយចំនួនដែលគាត់នៅមានកម្រិតតោកយ៉ាកខ្លាំង ហើយខ្ញុំចង់ឱ្យមានការផ្សព្វផ្សាយច្បាប់ទាក់ទងនឹងការកាប់ព្រៃហ្នឹង និងអត្ថប្រយោជន៍របស់ព្រៃឈើយើងឱ្យបានទូលំទូលាយក្នុងមូលដ្ឋាន»៕
