ភ្នំពេញៈ លោក ឡាំង ជា រដ្ឋលេខាធិការក្រសួងមហាផ្ទៃបានឲ្យដឹងកាលពីម្សិលមិញថា មន្ត្រីជំនាញពីក្រសួងមហាផ្ទៃ ក្រសួងកសិកម្ម និងអាជ្ញាធរខេត្តដែលជាប់មាត់សមុទ្របានពិភាក្សាគ្នាដើម្បីព្រាងផែនការសកម្មភាពជាតិស្ដីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ក្នុងដែនសមុទ្រនៃព្រះរាជាណាចក្រកម្ពុជា។
លោក ឡាំង ជា បានថ្លែងក្នុងកិច្ចប្រជុំកាលពីថ្ងៃទី ១៦ ខែមករា កន្លងមកនេះថា ក្រសួងមហាផ្ទៃ និងក្រសួងកសិកម្ម រុក្ខាប្រមាញ់ និងនេសាទបានឯកភាពគ្នាពីការកំណត់នូវសមត្ថកិច្ចចូលបន្ថែមនៅក្នុងផែនការពារជាតិ ដោយមានការផ្ដល់យោបល់ពីតំណាងខេត្តទាំង ៤ ដែលជាប់សមុទ្រ និងមន្ត្រីជំនាញពាក់ព័ន្ធរបស់ក្រសួងមហាផ្ទៃ ដើម្បីធានាបាននូវការទប់ស្កាត់បានទាំងស្រុងនូវបទល្មើសនេសាទធនធានធម្មជាតិក្នុងដែនសមុទ្រ។
លោក ជា បានឲ្យដឹងថា៖ «ពេលខ្លះអាជ្ញាធរលោកមានការពិបាកពិនិត្យមើលទាំងយប់ទាំងថ្ងៃ ២៤ ម៉ោងនៅលើសមុទ្រ ដូច្នេះហើយវាពាក់ព័ន្ធទៅនឹងការនេសាទ និងការគ្រប់គ្រងជលផលនៅក្នុងលម្ហសមុទ្រ និងទី ២ ដើម្បីកិច្ចសហប្រតិបត្តិការទាំងថ្នាក់តំបន់ និងអន្តរជាតិ ហើយគោលការណ៍តំបន់និងអន្តរជាតិគឺគេចង់ឲ្យរដ្ឋជាប់សមុទ្រជាពិសេសក្នុងតំបន់ឲ្យមានការសហការគ្នាល្អដើម្បីទប់ស្កាត់ និងបង្ក្រាបការនេសាទខុសច្បាប់»។
លោកបានថ្លែងបន្តថា៖ «ឈានចេញពីការអនុវត្តផែនការសកម្មភាពជាតិហ្នឹង គឺក្រសួងកសិកម្ម មានគំនិតផ្តួចផ្តើមគឺធ្វើវិសោធនកម្មច្បាប់ជលផល។ ទី ២ អាចរៀបចំជាសេចក្តីព្រាងអនុក្រឹត្យដើម្បីរៀបចំធ្វើម៉េចពង្រឹងសមត្ថកិច្ចទាំងអស់គឺដើម្បីសហការគ្នាក្នុងបង្ក្រាបបទល្មើស នេសាទដែលខុសច្បាប់ គ្មានការអនុញ្ញាត យ៉ាងហោចណាស់វាមិនបាន ១០០ ភាគរយ យ៉ាងហោចណាស់វាមានប្រសិទ្ធភាពដែលអាចទទួលយកបានដែរ»។
បើយោងតាមគេហទំព័រក្រសួងមហាផ្ទៃដែលបានចុះផ្សាយកាលពីថ្ងៃទី ១៦ នេះបានឲ្យដឹងថាផែនការសកម្មភាពជាតិនេះត្រូវបានរៀបចំឡើងដែលមានសកម្មភាពសំខាន់ៗដូចជា៖ ការកែសម្រួល ប្រព័ន្ធច្បាប់ សេចក្តីព្រាង និងការអនុម័តផែនការជាតិត្រួតពិនិត្យ និងអធិការកិច្ច ការបណ្តុះបណ្តាលអ្នកអង្កេតការណ៍កម្ពុជា និងមន្ត្រីអធិការកិច្ចកំពង់ផែនេសាទ កាតព្វកិច្ចធ្វើរបាយការណ៍ និងការកត់ត្រាប្រព័ន្ធតាមដាននាវានេសាទនៅកម្ពុជា។
ផែនការសកម្មភាពជាតិស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាតត្រូវបានរៀបចំឡើងផ្អែកលើផែនការសកម្មភាពអន្តរជាតិ ផែនការសកម្មភាពថ្នាក់តំបន់ និងគោលការណ៍ណែនាំរបស់អាស៊ានលេខាធិការដ្ឋានអភិវឌ្ឍន៍អាស៊ីអាគ្នេយ៍ស្ដីពីការបង្ការការនាំចូលផល ផលិតផលជលផលពីសកម្មភាពនេសាទខុសច្បាប់ គ្មានរបាយការណ៍ និងគ្មានការអនុញ្ញាតចូលទៅក្នុងខ្សែចង្វាក់ផលិតកម្ម។
គេហទំព័រនេះបានបន្តថា៖ «ផែនការសកម្មភាពជាតិមានគោលបំណង ដើម្បីប្រយុទ្ធប្រឆាំងនឹងការនេសាទខុសច្បាប់ គ្មានរបាយការណ៍ និង គ្មានការអនុញ្ញាតដោយអនុវត្តវិធានការដ៏ទូលំទូលាយ មានប្រសិទ្ធភាព និងតម្លាភាព និងដើម្បីផ្តល់ប្រសិទ្ធភាពពេញលេញនូវការអនុវត្តបទប្បញ្ញត្តិដែលជាផ្នែកសំខាន់នៃកម្មវិធីគ្រប់គ្រងជលផល»។
លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានបដិសេធក្នុងការធ្វើអត្ថាធិប្បាយខណៈពេលដែលលោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទមិនអាចទាក់ទងសុំការអត្ថាធិប្បាយបាននោះទេពាក់ព័ន្ធនឹងសេចក្តីព្រាងផែនការសកម្មភាពជាតិ។
លោក ប៉ិល កុសល អភិបាលរងខេត្តកំពតដែលបានចូលរួមនៅក្នុងកិច្ចប្រជុំសេចក្តីព្រាងផែនការសកម្មភាពជាតិកាលពីថ្ងៃទី ១៦ ខែ មករា ឆ្នាំ ២០២០ បានបដិសេធធ្វើអត្ថាធិប្បាយពាក់ព័ន្ធពីកិច្ចប្រជុំនោះ។ លោក ទៀ សុខា មេបញ្ជាការរងកងទ័ពជើងទឹក និងអគ្គលេខាធិការនៃគណៈកម្មាធិការជាតិសន្តិសុខលម្ហសមុទ្របានបដិសេធធ្វើអត្ថាធិប្បាយ៕