កំពង់ស្ពឺៈ មន្ត្រីបរិស្ថានខេត្តកំពង់ស្ពឺ និងអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) របស់លោក ជា ហ៊ាន រួមគ្នាចុះរុះរើខ្ទមអនាធិបតេយ្យជាង ១០ ខ្ទមនៅថ្ងៃនេះ ដែលគេលួចសាងសង់នៅដែនជម្រកសត្វព្រៃភ្នំឱរ៉ាល់ស្ថិតក្នុងភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បន្ទាប់ពីដាក់ឱសានវាទ ១០ ថ្ងៃឲ្យរុះរើចេញ។
លោក ហ៊ុល ម៉ារ៉ា អនុប្រធានការិយាល័យដែនជម្រកសត្វព្រៃភ្នំឱរ៉ាល់ ស្រុកឱរ៉ាល់ថ្លែងនៅថ្ងៃទី ២៣ សីហា ថា សមត្ថកិច្ចចម្រុះខេត្តកំពង់ស្ពឺ និងស្រុកឱរ៉ាល់នឹងចុះទៅរុះរើខ្ទមជាង ១០ របស់ជនខិលខូចមិនស្គាល់អត្តសញ្ញាណ នៅថ្ងៃទី ២៥ ខែសីហានេះ។ ពួកជនខិលខូចបាននាំគ្នាទៅសាងសង់ រំលោភយកដីដែនជម្រកសត្វព្រៃភ្នំឱរ៉ាល់ប្រមាណជាង ៤០០ ហិកតានៅទីតាំងខាងលើនេះ។
លោកបន្តថា ពួកគេបាននាំគ្នាធ្វើខ្ទមតូចក្បែរៗគ្នា ហើយកាប់ឆ្ការព្រៃរបោះតូចៗ និងកាប់ដើមឈើមួយចំនួនចោល ដើម្បីរុករានទន្ទ្រានយកដីរដ្ឋធ្វើជាកម្មសិទ្ធិដោយខុសច្បាប់។ បន្ទាប់ពីកាប់ឆ្ការរួចរាល់ពួកគេបានយកដើមចេក ដំឡូងមី ស្វាយ ស្វាយចន្ទី ដូង និងដំណាំរួមផ្សំមួយចំនួនទៀតទៅដាំនៅលើដីនោះ។
លោក ម៉ារ៉ា បញ្ជាក់ថា៖ «យើងបានដាក់ឱសានវាទឲ្យពួកគាត់រយៈពេល ១០ ថ្ងៃចាប់គិតពីថ្ងៃទី ១៤ ខែសីហា រហូតមក។ ប៉ុន្ដែយើងសង្កេតមើលទៅគឺពួកគាត់នៅមិនទាន់នាំគ្នាទៅរុះរើខ្ទមទាំងអស់ហ្នឹងចេញទេ។ អ៊ីចឹងនៅថ្ងៃទី ២៥ ខែសីហានេះយើងនឹងចុះទៅរុះរើដោយផ្ទាល់ជាមួយមន្ត្រីជំនាញខេត្ត និងស្រុកឱរ៉ាល់ ហើយនឹងបញ្ជូនសំណុំរឿងនេះទៅតុលាការផងដែរ»។
លោក ជា ហ៊ាន ប្រធានអង្គការ ACNCIPO ប្រាប់ភ្នំពេញប៉ុស្តិ៍នៅថ្ងៃទី ២៣ សីហា ថា លោក និង មន្ត្រីជំនាញបរិស្ថានខេត្តកំពង់ស្ពឺបានចុះពិនិត្យស្ថានភាពជាក់ស្ដែង រួចហើយដោយមានជនខិលខូចមិនស្គាល់អត្តសញ្ញាណ ១ ក្រុមបាននាំគ្នាទៅកាប់ឆ្ការ ទន្ទ្រានដីព្រៃនៃដែនជម្រកសត្វព្រៃភ្នំឱរ៉ាល់ធ្វើជាកម្មសិទ្ធិផ្ទាល់ខ្លួន។
លោកថា ដីដែលពួកគេឈូសឆាយរួចមួយចំនួនបានយកដំណាំចេក ដូង ស្វាយ ខ្នុរ និងដំណាំផ្សេងៗទៀតមកដាំលើដីនេះ។ លោកសង្ស័យថា មានអ្នកមានអំណាចនៅពីក្រោយខ្នងការរំលោភបំពានដែនជម្រកសត្វព្រៃភ្នំឱរ៉ាល់ដែលការពារដោយព្រះរាជក្រឹត្យ។
លោកប្រាប់ថា៖ «សកម្មភាពកាប់ឆ្ការហ្នឹង គឺគាត់អត់ប្រើប្រាស់ត្រាក់ទ័រទេ គឺគាត់ប្រើប្រាស់កាំបិទ ពូថៅ និងចបកាប់ ដើម្បីឲ្យមន្ត្រីយើងមើលឃើញថាពលរដ្ឋក្រីក្រខ្វះដី។ ប៉ុន្ដែបើគាត់ដាក់គ្រឿងចក្រមកឈូសឆាយ គឺគេមើលឃើញថាជាទ្រង់ទ្រាយឈ្មួញធំ។ អ៊ីចឹងគាត់បង្វែរសកម្មភាពនេះ គឺចង់បន្លំភ្នែកអាជ្ញាធរ។ យើងនៅមានការសង្ស័យច្រើនចំពោះអ្នកនៅពីក្រោយខ្នង គឺអាចនឹងមានអ្នកមានអំណាចនៅពីក្រោយ អ៊ីចឹងនឹងបន្តស៊ើបអង្កេតករណីនេះទៀត»។
តាមសេចក្ដីជូនដំណឹងរបស់ការិយាល័យដែនជម្រកសត្វព្រៃភ្នំឱរ៉ាល់នៃមន្ទីរបរិស្ថានខេត្តកំពង់ស្ពឺចុះថ្ងៃទី ១៤ សីហា ដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា ការកាប់ទន្ទ្រានដីព្រៃនៅទីតាំងខាងលើនេះជាអំពើល្មើសច្បាប់ដែលមានចែងក្នុងមាត្រា ៦២ នៃច្បាប់ស្ដីពីតំបន់ការពារធម្មជាតិដែលត្រូវបានប្រកាសឲ្យប្រើប្រាស់តាមព្រះរាជក្រមចុះថ្ងៃទី ១៥ ខែកុម្ភៈ ឆ្នាំ ២០០៨។
សេចក្ដីជូនដំណឹងបន្តថា ជនទាំងឡាយណាដែលល្មើសមាត្រា ៦២ នេះនឹងត្រូវផ្តន្ទាទោសជាបទល្មើសធនធានធម្មជាតិថ្នាក់ទី ៤ (ទោសដាក់ពន្ធនាគារពី ៥ ឆ្នាំទៅ ១០ ឆ្នាំ និងទោសពិន័យជាប្រាក់ពី ១៥ លានរៀលទៅ ១៥០ លានរៀល។ ករណីបុគ្គលប្រព្រឹត្តល្មើសជានីតិបុគ្គលនោះទោសពិន័យជាទឹកប្រាក់ពី ១៥០ លានរៀល ដល់ ២៥០ លានរៀល) និងត្រូវរឹបអូសវត្ថុតាងទុកជាសម្បត្តិរដ្ឋវិញ៕