.jpg)
លោក ឈុំ សុជាតិ អ្នកនាំពាក្យក្រសួងការពារជាតិ ថ្លែងនៅក្នុងសន្និសីទកាសែត នៅទីស្ដីការគណៈរដ្ឋមន្ត្រី កាលពីម្សិលមិញ។ ហេង ជីវ័ន
ភ្នំពេញៈ មន្ត្រីរាជរដ្ឋាភិបាល បានបដិសេធជាថ្មីទៀត ចំពោះការចុះផ្សាយរបស់សារព័ត៌មានបរទេស ដែលថា ប្រទេស កម្ពុជា បានចុះហត្ថលេខាសម្ងាត់ជាមួយប្រទេស ចិន ដើម្បីអនុញ្ញាតឲ្យចិនសាងសង់មូលដ្ឋានទ័ពជើងទឹកនៅខេត្តព្រះសីហនុ ដោយបានចាត់ទុកការចុះផ្សាយព័ត៌មានទាំងនេះ គឺជាការប្រឌិតដ៏អាក្រក់បំផុត ដែលបានធ្វើឱ្យប៉ះពាល់ដល់កេរ្តិ៍ឈ្មោះរបស់ប្រទេស កម្ពុជា។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងនៅក្នុងសន្និសីទសារព័ត៌មាននៅទីស្តីការគណៈរដ្ឋមន្រ្តី កាលពីម្សិលមិញ ដែលសន្និសីទសារព័ត៌មាននេះធ្វើឡើងបន្ទាប់ពីសារព័ត៌មានអាមេរិក The Wall Street Journal និងសារព័ត៌មានអន្តរជាតិមួយចំនួនទៀត ដែលថ្មីៗនេះបានចុះផ្សាយថា កម្ពុជា-ចិន បានចុះហត្ថលេខាជាសម្ងាត់ ជាមួយគ្នា កាលពីអំឡុងត្រីមាសទី២ នៃឆ្នាំ ២០១៩ នេះ ដើម្បីផ្ដល់សិទ្ធិឱ្យប្រទេស ចិន កសាងមូលដ្ឋានកងទ័ពជើងទឹកមួយ នៅឈូងសមុទ្រខ្មែរក្នុងខេត្ត ព្រះសីហនុរយៈពេល ៣០ ឆ្នាំ។
លោក ផៃ ស៊ីផាន បានចាត់ទុកការចុះផ្សាយរបស់សារព័ត៌មានបរទេសមួយចំនួននេះថា ជា «ព័ត៌មានប្រឌិត ដ៏អាក្រក់បំផុត អំពីកម្ពុជាដោយគ្មានមូលដ្ឋានអ្វីទាំងអស់»។
លោកបញ្ជាក់ថា៖ «ព័ត៌មានបំភ្លៃបែបអវិជ្ជមានអំពីកម្ពុជា ដែលមានចរិតនយោបាយមកលើរាជរដ្ឋាភិបាលកម្ពុជា មិនអាចទទួលយកបានទេ ពីសំណាក់ថ្នាក់ដឹកនាំ និងប្រជាជនកម្ពុជា ដែលជាម្ចាស់ឆ្នោត និងម្ចាស់វាសនាប្រទេសជាតិរបស់ខ្លួន។ ការចុះផ្សាយព័ត៌មាន ដែលមិនបានដកស្រង់សម្ដីពីប្រភពច្បាស់លាស់ មិនត្រឹមតែធ្វើឱ្យប៉ះពាល់ដល់កេរ្តិ៍ឈ្មោះ ប្រទេស កម្ពុជា ប៉ុណ្ណោះទេ ប៉ុន្តែវាបានធ្វើឱ្យសាធារណមតិមួយចំនួនយល់ច្រឡំ ហើយថែមទាំង ធ្វើឱ្យតម្លៃវិជ្ជាជីវៈ និងក្រមសីលធម៌សារព័ត៌មានចុះអន់ថយផងដែរ»។
លោកស៊ីផានលើកឡើងថា ព្រះរាជាណាចក្រកម្ពុជា ជារដ្ឋដែលមានអធិបតេយ្យបូរណភាពទឹកដីពេញលេញ មានរាជរដ្ឋាភិបាល មានអង្គនីតិប្បញ្ញត្តិ និងប្រជាជនកម្ពុជាគឺជាម្ចាស់ជោគវាសនាក្នុងការថែរក្សាសន្តិភាព និងការអភិវឌ្ឍសម្រាប់ប្រទេស ហើយប្រទេស កម្ពុជា ក៏មិនអនុញ្ញាតឲ្យជនបរទេសណាមួយ ធ្វើការជ្រៀតជ្រែក ឬបង្គាប់បញ្ជាទៅក្នុងកិច្ចការផ្ទៃក្នុងរបស់កម្ពុជាជាដាច់ខាត។
ឆ្លើយតបទៅនឹងសំណួរអ្នកសារព័ត៌មានអំពីវិធានការចំពោះកាសែតអាមេរិកនេះលោកស៊ីផាន ថ្លែងថា៖ «គេមានសិទ្ធិនិយាយអ្វីក៏បានដែរ ប៉ុន្ដែសិទ្ធិរបស់រាជរដ្ឋាភិបាល ប្រាប់ថា អាហ្នឹងភរទេនៅក្នុងរបបសារព័ត៌មានមិនបាច់ យើងយកចិត្តទុកដាក់ទេ យើងមិនអាចប៉ះពាល់គេទេ គេបំផ្លាញខ្លួនគេ គេហ្នឹងពូកែខាងឃោសនា នៅក្នុងស្តង់ដារបស់គាត់ ហើយត្រូវសរសេរអត្ថបទមួយ ដើម្បីឲ្យគេចាប់អារម្មណ៍។ ក៏ប៉ុន្ដែយើងធ្វើសកម្មភាពចាប់អារម្មណ៍ដែលថា យើងអត់មានទេ»។
អង្គភាពអ្នកនាំពាក្យរាជរដ្ឋាភិបាលបានអំពាវនាវដល់មិត្តភក្តិនៃបណ្តាប្រទេសអាស៊ានទាំងអស់ ក៏ត្រូវតែគោរពសមាជិករបស់អាស៊ាននីមួយៗផងដែរ តាមរយៈកិច្ចព្រមព្រៀងភាពជាដៃគូ មិត្តភាព និងសហប្រតិបត្តិការ ដើម្បីចៀសវាងពីការប៉ះទង្គិចពាក្យសម្ដីផ្នែកការទូត ហើយបានស្នើឲ្យសារព័ត៌មានអន្តរជាតិបញ្ឈប់ជាបន្ទាន់នូវរាល់បំណងអាក្រក់ណាមួយ ដែលមានចរិតបង្កភាពប្រទូសរ៉ាយ ចំពោះប្រទេសកម្ពុជា ទោះបីជាតាមរូភាពឬមធ្យោបាយណាមួយក៏ដោយ។
ទន្ទឹមនឹងនេះដែរ បើយោងតាមលោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបានឲ្យដឹងថា លោក ទៀ បាញ់ រដ្ឋមន្រ្តីក្រសួងការពារជាតិ បានអនុញ្ញាតឲ្យក្រុមអ្នកសារព័ត៌មានចុះទៅពិនិត្យមើល ដោយផ្ទាល់នៅមូលដ្ឋានកងទ័ពជើងទឹករាម ដើម្បីបំភ្លឺចំពោះការប្រឌិតព័ត៌មានរបស់សារព័ត៌មានបរទេស កន្លងមក។
លោក សុជាតិ ថ្លែងថា ប៉ុន្មានថ្ងៃមកនេះ កាសែតបរទេសមួយចំនួនបានចុះផ្សាយព័ត៌មានមិនពិត ហើយត្រូវបានគេយកមកផ្សព្វផ្សាយបន្តបន្ទាប់គ្នាជាញឹកញាប់ ដែលបាននិយាយមិនពិតថា កម្ពុជាអនុញ្ញាតឲ្យកងទ័ពចិនប្រើប្រាស់មូលដ្ឋានទ័ពជើងទឹកកម្ពុជា។
លោក ផៃ ស៊ីផាន ក្នុងសន្និសីទកាសែតពីម្សិលមិញ។ ហេង ជីវ័ន
លោកបញ្ជាក់ថា៖ «ខ្ញុំសូមប្រកាសជាឱឡារិក និងដាច់អហង្ការថា ការលើកឡើងនេះ មិនមែនជាការពិត ហើយព័ត៌មានទាំងអស់ នេះគឺជាព័ត៌មានមិនពិតដែលប្រឌិតឡើងមានចេតនាអាក្រក់ញុះញង់បំបែកបំបាក់ គ្មានវិជ្ជាជីវៈសារព័ត៌មាន ធ្វើឲ្យបាត់កិត្យានុភាព ឯករាជភាពនិងបូរណភាពទឹកដីរបស់ប្រទេសកម្ពុជា»។
លោកគូសបញ្ជាក់ថា កម្ពុជាមិនត្រូវការវត្តមានយោធារបស់ប្រទេសណាមួយនៅលើទឹកដីកម្ពុជាឡើយ ខណៈដែលកងទ័ពកម្ពុជាមានសមត្ថភាពគ្រប់គ្រាន់ក្នុងការការពារជាតិមាតុភូមិ ការពារទឹកដី ការពារប្រជាពលរដ្ឋ និងការពារការអភិឌ្ឍរបស់ប្រទេសជាតិ។ «យើងមិនដែលមានកិច្ចព្រមព្រៀងណាមួយដែលបានលើកឡើងដូចការចុះផ្សាយរបស់កាសែតបរទេសនោះទេ»។
ពាក់ព័ន្ធនឹងបញ្ហានេះដែរ ក្នុងឱកាសអនុញ្ញាតឲ្យលោកវរសេនីយ៍ឯក យូន បុមជី (Yoon Beomgi) អនុព័ន្ធយោធានៃសាធារណរដ្ឋកូរ៉េ ដែលនឹងត្រូវចប់អាណត្តិបេសកកម្មការទូត នៅកម្ពុជាចូលជួបជម្រាបលា និងអនុញ្ញាតឲ្យលោកវរសេនីយ៍ឯក ជុង ណាក់សាម (Chung Naksam) អនុព័ន្ធយោធាកូរ៉េថ្មីចូលជួបសម្ដែងការគួរសម នាព្រឹកថ្ងៃទី ២៥ ខែ កក្កដា នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ក៏បានបញ្ជាក់ប្រាប់អនុព័ន្ធយោធានៃសាធារណរដ្ឋកូរ៉េដែរថា កម្ពុជាប្រកាសមិនទទួលស្គាល់រាល់ការចោទប្រកាន់ថា កម្ពុជាផ្ដល់ទឹកដីឲ្យកងទ័ពចិន កសាងមូលដ្ឋានព្រោះនោះជាការខុសច្បាប់រដ្ឋធម្មនុញ្ញនៃព្រះរាជាណាចក្រកម្ពុជា។ នេះបើយោងតាមគេហទំព័រហ្វេសប៊ុក របស់អគ្គបញ្ជាការដ្ឋាននៃកងយោធពលខេមរភូមិន្ទ។
យ៉ាងណាក្តី តាមរយៈសារអេឡិចត្រូនិកមកកាន់ភ្នំពេញប៉ុស្តិ៍កាលពីម្សិលមិញ លោកស្រី Emily Zeeberg អ្នកនាំពាក្យសា្ថនទូតអាមេរិកប្រចាំនៅកម្ពុជា បានថ្លែងថា៖ «យើងមានការព្រួយបារម្ភថា វត្តមានកងទ័ពចិន ដែលអាចកើតមានឡើងនៅប្រទេស កម្ពុជា នឹងគំរាមកំហែងទាំងស្ថិរភាពក្នុងតំបន់ និងតួនាទីអាស៊ាន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា បានចាត់ទុកព័ត៌មានទាំងនោះថា គឺជាផ្នែកមួយនៃរបៀបវារៈនយោបាយរបស់សហរដ្ឋអាមេរិក ដែលមានគោលដៅធ្វើឲ្យកម្ពុជាខូចមុខមាត់ តាមរយៈការចោទប្រកាន់ផ្សេងៗ ដើម្បីដាក់ទណ្ឌកម្ម ដើម្បីកេងចំណេញភូមិសាស្ត្រនយោបាយ។
លោកបញ្ជាក់ថា៖ «នេះជានយោបាយរបស់សហរដ្ឋអាមេរិក ដូច្នេះតិចឬច្រើន វាធ្វើឲ្យប៉ះពាល់ និងធ្វើឲ្យល្អក់កករ ដល់ទំនាក់ទំនងទ្វេភាគី រវាងប្រទេសទាំង ២ ។ កម្ពុជាគ្មានចេតនាណាមួយ ទៅធ្វើឲ្យខូចទំនាក់ទំនងនោះទេ គឺមានតែប្រទេសមហាអំណាចទាំងអស់នោះ គាត់ធ្វើឲ្យកម្ពុជាខូចខាត ហើយយកលេសដាក់ទណ្ឌកម្មកម្ពុជា»។
លោក ឡៅ ម៉ុងហៃ អ្នកវិភាគនយោបាយ បានលើកឡើងថា វានឹងល្អប្រសើរជាង និងធ្វើឲ្យមានការជឿជាក់កក់ក្តៅបានច្រើនជាង ប្រសិនណាជារាជរដ្ឋាភិបាលគ្រាន់តែបញ្ជាក់អំពីគោលនយោបាយអព្យាក្រឹត អចិន្រៃ្តយ៍ និងមិនចូលបក្សសម្ព័ន្ធដូចដែលមានចែងនៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា។
លោកបញ្ជាក់ថា៖ «ក្នុងក្របខ័ណ្ឌនយោបាយនេះព្រះរាជាណាចក្រ មិនអាចចងសម្ព័ន្ធភាពយោធា ឬចូលក្នុងកិច្ចព្រមព្រៀងយោធាណាមួយ និងមិនអាចអនុញ្ញាតឲ្យមានមូលដ្ឋានយោធាបរទេសនៅលើទឹកដីរបស់ ខ្លួនបានឡើយ និងជារដ្ឋមួយ ដែលប្រកាន់ខ្ជាប់នូវគោលនយោបាយ រួមរស់ដោយសន្តិសហវិជ្ជមានជាមួយប្រទេសទាំងអស់»៕
