ភ្នំពេញ: មន្ត្រីចូលនិវត្តន៍ និងពិការភាពដែលជាអតីតមន្ត្រីរបស់មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ចំនួន ១ ០១៣ នាក់ត្រូវបានដាក់បញ្ចូលក្នុងក្របខ័ណ្ឌ និងផ្តល់ឋានន្តរស័ក្តិក្នុងជួរកងយោធពលខេមរភូមិន្ទនៃក្រសួងការពារជាតិ ដើម្បីទទួលបានរបបយោធិនពេលចូលនិវត្តន៍។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានថ្លែងពីម្សិលមិញថា គិតត្រឹមដើមខែតុលានេះ អតីតមន្ត្រីជំនាញស៊ីម៉ាក់ចំនួន ៤ វគ្គមកហើយ ដែលត្រូវបានកាត់ឈ្មោះបញ្ចូលក្នុងក្របខ័ណ្ឌ និងផ្តល់ឋានន្តរស័ក្តិក្នុងជួរកងយោធពលខេមរភូមិន្ទនៃក្រសួងការពារជាតិ។ ក្នុងនោះវគ្គទី ១ ចំនួន ៤០៩ នាក់ វគ្គទី ២ ចំនួន ១២២ នាក់ វគ្គទី ៣ ចំនួន ១៥៨ នាក់ និងវគ្គទី ៤ ចំនួន ៣២៤ នាក់។
លោកបញ្ជាក់ថា៖ «ពួកគាត់ជាមន្ត្រីចូលនិវត្តន៍ទាំងអស់ គឺមានន័យថា ពួកគាត់បានសម្រាកការងារពីអង្គភាពស៊ីម៉ាក់ បន្ទាប់មកពួកគាត់ត្រូវបានថ្នាក់ដឹកនាំយើង គាត់ឯកភាពឲ្យមន្ត្រីដែលមានស្នាដៃបម្រើជាតិកន្លងមកហ្នឹង អាចទទួលបានប្រាក់ឧបត្ថម្ភខ្លះពីរដ្ឋវិញ។ អង្គភាពស៊ីម៉ាក់នឹងបន្តបណ្ដុះបណ្ដាលមន្ត្រីជំនាញបន្ថែមទៀត ដើម្បីបន្តសកម្មភាពបោសសម្អាតគ្រាប់យុទ្ធភណ្ឌមិនទាន់ផ្ទុះ ក្រោយពីពួកគាត់ចាស់ៗចូលនិវត្តន៍អស់»។
លោក ហេង រតនា បានអរគុណចំពោះគណៈកម្មការបញ្ចូលក្របខ័ណ្ឌ និងផ្តល់ឋានន្តរស័ក្តិកងយោធពលខេមរភូមិន្ទនៃក្រសួងការពារជាតិ និងថ្នាក់ដឹកនាំកម្ពុជាដែលបានឯកភាព ចំពោះការផ្តល់ការគាំទ្រសម្រេចផ្តល់ក្របខ័ណ្ឌ និងផ្តល់ឋានន្តរស័កិ្តកងយោធពលខេមរភូមិន្ទជូនមន្ត្រីអង្គភាពស៊ីម៉ាក់ ក៏ដូចជាផ្តល់ប្រយោជន៍របបយោធិនដល់កម្លាំងអង្គភាពស៊ីម៉ាក់។
លោក ថោង សូលីម៉ូ អ្នកនាំពាក្យអគ្គបញ្ជាការដ្ឋានកងយោធពលខេមរភូមិន្ទ នៃក្រសួងការពារជាតិបានថ្លែងថា លោកមិនទាន់បានទទួលព័ត៌មាននេះទេ ដោយបានបង្វែរសំណួរទៅលោក ឈុំ សុជាត វិញដោយថ្លែងថា៖ «ព្រោះគាត់ទទួលព័ត៌មាននានាលឿនជាងខ្ញុំ»។
ប៉ុន្តែលោក ឈុំ សុជាត អ្នកនាំពាក្យក្រសួងការពារជាតិមិនអាចទាក់ទងសុំការបញ្ជាក់ជុំវិញបញ្ហានេះបានទេ ដោយទូរស័ព្ទលោកគ្មានអ្នកទទួល។
ចំណែកលោក ម៉ៅ ផល្លា អ្នកនាំពាក្យកងទ័ពជើងគោកនៃអគ្គបញ្ជាការដ្ឋានកងយោធពលខេមរភូមិន្ទថ្លែងពីម្សិលមិញថា លោកក៏មិនទាន់បានទទួលព័ត៌មាននេះដែរ និងក៏បានបង្វែរសំណួរទៅលោក ឈុំ សុជាត ដែរ។
មិនមានប្រភពទាក់ទងមន្ត្រីស៊ីម៉ាក់ដែលចូលនិវត្តន៍ ហើយត្រូវបានដាក់បញ្ចូលក្នុងក្របខណ្ឌកងយោធពលខេមរភូមិន្ទ ដើម្បីសុំអត្ថាធិប្បាយលើបញ្ហានេះបានទេកាលពីម្សិលមិញ។ ប៉ុន្តែបើតាមការបញ្ចេញមតិ (Comment) លើគេហទំព័រហ្វេសប៊ុករបស់លោក ហេង រតនា គណនីហ្វេសប៊ុកមួយឈ្មោះ «ខ្លា ចាស់» បានសរសេររៀបរាប់ថា៖ «ខ្ញុំបាទសូមអរគុណដល់ឯកឧត្តមប្រតិភូ តែងតែគិតគូរដល់ពួកខ្ញុំបាទជាកូនចៅស៊ីម៉ាក់ទាំងអស់ដែលអនុញ្ញាតឱ្យពួកខ្ញុំបានចូលក្នុងក្របខ័ណ្ឌយោធា។ ពួកខ្ញុំលើកដៃសំពះបួងសួងដល់ទេវតាទាំង ៨ ទិស សូមតាមជួយថែរក្សាមេ និង ក្រុមគ្រួសារមានសុខភាពល្អរហូត និងអាយុវែងអរគុណ»។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (AN-SA) បានថ្លែងពីម្សិលមិញថា ការបញ្ចូលអតីតមន្ត្រីក្របខ័ណ្ឌមុខងារសាធារណៈឱ្យទៅជាមន្ត្រីក្របខ័ណ្ឌនយោបាយនេះ គឺជាជម្រើសល្អមួយ ប៉ុន្ដែការបញ្ចូលនេះគួរបញ្ជាក់ឱ្យបានច្បាស់ថា តើបញ្ចូលក្នុងន័យលើកចិត្តទឹកចិត្តពួកគាត់ដែលមានស្នាដៃ បទពិសោធការងារ ឬក្នុងហេតុផលអ្វី។
លោកបញ្ជាក់ថា៖ «បើសិនការបញ្ចូលក្នុងមុខតំណែងនយោបាយ ឬលើហេតុផលស្ដាយជំនាញពួកគាត់ គឺមិនមានអ្វីខុសទេ វាគឺជាការលើកទឹកចិត្តពួកគាត់ ប៉ុន្ដែបើសិនការបញ្ចូលនេះក្នុងហេតុផលណាមួយផ្សេងទៀត គឺអាចធ្វើឱ្យខាតបង់ថវិកាជាតិដែរ ពោលគឺប្រើប្រាស់ថវិកាមិនចំគោលដៅ»៕