.jpg)
ផ្ទះបណ្តែតទឹកជនជាតិវៀតណាម នៅលើផ្ទៃទន្លេមេគង្គ។ ហុង មិនា
ភ្នំពេញៈ មន្ត្រីជាន់ខ្ពស់រដ្ឋាភិបាលច្រានចោលចំពោះព័ត៌មាន ដែលផ្សាយដោយសារព័ត៌មាន Vietnam News ដែលស្រង់សម្តីមន្ត្រីជាន់ខ្ពស់វៀតណាម ថា ជនជាតិវៀតណាម ប្រមាណ ៧០-៨០ ភាគរយ ដែលបាននិងកំពុងរស់នៅក្នុងប្រទេស កម្ពុជា ត្រូវបានទទួលស្គាល់ដោយរាជរដ្ឋាភិបាល ហើយនឹងបើកផ្លូវឲ្យពួកគេអាចទទួលបានសញ្ជាតិកម្ពុជាទៀតនោះ។
អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ លោក កែវ វណ្ណថន បានបដិសេធតួលេខខាងលើដោយលើកឡើងថា អគ្គនាយកដ្ឋានអន្តោប្រវេសន៍បាននិងកំពុងចុះដកហូត ឯកសារមិនប្រក្រតីដែលកាន់កាប់ដោយពួកអន្តោប្រវេសន៍នៅឡើយ។
ប៉ុន្តែលោកថ្លែងថា ចំនួនជនជាតិវៀតណាមប៉ុន្មាននាក់ ដែលត្រូវបានរដ្ឋាភិបាលកម្ពុជាទទួលស្គាល់ ហើយថា តើជនជាតិវៀតណាមប៉ុន្មាននាក់ ដែលទទួលបានប័ណ្ណអចិន្រៃ្តយ៍នោះ លោក កែវ វណ្ណថន បញ្ជាក់ថា អគ្គនាយកដ្ឋានមិនទាន់មានតួលេខនេះច្បាស់លាស់នៅឡើយទេ ដោយសារថា អគ្គនាយកដ្ឋានអន្តោប្រវេសន៍កំពុងអង្កេតទូទាំងប្រទេសដើម្បីពិនិត្យជនអន្តោប្រវេសន៍វៀតណាមមានប័ណ្ណស្នាក់នៅអចិន្រៃ្តយ៍សរុបប៉ុន្មាន និងអ្នកដែលបានស្នាក់នៅយូរហើយកាន់ឯកសារខ្មែរមានចំនួនប៉ុន្មានដែលត្រូវបានដកហូត។
លោកបញ្ជាក់ថា៖ «យើងកំពុងតែធ្វើការដកហូតពីពួកគាត់ដោយសារពួកគាត់ជាអន្តោប្រវេសន៍នៅយូរហើយ ដូច្នេះ ក្រសួងមហាផ្ទៃ អគ្គនាយកដ្ឋានអន្តោប្រវេសន៍យើងបានឲ្យគាត់ដាក់ពាក្យសុំជាអន្តោប្រវេសន៍ស្របច្បាប់»។
លោកថា៖ «មួយចំនួនគាត់ក៏មានការប្រកាសទទួលស្គាល់ជាអន្តោប្រវេសន៍ពីក្រសួង ហើយមានប័ណ្ណស្នាក់នៅជាអចិន្រៃ្តយ៍ហើយ។ តែមួយចំនួនគាត់អត់ទាន់មានហើយសំអាងថាគាត់កាន់ឯកសារកម្ពុជា តែឯកសារកម្ពុជាមិនប្រក្រតីទេដូច្នេះហើយបានយើងដកហូត»។
មន្ត្រីជាន់ខ្ពស់វៀតណាម លោក Luong Thanh Nghi អនុប្រធានគណៈកម្មាធិការរដ្ឋទទួលបន្ទុកកិច្ចការបរទេសវៀតណាម បានអះអាងតាមរយៈសារព័ត៌មាន Vietnam News ចេញផ្សាយកាលពីថ្ងៃទី ២៩ ខែមករា ថា ជនជាតិវៀតណាម ប្រមាណជា ៧០ ទៅ ៨០ ភាគរយ ដែលបាននិងកំពុងរស់នៅក្នុងប្រទេស កម្ពុជា ត្រូវទទួលស្គាល់ដោយរាជរដ្ឋាភិបាលកម្ពុជា ហើយដែលនឹងបើកផ្លូវឲ្យពួកគេអាចទទួលបានសញ្ជាតិកម្ពុជា។
សារព័ត៌មានខាងលើ ដែលបានស្រង់សម្តី របស់លោក Luong Thanh Nghi លើកឡើងថា សហគមន៍វៀតណាម បានរស់នៅនិងបានចូលរួមក្នុងការអភិវឌ្ឍនៅប្រទេសកម្ពុជា ដែលរួមចំណែក ក្នុងការអភិវឌ្ឍ វិស័យសេដ្ឋកិច្ចសង្គម អស់រយៈពេលរាប់រយឆ្នាំមកហើយ។ លោកបានអះអាងថា មួយផ្នែក សហគមន៍ នៅតែមានឋានៈស្របច្បាប់មិនច្បាស់លាស់នៅឡើយ នៅប្រទេសកម្ពុជានិងថា មានប្រជាជនវៀតណាមប្រមាណ ១១០ ០០០ នាក់ដែលរស់នៅក្នុងប្រទេស កម្ពុជា ហើយភាគច្រើនគឺរស់នៅតាមបណ្តោយដងទន្លេសាប។
ការលើកឡើងនេះ ក្រោយពីរដ្ឋាភិបាលកម្ពុជាបានដកហូតឯកសារមិនប្រក្រតីដែលកាន់កាប់ដោយជនបរទេសប្រមាណជាង ៩០ ភាគរយ ស្មើនឹងជាង ៣ ម៉ឺនក្បាល មាន ១០ សញ្ជាតិ ដែលក្នុងនោះជនជាតិវៀតណាម គឺមានចំនួនច្រើនជាងគេ រហូតដល់ជិត ៩០ ភាគរយផងដែរ។
លោក Luong Thanh Nghi ប្រាប់អ្នកសារព័ត៌មានថា៖ «អស់ជាច្រើនឆ្នាំ ប្រទេសវៀណាម និងប្រទេស កម្ពុជា បានសហការគ្នាដើម្បីដោះស្រាយឯកសារផ្លូវច្បាប់សម្រាប់ប្រជាជនវៀតណាមដែលកំពុងនៅប្រទេសកម្ពុជា»។
លោកបញ្ជាក់ថា៖ «នៅក្នុងឆ្នាំ ២០១៧ ប្រទេសកម្ពុជាបានចេញសេក្តីសម្រេចមួយ ដើម្បីពិនិត្យឡើងវិញ និងដើម្បីសហការជាមួយនឹងរដ្ឋាភិបាលវៀតណាម ដើម្បីផ្តល់ឯកសារស្របច្បាប់ សម្រាប់ជនជាតិវៀតណាម ដែលកំពុងរស់នៅក្នុងប្រទេសកម្ពុជា»។
សារព័ត៌មាន Vietnam News ឲ្យដឹងថាវិធានការនេះមានគោលបំណង ដើម្បីធ្វើឲ្យសហគមន៍វៀតណាម មានស្ថិរភាព និងបង្កើតលក្ខណៈអំណោយផល សម្រាប់ជនជាតិវៀតណាម ដើម្បីទទួលឋានៈស្របច្បាប់ច្បាស់លាស់និងធ្វើឲ្យកូនចៅរបស់ពួកគេអាចមានសិទ្ធិស្របច្បាប់ទទួលបានការអប់រំ ហើយរហូតមកដល់ពេលនេះ ចំនួនជនជាតិវៀតណាមខាងលើដែលត្រូវបានទទួលស្គាល់នោះក៏ទទួលបានប័ណ្ណរស់នៅអចិន្រៃ្តយ៍ផងដែរ។
លោកបន្ថែមថា ប្រជាជនវៀតណាមដែលកំពុងរស់នៅប្រទេសកម្ពុជា តែងតែប្រឈមនឹងការលំបាក ប្រឈមនឹងការយល់ដឹងពីវប្បធម៌និងភាសាមានកម្រិត។
ថ្មីៗនេះលោកគៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្ដោប្រវេសន៍នៃក្រសួងមហាផ្ទៃបានថ្លែងថា សមត្ថកិច្ចបានដកហូតឯកសារមិនប្រក្រតីពីជនបរទេសដែលកាន់កាប់ប្រមាណជាង ៩០ ភាគរយ ដោយដកហូតឯកសារប្រមាណជាង ៣ ម៉ឺនក្បាលរួមមាន សៀវភៅគ្រួសារ សៀវភៅស្នាក់នៅ អត្ដសញ្ញាណប័ណ្ណ សំបុត្រកំណើត លិខិតឆ្លងដែន និងឯកសារពាក់ព័ន្ធផ្សេងៗជាដើម។
យោងតាមមាត្រា ៣០ នៃច្បាប់ស្តីពីសញ្ជាតិចែងថាជនបរទេសណាដែលកាន់កាប់ និងប្រើប្រាស់អត្តសញ្ញាណប័ណ្ណសញ្ជាតិខែ្មរ ឬលិខិតឆ្លងដែននៃព្រះរាជាណាចក្រកម្ពុជាត្រូវផ្តន្ទាទោសដាក់ពន្ធនាគារពី ៥ ឆ្នាំទៅ ១០ ឆ្នាំ។ មន្ត្រីភា្នក់ងាររាជការ ឬជនណាធ្វើអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែននៃព្រះរាជាណាចក្រកម្ពុជាឲ្យជនណាម្នាក់ដែលមិនមានសញ្ជាតិខ្មែរត្រូវផ្តន្ទាទោសដូចគ្នា។
មាត្រា ៣១ ចែងថា ជនណាដែលក្លែងបន្លំអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែននៃព្រះរាជាណាចក្រកម្ពុជាត្រូវផ្តន្ទាទោសដាក់ពន្ធនាគារពី ៥ ទៅ ១០ ឆ្នាំត្រូវចាត់ទុកជាការក្លែងបន្លំផងដែរនូវអំពើការកោសលុប សរសេរបន្ថែម ឬធ្វើឲ្យខូចខាតការពិតនូវព័ត៌មាននៅក្នុងអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែននៃព្រះរាជាណាចក្រកម្ពុជា។
មាត្រា ៣២ ចែងថាជនណាប្រើប្រាស់អត្តសញ្ញាណប័ណ្ណសញ្ជាតិខែ្មរ ឬលិខិតឆ្លងដែននៃព្រះរាជាណាចក្រកម្ពុជាក្លែងក្លាយត្រូវផ្តន្ទាទោសដាក់ពន្ធនាគារ ២ ឆ្នាំទៅ ៥ ឆ្នាំនិងពិន័យជាប្រាក់ពី ៤ លានរៀលទៅ ១០ លានរៀល៕
