ភ្នំពេញៈ ក្រសួងបរិស្ថាន ច្រានចោលរបាយការណ៍របស់អង្គការលើកលែងទោសអន្តរជាតិ (Amnesty International) និងបណ្តាញសហគមន៍ព្រៃឡង់ (PLCN) ដែលថា នៅកើតមានបទល្មើសព្រៃឈើទ្រង់ទ្រាយធំនៅតំបន់ព្រៃឡង់ បន្ទាប់ពីក្រសួងបរិស្ថានបានហាមឃាត់បណ្តាញសហគមន៍ព្រៃឡង់មិនឱ្យចុះល្បាតព្រៃរយៈពេល ១ ឆ្នាំ។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ ភ្នំពេញ ប៉ុស្តិ៍ ពីម្សិលមិញថា របាយការណ៍របស់ស្ថាប័នទាំងនេះ គឺជាយុទ្ធនាការដែលរៀបចំឡើងក្នុងចេតនាទុច្ចរិត ដើម្បីធ្វើវិទ្ធង្សនាប្រឆាំងនឹងរាជរដ្ឋាភិបាលលើការងារគ្រប់គ្រង និងអភិរក្សធនធានធម្មជាតិតែប៉ុណ្ណោះ។
លោកថ្លែងថា៖ «ពួកគេពោរពេញដោយជំងឺតួឯក និងគិតថា មានតែក្រុមខ្លួនជាអ្នកការពារធនធានធម្មជាតិ ដែលតាមពិត គ្រាន់តែជាការអនុវត្តផែនការចិញ្ចឹមទំនាស់បង្កើតភាពអនាធិបតេយ្យ និងបន្តលើកទឹកចិត្តការរំលោភបំពានច្បាប់»។ នេះគឺជាការប្រមាថលើការលះបង់របស់មន្ត្រីឧទ្យានុរក្ស និងសហគមន៍តំបន់ការពារធម្មជាតិ ដែលកំពុងឈរជើងការពារធនធានធម្មជាតិ និងបានខិតខំការពារ និងអភិរក្សធនធានធម្មជាតិ។
បើតាមលោក ភក្ត្រា សេចក្តីថ្លែងការណ៍របស់អង្គការលើកលែងទោសអន្តរជាតិ គឺជាសេចក្តីថ្លែងការណ៍បែបទម្លាប់អាក្រក់របស់អង្គការនេះ ដែលមានចរិតរិះគន់ដើម្បីបំផ្លាញ ជ្រកក្រោមស្លាកសិទ្ធិមនុស្ស សេរីភាព និងប្រជាធិបតេយ្យ។ អង្គការមួយនេះតែងតែផ្តល់ការគាំទ្រលើកទឹកចិត្ត ក្រុមជនបំពានច្បាប់ និងញុះញង់ដោយមិនចេះខ្មាសអៀន ឱ្យជនទាំងនោះបន្តប្រព្រឹត្តល្មើសច្បាប់។ អង្គការនេះគួរប្រកាន់យកភាពស្មោះត្រង់ សុចរិតភាព និងវិជ្ជាជីវៈក្នុងការចេញសេចក្តីថ្លែងការណ៍។
ជាមួយគ្នានេះលោក នេត្រ ភក្ត្រា បញ្ជាក់ទៀតថា ក្រសួងបរិស្ថានក៏គ្មានភាពចាំបាច់ត្រូវឆ្លើយតបនឹងរបាយការណ៍របស់បណ្តាញសហគមន៍ព្រៃឡង់ ដែលជនបរទេសជួយរៀបចំ និងចងក្រងឱ្យនោះទេ ហើយរបាយការណ៍ពួកគេមិនឆ្លុះបញ្ចាំងការពិតពីកិច្ចការពារ និងអភិរក្សដែនជម្រកសត្វព្រៃ ព្រៃឡង់ទាំងមូលដែរ គឺគ្រាន់តែរៀបចំចងក្រងឡើងក្នុងទិដ្ឋភាពអវិជ្ជមានក្រោមរបៀបវារៈនយោបាយទុច្ចរិត និងដើម្បីស្វែងរកជំនួយគាំទ្រសកម្មភាពរបស់ខ្លួនប៉ុណ្ណោះ។
លោក ភក្ត្រា ថ្លែងថា៖ «របាយការណ៍នេះ ក៏គ្មានបច្ចុប្បន្នភាពដែរ ខណៈប្រតិបត្តិការរបស់ក្រសួងបរិស្ថាន និងដៃគូបានធ្វើពេញ ១ ឆ្នាំ ២០២០ ក្នុងការការពារ និងអភិរក្ស បានទទួលលទ្ធផលល្អក្នុងការទប់ស្កាត់បង្ក្រាបបទល្មើសធនធានធម្មជាតិ»។
ទោះជាយ៉ាងណាលោក ភក្ត្រា បានទទួលស្គាល់ថា បទល្មើសធនធានធម្មជាតិនៅបន្តកើតមាននៅក្នុងតំបន់ការពារធម្មជាតិរួមនឹងដែនជម្រកសត្វព្រៃព្រៃឡង់ ប៉ុន្តែបទល្មើសទ្រង់ទ្រាយធំលែងមានទៀតហើយ នៅមានកើតឡើងតែបទល្មើសទ្រង់ទ្រាយតូចៗដែលជនល្មើសមួយចំនួន បន្តលួចធ្វើសកម្មភាពដោយខុសច្បាប់។
របាយការណ៍របស់អង្គការលើកលែងទោសអន្តរជាតិដែលចេញផ្សាយកាលពីថ្ងៃទី ៥ ខែកុម្ភៈ បានអះអាងថា ការផ្អាកសកម្មភាពនៃការល្បាតព្រៃរបស់ក្រុមបណ្តាញសហគមន៍ព្រៃឡង់ និងការបង្ក្រាបសកម្មជនបរិស្ថាននៅក្នុងរយៈពេលពេញ ១ ឆ្នាំកន្លងមកនេះបានធ្វើឱ្យមានការគំរាមកំហែងយ៉ាងធ្ងន់ធ្ងរ ដល់ដែនជម្រកសត្វព្រៃព្រៃឡង់។
ជាមួយគ្នានេះដែរ បណ្តាញសហគមន៍ព្រៃឡង់ (PLCN) កាលពីថ្ងៃ ២៧ ខែកុម្ភៈក៏ចេញផ្សាយរបាយការណ៍ឃ្លាំមើលលើកទី ៩ ស្តីពីស្ថានភាពព្រៃឡង់ ដោយអះអាងដែរថា ការហាមឃាត់របស់រាជរដ្ឋាភិបាលលើការល្បាតព្រៃរបស់សហគមន៍កំពុងជំរុញឱ្យមានការកាប់បំផ្លាញព្រៃឈើកាន់តែច្រើនឡើង នៅក្នុងតំបន់ព្រៃឡង់។
PLCN បញ្ជាក់ថា៖ «ទិន្នន័យផ្កាយរណបស្តីពីការបាត់បង់ព្រៃឈើបានបង្ហាញពីការជាប់ទាក់ទងគ្នារវាងការហាមឃាត់ការល្បាតរបស់ PLCN និងការកើនឡើងនៃសកម្មភាពកាប់ឈើខុសច្បាប់ ដោយក្រុមហ៊ុនដែលកំពុងប្រតិបត្តិការនៅក្បែរតំបន់ព្រៃឡង់»។
បណ្តាញសហគមន៍ព្រៃឡង់បានលើកទឹកចិត្តដល់រាជរដ្ឋាភិបាល គួរអនុវត្តបទប្បញ្ញត្តិ និងច្បាប់ដែលមានស្រាប់ស្តីពីការការពារព្រៃឈើ និងបានអំពាវនាវដល់ប្រជាជនកម្ពុជា និងពិភពលោកឱ្យចូលរួមឱ្យបានសកម្មក្នុងការការពារធនធានធម្មជាតិ។
លោក ខេម សុខី សមាជិកបណ្តាញសហគមន៍ព្រៃឡង់ប្រចាំនៅខេត្តព្រះវិហារថ្លែងថា ចាប់តាំងពីក្រសួងបរិស្ថានមិនអនុញ្ញាតឱ្យបណ្តាញសហគមន៍ព្រៃឡង់ចូលរួមល្បាតព្រៃកាលពីខែកុម្ភៈ ឆ្នាំ ២០២០ រហូតមកដល់ពេលបច្ចុប្បន្ននេះបទល្មើសព្រៃឈើ ការធ្វើអាជីវកម្មឈើ និងការកាប់ឈើរានយកដីនៅតែបន្តកើតមានជាហូរហែ។ ទោះជាយ៉ាងណា នៅពេលដែលបណ្តាញព្រៃឡង់ចុះល្បាតក៏មានសកម្មភាពបទល្មើសដែរ ប៉ុន្តែជនល្មើសមានការភ័យខ្លាច។
លោកថ្លែងថា៖ «នៅពេលដែលសមាជិកបណ្តាញសហគមន៍ព្រៃឡង់ចុះល្បាត ជនល្មើសមានការរអាដែរ ប៉ុន្តែបច្ចុប្បន្ននេះ ធ្វើការតែមន្ត្រីក្រសួងបរិស្ថានតែម្នាក់ឯង និងមានមន្ត្រីតិចហើយទំហំដីមានជិតកន្លះលានហិកតា បទល្មើសក៏បានដៃដែរ។ បើក្រសួងនៅតែបន្តមានការរឹតត្បិតទៀត ព្រៃឈើនឹងនៅតែបន្តហិនហោច»។
ប៉ុន្តែបើតាមលោក នេត្រ ភក្ត្រា ក្នុងរយៈពេលចុងក្រោយនេះក្រសួងបរិស្ថានបានសហការជាមួយគណៈកម្មាធិការជាតិទប់ស្កាត់ និងបង្ក្រាបបទល្មើសធនធានធម្មជាតិយ៉ាងជិតស្និទ្ធក្នុងការចុះទប់ស្កាត់ និងបង្ក្រាបបទល្មើសធនធានធម្មជាតិ នៅក្នុងតំបន់ដែនជម្រកសត្វព្រៃព្រៃឡង់ ប្រកបដោយការទទួលខុសត្រូវខ្ពស់៕
វីដេអូ៖