The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ជលផល​ម្នាក់​ ​ត្រូវ​ចោទ​រឿង​ពុករលួយ

មន្ត្រី​ជលផល​ម្នាក់​ ​ត្រូវ​ចោទ​រឿង​ពុករលួយ

Content image - Phnom Penh Post
មន្រ្តី​រដ្ឋបាល​ជលផល​ឃុំ​ដំដែក​លោក រឹម សំអ៊ុន ត្រូវ ACU ចាប់​ខ្លួន​កាល​ពី​ថ្ងៃ​អង្គារ។ រូបថត សហការី

មន្ត្រី​ជលផល​ម្នាក់​ ​ត្រូវ​ចោទ​រឿង​ពុករលួយ

សៀមរាបៈ សាលា​ដំបូង​ខេត្ត​សៀមរាប​កាលពី​ព្រឹក​ម្សិលមិញ​បាន​ចោទ​ប្រកាន់​​​​មន្រ្តី​រដ្ឋបាល​ជលផល​ឃុំ​ដំដែក​លោក រឹម សំអ៊ុន ​ពាក់ព័ន្ធ​នឹង​​ការ​​​កេងប្រវ័ញ្ច​ថវិកា​សាធារណៈ​ជាង​ ៣៦ ម៉ឺន​ដុល្លារ​បន្ទាប់ពី​អង្គភាព​ប្រឆាំង​អំពើ​ពុករលួយ​បាន​ចាប់​ខ្លួន​គាត់​​កាលពី​ថ្ងៃ​អង្គារ​​។ ​នេះ​បើ​តាម​​លោក រៀម ចាន់មុនី ព្រះរាជអាជ្ញា​រង​សាលា​ដំបូង​ខេត្ត​សៀមរាប​។

លោក​ ចាន់ ​មុនី ​បាន​ថ្លែង​ថា​៖ «​​តុលាការ​ទើប​តែ​ចោទ​ប្រកាន់​​គាត់​ពាក់ព័ន្ធ​នឹង​ការ​​​កេងប្រវ័ញ្ច​​ថវិកា​សាធារណៈ​ហើយ​គាត់​ត្រូវ​​បាន​សាកសួរ​ដោយ​ចៅក្រម​ស៊ើបសួរ​។ ​យើង​នឹង​ធ្វើការ​ស៊ើបអង្កេត​បន្ថែម​ទៀត​»។

បើ​តាម​សេចក្តី​ប្រកាស​ព័ត៌មាន​របស់​អង្គភាព​ប្រឆាំង​​អំពើ​ពុករលួយ​កាលពី​ថ្ងៃ​ពុធ​បាន​ឲ្យ​ដឹង​ថា​អង្គភាព​ប្រឆាំង​អំពើ​ពុករលួយ​បាន​រកឃើញ​ថា​លោក រឹម សំអ៊ុន នាយករង​ទទួល​បន្ទុក​​រួម​ផ្នែក​រដ្ឋបាល​ជលផល​ដំដែក​បាន​ប្រព្រឹត្ត​អំពើ​ពុករលួយ «​បទ​វីតិក្រម​»​ តាម​មាត្រា​ ៥៩២ និង​មាត្រា ៥៩៣ ​នៃ​ក្រម​ព្រហ្មទណ្ឌ​ដោយ​បាន​ទាមទារ​ និង​​ទទួល​ប្រាក់​សរុប​ប្រមាណ ១៤៦០​ លាន​រៀល​ (ប្រហែល​ ៣៦៥ ០០០​ ដុល្លារ​) ពី​ប្រជានេសាទ​ និង​បទល្មើស​នេសាទ​​នៅ​ក្នុង​តំបន់​របស់​គាត់​។ ​

លោក រឹម សំអ៊ុន ត្រូវ​បាន​ចាប់​ខ្លួន​នៅ​ថ្ងៃ​អង្គារ និង​បញ្ជូន​ទៅ​​សាលា​ដំបូង​ខេត្ត​នៅ​រសៀល​ថ្ងៃ​ពុធ​។

លោក សួស ណារិន អ្នក​សម្រប​សម្រួល​​របស់​អង្គការ​សិទ្ធិ​មនុស្ស​អាដហុក​ប្រចាំ​ខេត្ត​បាន​ថ្លែង​ថា​លោក​មិន​ទទួល​បាន​បណ្តឹង​ណា​មួយ​ពី​​ប្រជានេសាទ​ក្នុង​ឃុំ​​ដំដែក​ទេ​។

បើ​តាម​ច្បាប់​ប្រឆាំង​អំពើ​ពុករលួយ «បទ​វីតិក្រម​» អាច​​ត្រូវ​ផ្តន្ទាទោស​ដាក់​ពន្ធនាគារ​ពី​ ២ ​ឆ្នាំ​ទៅ​ ៥ ​ឆ្នាំ​ និង​ពិន័យ​ជា​ប្រាក់​ចំនួន​ពី​ ៤ ​លាន​រៀល​ដល់​ ១០ ​លាន​រៀល​ (១០០០ ​ដុល្លារ‑២៥០០ ​ដុល្លារ)៕ PS

អត្ថបទគួរចាប់អារម្មណ៍