.jpg)
រដ្ឋមន្ត្រីនិងមន្ត្រីក្រសួងកសិកម្ម រុក្ខាប្រមាញ់និងនេសាទ ក្នុងជំនួបជាមួយរដ្ឋមន្ត្រី និងមន្ត្រីការបរទេសហុងគ្រីកាលពីថ្ងៃអង្គារ។ រូបថត ក្រសួងកសិកម្ម
ភ្នំពេញៈ រដ្ឋមន្ត្រី និងមន្ត្រីជាន់ខ្ពស់កម្ពុជាជាច្រើនរូបបានធ្វើតេស្តរកជំងឺកូវីដ ១៩ និងធ្វើចត្តាឡីស័កបន្ទាប់ពីបានជួបជាមួយរដ្ឋមន្ត្រីការបរទេសហុងគ្រីដែលបានធ្វើតេស្តិ៍វិជ្ជមានជំងឺកូវីដ ១៩ នៅក្នុងប្រទេសថៃ ក្រោយពេលចាកចេញពីកម្ពុជាកាលពីល្ងាចថ្ងៃទី ៣ ខែវិច្ឆិកា។
រដ្ឋមន្ត្រីក្រសួងការបរទេស និងពាណិជ្ជកម្មនៃប្រទេសហុងគ្រីលោក ភីធើ ស៊ីចាតូ កាលពីថ្ងៃទី ៣ ខែវិច្ឆិកា បានមកបំពេញទស្សនកិច្ចនៅកម្ពុជា រយៈពេល ១ ថ្ងៃ ដោយបានជួបជាមួយមន្ត្រីជាន់ខ្ពស់កម្ពុជាជាច្រើនរូបដោយក្នុងនោះក៏មានការអញ្ជើញចូលរួមពីលោកនាយករដ្ឋមន្ត្រី ហ៊ុន សែន ផងដែរ។
ក្រសួងការបរទេសកម្ពុជាបានឱ្យដឹងតាមរយៈសេចក្តីប្រកាសព័ត៌មានមួយ កាលពីម្សិលមិញថា សមាជិកគណៈប្រតិភូហុងគ្រីទាំងអស់បានធ្វើតេស្ត និងមានវិញ្ញាបនបត្រសុខភាពបញ្ជាក់ថា គ្មានជំងឺកូវីដ ១៩ មុនពេលចេញដំណើរមកកម្ពុជា។ ប៉ុន្តែបន្ទាប់ពីបានចាកចេញពីកម្ពុជា រដ្ឋមន្ត្រីការបរទេស និងប្រតិភូប្រទេសហុងគ្រីបានអញ្ជើញដល់ទីក្រុងបាងកកហើយក៏មានការបញ្ជាក់ថា មានលទ្ធផលវិជ្ជមានជំងឺកូវីដ ១៩។
យ៉ាងណាក្តីក្រសួងការបរទេសបានបញ្ជាក់ថា៖ «បន្ទាប់ពីទទួលបានព័ត៌មានខាងលើនេះភ្លាម រាជរដ្ឋាភិបាលកម្ពុជាបានសម្រេចឱ្យថ្នាក់ដឹកនាំ និងមន្ត្រីទាំងអស់ដែលជួប និងប្រាស្រ័យទាក់ទងផ្ទាល់ជាមួយប្រតិភូនៅក្នុងទស្សនកិច្ច ធ្វើតេស្តរកវីរុសកូវីដ ១៩ និងដាក់ឱ្យនៅដាច់ដោយឡែកតាមការកំណត់របស់ក្រសួងសុខាភិបាល»។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មដែលបានជួបរដ្ឋមន្ត្រីការបរទេសហុងគ្រីបានប្រាប់ភ្នំពេញប៉ុស្តិ៍កាលពីម្សិលមិញថា បន្ទាប់ពីទទួលបានព័ត៌មាននេះលោកបានធ្វើតេស្តរកជំងឺកូវីដ ១៩ រួចរាល់ដោយរង់ចាំលទ្ធផលនៅថ្ងៃបន្ទាប់។
រដ្ឋមន្ត្រី និងមន្ត្រីការបរទេសកម្ពុជា និងសមភាគីហុងគ្រីក្នុងជំនួប។ រូបថត ក្រសួងការបរទេស
បន្ថែមពីនេះលោកក៏បានធ្វើចត្តាឡីស័កតាមការណែនាំរបស់ក្រុមគ្រូពេទ្យផងដែរ។ លោកបញ្ជាក់ថា៖ «ផ្អាកការងារមួយរយៈដើម្បីធ្វើចត្តាឡីស័ក យើងធ្វើតាមការណែនាំរបស់ក្រសួង ដើម្បីឱ្យប្រាកដថា មានសុវត្ថិភាព។ ខ្ញុំ និងក្រុមការងាររបស់ខ្ញុំបានមកធ្វើតេស្តទាំងអស់ និងរង់ចាំ (លទ្ធផល) ទាំងអស់គ្នា»។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទក៏បានថ្លែងប្រាប់ ភ្នំពេញ ប៉ុស្តិ៍ កាលពីម្សិលមិញផងដែរថា៖ «ខ្ញុំកំពុងបំពេញភារកិច្ចនៅខេត្តឯណោះ។ ក្រោយពេលទទួលបានដំណឹងនេះ ខ្ញុំកំពុងប្រញាប់ត្រឡប់មករាជធានីភ្នំពេញវិញ ដើម្បីត្រៀមធ្វើតេស្ត និងធ្វើចត្តាឡីស័កតាមការណែនាំរបស់ក្រសួងសុខាភិបាលបន្ថែមទៀត។ មន្ត្រីរបស់ខ្ញុំមួយចំនួនក៏ត្រៀមទៅធ្វើតេស្តដែរ»។
ចំណែកលោកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជា ដែលបានជួបប្រាស្រ័យទាក់ទងជិតស្និទ្ធជាមួយរដ្ឋមន្ត្រីការបរទេសហុងគ្រី ដែរនោះបានសរសេរនៅលើទំព័រហ្វេសប៊ុករបស់លោកស្រីកាលពីម្សិលមិញថា លោកស្រីពិតជាមានការបារម្ភអំពីសុវត្ថិភាពអ្នកនៅជុំវិញខ្លួន។ លោកស្រីបានសម្រេចធ្វើចត្តាឡីស័ក និងឱ្យបុគ្គលិកដែលមានទំនាក់ទំនងជិតស្និទ្ធមួយចំនួនស្នើសុំវិធានការចាំបាច់ ដើម្បីធានាសុវត្ថិភាពគ្រួសាររបស់ពួកគេផងដែរ។
លោកស្រីបញ្ជាក់ថា៖ «វាពិតជាដំណឹងអកុសល ហើយខ្ញុំសូមជូនពរឱ្យលោករដ្ឋមន្ត្រី ភីធើ ស៊ីចាតូ និងក្រុមគ្រួសាររបស់គាត់ឆាប់ជាសះស្បើយ។ ខ្ញុំពិតជាបារម្ភពីកូនៗរបស់ខ្ញុំ ហើយខ្ញុំរង់ចាំលទ្ធផលនៃការធ្វើតេស្ត។ ក្នុងពេលនេះ ក្រុមគ្រួសាររបស់ខ្ញុំទាំងអស់នឹងស្នាក់នៅដាច់ដោយឡែកពីគ្នាដោយចាប់ផ្តើមពីពេលថ្ងៃត្រង់នេះ (៤ វិច្ឆិកា) រហូតដល់យើងលែងបង្កហានិភ័យដល់សុខភាពសាធារណៈ»។
លោកនាយករដ្ឋមន្ត្រី ហ៊ុន សែន ក៏បានបញ្ជាក់នៅក្នុងហ្វេសប៊ុកផងដែរថា៖ «ដោយឡែកនៅផ្ទះខ្ញុំមានរូបខ្ញុំ និងភរិយា ក្រុមអង្គរក្សអ្នកបើកបរសរុប ១៨ នាក់ លទ្ធផលនៃការធ្វើតេស្ដបញ្ជាក់ថាអវិជ្ជមានទាំងអស់មិនមានអ្នកណាឆ្លងជំងឺកូវីដ១៩នោះទេ»។
លោកបន្តថា៖ «ទោះបីខ្ញុំមិនមានឆ្លងកូវីដ ១៩ ក្ដី តែដើម្បីសុវត្ថិភាពទាំងអស់គ្នា គ្រូពេទ្យតម្រូវឲ្យខ្ញុំរស់នៅដាច់ដោយឡែករយៈពេល ១៤ ថ្ងៃ សូម្បីតែភរិយា កូន និងចៅក៏មិនអាចជួបបានដែរ»។
សូមបញ្ជាក់ថា ក្រៅពីមន្ត្រីជាន់ខ្ពស់ខាងលើនេះលោក ភីធើ ស៊ីចាតូ ក៏បានជួបជាមួយលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ លោក សួស យ៉ារ៉ា សមាជិកសភាកម្ពុជាលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ដោយមានទាំងចុះហត្ថលេខាលើកិច្ចព្រមព្រៀងរវាងភាគីទាំង ២ ផងដែរ៕
វីដេអូ៖
