.jpg)
លោក ឡោ រស្មី អនុរដ្ឋលេខាធិការក្រសួងកសិកម្ម។ រូបថត Swift News
មណ្ឌលគិរីៈ តំណាងអយ្យការអមសាលាដំបូងខេត្ដមណ្ឌលគិរីបានប្រើពេលប្រមាណជិត ៤ ម៉ោង កាលពីថ្ងៃម្សិលមិញក្នុងការសួរនាំលោក ឡោ រស្មី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ពាក់ព័ន្ធនឹងករណីដែលលោកអនុញ្ញាតផ្ដល់ដីដល់ក្រុមហ៊ុនឯកជនចំនួន ៩ ៧៤១ ហិកតា នៅខេត្ដមណ្ឌលគិរី។
លោក មាស ប្រុស ប្រធានលេខាធិការដ្ឋានរដ្ឋបាលអយ្យការអមសាលាដំបូងខេត្ដមណ្ឌលគិរីបានប្រាប់ភ្នំពេញប៉ុស្ដិ៍កាលពីម្សិលមិញថា ពាក់ព័ន្ធនឹងការសួរនាំលោក ឡោ រស្មី ព្រះរាជអាជ្ញាបានចាប់ផ្ដើមសួរនាំតាំងពីពេលព្រឹក រហូតដល់ពេលរសៀលម៉ោង ២។
លោកបានថ្លែងថា៖ «យើងសាកសួរគាត់ប្រហែលជិត ៤ ម៉ោង ពីព្រឹករហូតដល់ម៉ោង ២ (រសៀល)។ ក្រោយសាកសួរ យើងបានឲ្យគាត់ត្រឡប់ទៅផ្ទះវិញហើយ។ សំណុំរឿងនេះយើងនឹងមានបន្តការស៊ើបអង្កេតទៀតក្នុងនោះក៏មានការស៊ើបអង្កេតចំពោះអ្នកពាក់ព័ន្ធផ្សេងទៀតដែរ»។
លោក ឡោ រស្មី ត្រូវបានព្រះរាជអាជ្ញានៃអយ្យការអមសាលាដំបូងខេត្ដមណ្ឌលគិរីកោះហៅឲ្យចូលខ្លួនឆ្លើយបំភ្លឺនៅតំណាងអយ្យការអមសាលាដំបូងខេត្តកាលពីព្រឹកថ្ងៃពុធម្សិលមិញពាក់ព័ន្ធនឹងករណីដែលមន្ត្រីជាន់ខ្ពស់រូបនេះបានផ្ដល់ការអនុញ្ញាត (ដីធ្លីទៅឱ្យក្រុមហ៊ុនឯកជន) ជំហានទី ១ ចំនួន ១ ០០០ ហិកតា ក្នុងអនុតំបន់ I អនុតំបន់ II ចំនួន ២ ០០០ ហិកតា អនុតំបន់ III ចំនួន ២ ០០០ ហិកតា អនុតំបន់ IV ចំនួន ២ ០០០ ហិកតា និងអនុតំបន់ V ចំនួន ២ ៧៤១ ហិកតា ឲ្យទៅក្រុមហ៊ុន ផេស៊ីហ្វិក ហ្គ្រេនយ៉ញស្កុក ខមភេនី លីមីធីត នៅក្នុងខេត្តមណ្ឌលគិរី។
ភ្នំពេញប៉ុស្តិ៍នៅមិនទាន់អាចទាក់ទងលោក ឡោ រស្មី និងលោកស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ សុំការបកស្រាយចំពោះករណីនេះបានទេកាលពីម្សិលមិញដោយហៅទូរស័ព្ទចូល ប៉ុន្តែលោកទាំង ២ មិនទទួលឆ្លើយ។ ចំណែកលោក សុង ឃាង ប្រធានមន្ទីរ កសិកម្ម រុក្ខាប្រមាញ់ និងនេសាទខេត្ដមណ្ឌលគិរីបានទទួលទូរស័ព្ទ ប៉ុន្ដែនៅពេលភ្នំពេញប៉ុស្តិ៍ សាកសួរលើបញ្ហានេះលោកក៏ឈប់និយាយវិញ។
លោក ស្វាយ សំអ៊ាង អភិបាលខេត្តមណ្ឌលគិរីបានបញ្ជាក់ពីម្សិលមិញថា លោកមិនបានដឹងរឿងការកោះហៅមន្ត្រីក្រសួងកសិកម្មមកសួរនាំពាក់ព័ន្ធនឹងរឿងដីធ្លីនោះទេ ដោយបង្វែរឱ្យទៅសួរប្រធានមន្ទីរកសិកម្ម រុក្ខាប្រមាញ់ និងនេសាទដែលភ្នំពេញប៉ុស្តិ៍ សួរមិនព្រមឆ្លើយ ។
លោក ហេង ស្រស់ សកម្មជនការពារព្រៃឈើបានលើកឡើងថា គ្រប់លិខិតដែលផ្ដល់ដីសម្បទានសេដ្ឋកិច្ច សុទ្ធតែមានការចុះហត្ថលេខាក្នុងការអនុញ្ញាតផ្ដល់ឲ្យទៅក្រុមហ៊ុន។ ចំណែកលោក ឡោ រស្មី អាចនឹងជាប់ពាក់ព័ន្ធនឹងការផ្ដល់ដីសម្បទានសេដ្ឋកិច្ចខុសច្បាប់ផងដែរ។
លោកបានថ្លែងថា៖ «ប្រហែលជាតុលាការ គាត់រកឃើញថាលោក ឡោ រស្មី អាចនឹងជាប់ពាក់ព័ន្ធក្នុងការផ្ដល់ដីសម្បទានខុសច្បាប់ និងការរួមចំណែកឲ្យមានការបំផ្លាញធនធានធម្មជាតិផងដែរ» ៕
