.jpg)
លោក ងី ច័ន្ទផល រដ្ឋលេខាធិការក្រសួងមហាផ្ទៃ។ ហេង ជីវ័ន
ភ្នំពេញ: មន្ត្រីជាន់ខ្ពស់នៃរដ្ឋាភិបាលកម្ពុជា ២ រូប កាលពីម្សិលមិញបានថ្លែងការពារលទ្ធិប្រជាធិបតេយ្យនៅកម្ពុជាមិនមានសញ្ញាថមថយ ឬដើរថយក្រោយដូចការរិះគន់ពីក្រុមបរទេសមួយចំនួន និងក្រុមអតីតគណបក្សសង្គ្រោះជាតិថា កម្ពុជាកំពុងដើរលើផ្លូវខុសគន្លងប្រជាធិបតេយ្យ។
ការថ្លែងបែបនេះបានធ្វើឡើងនៅក្នុងសន្និសីទសារព័ត៌មានមួយនៅទីស្ដីការគណៈរដ្ឋមន្ដ្រីដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលស្ដីពី «កម្ពុជា និងលទ្ធិប្រជាធិបតេយ្យ» ដើម្បីពង្រឹងការយល់ដឹងដល់សាធារណជនស្ដីពីការអនុវត្តគោលការណ៍ប្រជាធិបតេយ្យរបស់រាជរដ្ឋាភិបាលសំដៅលើកកម្ពស់អភិបាលកិច្ចល្អជាមូលដ្ឋានក្នុងកិច្ចអភិវឌ្ឍសង្គមជាតិ។
លោក ងី ច័ន្ទផល រដ្ឋលេខាធិការក្រសួងមហាផ្ទៃបានថ្លែងថា ប្រជាធិបតេយ្យដែលកំពុងអនុវត្តនៅកម្ពុជាគឺមិនមែនជារបស់ដែលចម្លង ឬទិញពីបរទេសណាមួយដើម្បីយកមកប្រើប្រាស់នៅក្នុងប្រទេសកម្ពុជាទេ។ ប៉ុន្តែវាជាការបង្កើតឡើងដោយកម្ពុជាខ្លួនឯងដែលស្របតាមបរិបទ ឬស្ថានភាពជាក់ស្ដែង ហើយបញ្ហាប្រជាធិបតេយ្យនៅកម្ពុជាក៏មិនមែនជារឿងដែលត្រូវធ្វើតាមបង្គាប់នរណាម្នាក់ ឬប្រទេសណាមួយនោះដែរ។
លោក ច័ន្ទផល ថ្លែងថា៖ «យើងបានធ្វើដំណើរបានជាង ៣០ ឆ្នាំមកនេះ គឺជាការរីកចម្រើនបំផុតហើយ ដែលវាសមស្របតាមគោលការណ៍ប្រជាធិបតេយ្យ គឺមានច្បាប់មាននីតិរដ្ឋ និងយុត្តិធម៌សង្គម។ អ្នកខ្លះយករឿងប្រជាធិបតេយ្យនៅកម្ពុជាធ្វើជាចំណាប់ខ្មាំង ព្រោះគាត់ (ក្រុមប្រឆាំង) ចង់វាយប្រហារខ្មែរយើង ដោយសារកម្ពុជាបានដើរខុសទិសដៅរបស់ពួកគាត់ មិនឱនក្បាលឲ្យគាត់។ អ៊ីចឹង គាត់អត់មានអ្វីក្រៅពីរកពាក្យពេចន៍វាយប្រហារមកលើកម្ពុជាទេ»។
លោកក៏បានអះអាងផងដែរថា បញ្ហាប្រជាធិបតេយ្យដែលរដ្ឋាភិបាលកំពុងនិយាយនៅកម្ពុជានាពេលនេះគឺចង់ឲ្យមានភាពកក់ក្ដៅ ចង់ឲ្យមានភាពជឿទុកចិត្ត។ បើគណបក្សនយោបាយណាចាញ់ឆ្នោតនាពេលនោះគឺពួកគាត់ត្រូវតែអស់ចិត្ត ហើយសន្សំលុយ ដើម្បីចូលរួមប្រកួតម្ដងទៀតនៅលើកក្រោយ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងថា ការជ្រើសរើសយកលទ្ធិប្រជាធិបតេយ្យមានច្រើនសណ្ឋានដូចកាលពីឆ្នាំ ១៩៧០ ដល់ឆ្នាំ ១៩៧៥ ត្រូវបានគេជ្រើសយកលទ្ធិប្រជាធិបតេយ្យតាមរយៈចុងកាំភ្លើង និងការធ្វើសង្គ្រាម ប៉ុន្ដែបច្ចុប្បន្ននេះការជ្រើសរើសយកលទ្ធិប្រជាធិបតេយ្យគឺជាជម្រើសរបស់ពលរដ្ឋទាំងអស់ (តាមរយៈការបោះឆ្នោត) ដោយគ្មានអ្នកណាមកបង្គាប់ឲ្យប្រកាន់យកតាមចិត្តអ្នកដទៃទេ គឺតាមរយៈឯកភាពជាតិដែលបានចែងនៅក្នុងរដ្ឋធម្មនុញ្ញ ។
លោក ស៊ីផាន ថ្លែងថា៖ «យើងបានបង្ហាញភ័ស្ដុតាងជាក់ស្ដែងឲ្យបុគ្គលទាំងនោះបានឃើញពីទំហំសេដ្ឋកិច្ចកំពុងរីកចម្រើនខ្លាំងក្នុងរង្វង់ ៧ ភាគរយក្នុង ១ ឆ្នាំព្រមទាំងបាននិងកំពុងកសាងហេដ្ឋារចនាសម្ព័ន្ធគ្រប់ទីកន្លែង និងបង្ហាញពីការចូលរួមសកម្មភាពការពារសន្ដិសុខពិភពលោកតាមរយៈការបញ្ជូនកងទ័ពមួកខៀវទៅធ្វើការជាមួយអង្គការសហប្រជាជាតិជាដើម»។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិដែលត្រូវបានតុលាការរំលាយចោលបានថ្លែងអះអាងថា បើទោះបីជារដ្ឋាភិបាលមិនជឿលើអន្តរជាតិលើកឡើងពីការដើរថយក្រោយនៃលទ្ធិប្រជាធិបតេយ្យនៅកម្ពុជា រដ្ឋាភិបាលគួរតែជឿសម្ដីរបស់ប្រជាពលរដ្ឋខ្មែរទាំងអស់ដែលបានត្អូញត្អែរតាមបណ្ដាញសារព័ត៌មាននានា។
ដោយពួកគាត់យល់ថា មានការត្បិតត្បៀតច្រើន ទាំងការបញ្ចេញមតិ និងសកម្មភាពចូលរួមសង្គមនានាដែលធ្វើឲ្យពួកគាត់មានការភ័យខ្លាចដែលបញ្ហាទាំងនេះវាបានបង្ហាញថា លទ្ធិប្រជាធិបតេយ្យពិតជាបានដើរថយក្រោយ ហើយប្រជាធិបតេយ្យមិនមែនស្ថិតនៅលើការបោះឆ្នោតមួយមុខទេ វាមានច្រើនទម្រង់។
លោក ច័ន្ទរ័ត្ន ថ្លែងថា៖ «ខ្ញុំក៏យល់ថា លទ្ធិប្រជាធិបតេយ្យនៅកម្ពុជាកំពុងដើរថយក្រោយដែរ ហើយបើចង់កែឡើងវិញឲ្យចៀសផុតពីគំនាបបរទេស ត្រូវបើកឱកាសឲ្យបក្សសង្គ្រោះជាតិបានចូលរួមបោះឆ្នោតដោយយុត្តិធម៌ឡើងវិញ»។
លោក ឡៅ ម៉ុងហៃ អ្នកវិភាគបញ្ហានយោបាយបានថ្លែងថា ស្ថានភាពដែលកំពុងអនុវត្តជាក់ស្ដែងនាពេលបច្ចុប្បន្ន វាមិនស្របជាមួយនឹងការអះអាងរបស់មន្ត្រីទាំងនោះឡើយ។ ការដើរថយក្រោយនៃលទ្ធិប្រជាធិបតេយ្យ ដោយសារមានការបំពានលើរដ្ឋធម្មនុញ្ញ គ្មានដំណើរការតាមតួនាទី គ្មានការគោរពសិទ្ធិមនុស្ស គ្មានការគោរពសិទ្ធិអ្នកបញ្ចេញមតិ និងសិទ្ធិធ្វើនយោបាយ។
លោកថ្លែងថា៖ «លទ្ធិប្រជាធិបតេយ្យនៅកម្ពុជា ឥឡូវនេះវាសឹងតែអត់មានលទ្ធិប្រជាធិបតេយ្យសម្រាប់នឹងនិយាយផង។ លទ្ធិប្រជាធិបតេយ្យនៅកម្ពុជាសព្វថ្ងៃនេះគឺកំពុងនៅលើគ្រែដេករង់ចាំថ្ងៃស្លាប់»៕
